Salmos 78 - New Testament Psalms and Proverbs in Mixtec Magdalena Peñasco

Salmo 78 Ndaka ja vii ja va'a sa'a Su'si ma ja kuu ñayii ñuu ya ma

¹ Ndaka ni ja ka kuu o in‑ni ñuu, jin koniniso'o ni tnu'u va'a káxtnu'u sa ya.

² Ká'an sa tnu'u ndichi ja ka iyo yu'u onde xi'na xeen‑ka ma, sukan‑va'a jín ndasa'a o kuenda.

³ Vaa jâ ni ka yo jiniso'o o ja ni ka yo ndakani tna'a o ñayii jana'a ma, te jâ ka ndasa'a o kuenda sukan ni sa'a Su'si ma.

⁴ Te máko jin ko chu'u o nuu sa'ya tata o kii koo‑ka ma, su'va jín ndaka'an jín ndakachi o nuu i sukan iyo tnu'u ndee tnu'u ndatnu maa Su'si ma ji'in ja sukan ni sa'a ya milagru ma, te jín ndachiñu'u o ya.

⁵ Vaa Su'si ma, maa tnu'u ni tatnuni ya nuu Jacob ma, ni skendoo ya nuu tna'a o tee jana'a ñuu Israel ma, sukan‑va'a jin ndaka'an jin ndakachi de nuu sa'ya tata de ma sukan jin ko sa'a jin ko kuu ndaka i ma,

⁶ sukan‑va'a jin kuni ndaka sa'ya tata de jin kenda koo kivi ki'in o ma, te maa i, te jin ndaka'an jin ndakachi tuku i nuu sa'ya tata i ma,

⁷ sukan‑va'a jin kukanu ini tna sa'ya tata i ma nuu Su'si ma te máko jin ndunaa i ndaka milagru ni sa'a, ni kuu ya ma, te jín kona'a i ja jin sa'a i sukan tátnuni ya ma,

⁸ te máko jin ko kuu i sukan ni ka yo kuu yuva i ma ja ni ka yo kuu de in jichi ñayii inuso'o ma, te ñatuu ni ka yo kandija de ja ni ka'an Su'si ma, vaa ñatuu ni ka yo ñu'u ini de ja maa in‑ni Su'si o ma jin kondikin de.

⁹ Vaa sa'ya tata tee kúu Efraín ma, visi kuan koo tu'va de ja jin kanaa de ma chi ni ka ndakunu de ja ni ka yu'u de,

¹⁰ vaa ñatuu ka ñu'u ini de ja jin sa'a de sukan ni kaxtnu'u Su'si ma sukan‑va'a jin koo va'a de ji'in ya ma, te ñatuu ni ka kuu ini de ja jin kandija de sukan ni tatnuni ya ma.

¹¹ Ni ka ndunaa de sukan ni sa'a ni kuu Su'si ma, ja ni ka kaku de ma, ji'in ja sukan ni kaxtnu'u ya milagru ni yo sa'a ya ma, te ni ka ndunaa tna de sukan ni ka jini de milagru ni yo sa'a ya ma.

¹² Te ndaka tna'a de ñayii jana'a ma chi ni ka jini tna i ndaka milagru ni sa'a ya ñuu Egipto ma, nuu ka iyo‑ka i ñuu Zoán ma.

¹³ Te ni ka jini tna i sukan ni june ya nuu ndute mar ma, te ni ndaxtutu ya ndute ma in in lado ma, te ni ka ya'a ndaka ñayii ma.

¹⁴ Te sa'a ni yo kuu ya ji'in i ichi kuan koo i ma, vaa nduu ma chi in viko sasa'a‑ni kati yoxtnuu i ichi kuan koo i ma, te jakuaa ma in ñu'u ndu'va yoxtnuu ichi kuan koo i ma.

¹⁵ Te nuu yichi nuu ñatuu kuiti nawa iyo ma ni ndakune ya in toto, te ni too kua'a ndute, te ni ka ni'i i de ja jin ko'o i de ma.

¹⁶ Te kuenda tnu'u ja in yute ka'nu kúu nuu ni xtoo ya ndute ma me'ñu toto ma.

¹⁷ Visi ni ka jini i milagru yukan ma, kovaa ni ka yo sa'a‑ka i ja u'vi ma, kuan koo i ichi nuu ñatuu kuiti nawa iyo ma, vaa nuu yichi kuiti kúu ma, te ñatuu ni ka kuni i ja jin kandija i ja ká'an Su'si iya iyo onde sukun ma.

¹⁸ Te ni ka jitotnuni i Su'si o ma kóto nuna kua'a ya ja jin kaa i sukan ka kuni maa i ma.

¹⁹ Te sa'a ni ka ka'an i ja kuu Su'si o ma: “¿Kuiti ja kuu taa Su'si ma ndaka ndeyu jin kaa o vitnañu'ni, te vitna ja masu nawa iyo kuiti nuu ka iyo o ya?

²⁰ Ja ndaa kúu ja ni ta'vi Su'si ma toto ma, te ni too ndute kua'a xeen ma, te jika jika‑nka de ma. ¿Kovaa kuiti ja kuu taa tna ya xtatila jin kaa o? ¿Te kuiti ja kuu taa ya kuñu jin kaa o ja ka kuu o ñuu ya a?”, ka kuu i ka ka'an i.

²¹ Te ni jiniso'o Su'si ma sukan ka ka'an i ma, te ni ndakiti xeen ini ya nuu ñayii ñuu Israel ma, ja ka kuu i sa'ya tata Jacob ma,

²² kuechi ja ñatuu nde ni ka kandija i Su'si ma te ñatuu nde ni ka kukanu ini i ya ja maa ya chindee ña'a te jin kaku i nuu ja u'vi ma.

²³ Kovaa Su'si ma chi ni tatnuni ya nuu viko ka iyo onde andivi ma, sani te viko ma, ni ka jan ndiyo i, te ni ndanune andivi ma.

²⁴ Te ni tetniñu ya ja nani maná ma, sukan‑va'a jin kaa ñayii ma. Sukan ni sa'a ya ja ni kuun triu onde andivi ma, ja jin kaa i ma.

²⁵ Ndaka ñayii ma ni ka jaa xtatila ka jaa ángel ma onde ni ka ndutu chii i ma.

²⁶ Te ni sa'a ya ja ni jaki'i nini'i tachi ichi nuu vee ma, ichi ninu ma.

²⁷ Te ni sa'a ya ja ni kuun kuñu ni ka jaa ñayii ma, vaa ni tetniñu ya kua'a xen‑xeen kiti ka nani kañu'u ma. Ni kuun kua'a xen‑xeen ti nuu ka iyo i ma, sukan kua'a ñuti kaa yu'u mar ma.

²⁸ Te ni sa'a ya ja onde me'ñu nuu ka iyo i ma ni ka kenda koo ti, te nii nuu ka ndaa ve'e sa'ma nuu ka iyo i ma ni ka kenda koo ti.

²⁹ Te sukan ni sa'a ya ja ni ka ni'i i ja ni ka kuu ini i ma, te ni ka jaa xeen i onde ni ka ndutu chii i ma.

³⁰ Kovaa masu nde ni ka ndajinu ini i ja ka jaa i ja ni ka ndiyo ini i ma, vaa ka ñu'u‑ka kuñu ma yu'u i ma,

³¹ sani te ni ndakiti ini Su'si ma nuu i ma, te ni sa'a ya ja ni ka ji'i ñayii ka ndaa ndee ka ndaa va'a‑ka ma, ñayii ni ka yo jatnu'u ini‑ka ña'a ñayii ñuu Israel ma.

³² Visi sukan ni sa'a ya milagru ma, kovaa masu nde ni ka ndakunitnuni i ja jin ndakuan‑ta'vi i nuu ya ma chi su'va ni ka sa'a‑ka i ja u'vi ma.

³³ Chukan kúu ja ni sa'a ya ja ni ka yo ndo'o, ni ka yo neni maa i ma, te ni ka yo kuneé, ni ka yo ku‑uun maa i ma, te ni ka skenaa i maa i ma.

³⁴ Te nuu ni sa'a ya ja ni ka ji'i ñayii ñatuu ka kandija ja ká'an ya ma, sani te ñayii ka teku‑ka ma, ni ka yo ndanduku kunu kunu i ya nduu ñuu.

³⁵ Te onde sukan ni kuu ma, sana ni ka ndaka'án i ja maa ya kúu Su'si iya iyo onde sukun ma te maa ya sa'a ja jin kaku i ma.

³⁶ Vivii ni ka yo ka'an i ja kuu Su'si ma, kovaa masu inundija i ja ni ka yo ka'an i ma.

³⁷ Vaa másu ka iyo ndaa ini anua i ma nuu Su'si ma, vaa másu nde ni ka yo sa'a i ja ni ka skuiso i nuu Su'si ma, nuu ni tatnuni ya naxe jin ko sa'a i sukan‑va'a jin koo va'a i nuu ya ma.

³⁸ Kovaa maa ya chi ni kunda'vi ini ya i, te ni sakanu ini ya ndaka ja u'vi ka sa'a i ma, te ñatuu nde ni sa'a ya sukan ni yo jani ini ya ora ni yo ndakiti ini ya nuu i ma.

³⁹ Ni ndaka'án ya ja yikikuñu‑ni ka kuu i, vaa ñuñu'ni‑ni ka iyo i ñuu ñayivi a te jin kûu i, te másu jin ndakokuiñi‑ka i ñuu ñayivi a.

⁴⁰ ¡Na saa‑nka jichi ni ka yo sa'a so'o i te ñatuu ni ka yo kandija i, te ni yo kuxii ini ya, vaa ñatuu ni ka yo sa'a i sukan ká'an ya ma nani ka jika i kuan koo i ichi nuu ñatuu kuiti nawa iyo ma!

⁴¹ ¡Na saa‑nka jichi ni ka yo jitotnuni i Su'si ma nú kuu chindee ña'a ya xi ña'a, te ni ka yo sa'a i ja ni yo ndakiti ini Su'si iya ii ñuu Israel ma!

⁴² Te ñatuu ni ka yo ndaka'án i sukan ni yo chindee ña'a ya ma, ja ni ka kaku i nuu ñayii ni ka yo xndo'o, ni ka yo xneni ña'a ma.

⁴³ Te ni ñatuu nde ni ka yo ndaka'án i milagru ni sa'a ya ma nuu ka iyo‑ka i ñuu Egipto ma, ja vivii ni yo jito va'a ya i nuu ka iyo‑ka i ñuu Zoán ma,

⁴⁴ nuu ni sa'a ya ja ndaka ndute jika yute ma, ni nduu de niñi ma, sukan‑va'a ni‑in‑ka ñayii ñuu Egipto ma kuu ko'o‑ka ndute ma.

⁴⁵ Ni tetniñu ya kua'a xeen tiukun ja ni ka xnaa ti nawa iyo ma. Te ni tetniñu ya kua'a sa'va ja jin xtna'a ti ñayii ma.

⁴⁶ Te ni tetniñu ya kua'a tika langosta ja ni ka jaa ti ndaka ja ni kuu itu ñayii yukan ma.

⁴⁷ Te ni sa'a ya ja ni kuun ñiñi, te ni naa ndi'i kuiti itu ñayii yukan ma, ji'in ndaka yutnu kui'i ka iyo ñuu yukan ma.

⁴⁸ Te ndaka kiti ka ndeka ñayii ñuu Egipto ma, ni ka ji'i ti, ja ni ka kani ña'a tajan ma, ji'in ja ni kuun ñiñi na'nu ma.

⁴⁹ Te ni tetniñu ya in jichi ángel ma, ja ni ki koo i ni ka xnaa i ñuu Egipto ma, vaa ni ndakiti xeen ini ya nuu ñayii ñuu yukan ma.

⁵⁰ Te ni masu nde ni sakanu ini‑ka ya ñayii ñuu yukan ma, su'va ni wa'a ya tnu'u ja ni ka ji'i maa i nuu ndaka kue'e ni tetniñu ya ñuu yukan, vaa ni ndakiti xeen ini ya nuu i ma.

⁵¹ Te ni sa'a ya ja ni ka ji'i ndaka sa'ya ñayii ñuu Egipto ma suchi yii xinañu'u ma, ja ka iyo i ne'un sa'ya tata tee ni yo nani Cam ma.

⁵² Te ni ndene'e ya ndaka ñayii ñuu Israel ma, te ni yo jito ya i, sukan kúu in tee jito ndikachi de ma, te ni skaka ya i ichi nuu ñatuu kuiti nawa iyo ma.

⁵³ Te ni kaxtnu'u ya ja iyo ya ji'in i, sukan‑va'a masu nawa jin koyu'u i, te ni sa'a ya ja ñayii ñatuu ka kunimani nuu i ma, ni ka kandee i nuu ndute mar ma, te ni ka ji'i i.

⁵⁴ Sani te ni skaka ya ñayii kúu ñuu ya ma kuan koo i onde ni ka kivi koo i nuu kúu ñuu ii ma, te nda'a kua'a ya ma ni sa'a ja ni ka kundee i nuu ñayii ka iyo ñuu yukan ma.

⁵⁵ Ndi‑tna'a kuan koo i ma, te maa ya ni kene'e ndaka ñayii ka iyo ñuu yukan, sani te ni wa'a ya nuu jin koo in jichi in jichi sa'ya tata tee kúu Israel ma.

⁵⁶ Kovaa ni ka sa'a i ja ni ndakiti ini Su'si o iya iyo onde sukun ma, vaa ndimaa ni ka yo jitotnuni i ya, te ñatuu ni ka yo kandija i ja jin sa'a i sukan ni tatnuni ya ma.

⁵⁷ Su'va sukan ni ka yo sa'a yuva i ma, sukan ni ka yo sa'a tna i, te ka kuu i sukan kúu in kuji ja nde'ya o ma chi iyo va'a i, kovaa nuna kuatniñu o ma chi tna'nu i.

⁵⁸ Ni ka sa'a i ja ni ndakiti ini ya, vaa ni ka yo sa'a i altar onde nuu yuku sukun‑ka ma, te ni ka yo ndachiñu'u i tna'a ja masu Su'si ka kuu ma, tna'a ja ni ka yo sa'a maa i ji'in nda'a i ma.

⁵⁹ Te ni jini Su'si ma ndaka ja ka sa'a i ma, te ni ndakiti xeen ini ya, te ni saxiko ya ndaka ñayii ñuu Israel ma.

⁶⁰ Te ñatuu ni iyo‑ka ya ini ve'e nuu ni ka sa'a i ja koo ya ma, sukan‑va'a koo ya me'ñu ndaka i ma nkuu. Chukan kúu ja nuu ka iyo i ñuu Silo ma chi ni skendoo ya i.

⁶¹ Te ni wa'a ya tnu'u ja ñayii in‑ka ñuu ja ñatuu ka kunimani i nuu ya ma, ni ka ndunda'a maa i nuu ni yo kenda jayiñu'u ya ma ji'in tnu'u ndee tnu'u ndatnu ya ma.

⁶² Ûni ni ndakiti xeen ini ya nuu ñayii kúu ñuu ya ma, te ni wa'a ya tnu'u ja ni ka kundee maa ñayii in‑ka ñuu ma ja ni ka ja'ni i ñayii kúu ñuu ya ma.

⁶³ Vaa suchi yii ma suchi jaa ma, nuu ñu'u i'ni ma ni ka kayu i, te ni ka ji'i i, te suchi si'i ma suchi jaa ma, ni ka sa'a ndeva'a ña'a i, te masu nde ni kuu vii ni kuu luu ja jin tnanda'a i ma.

⁶⁴ Te tee ka kuu sutu ma, ni ka ja'ni ña'a ñayii ma ji'in yuchi kúu espada ma. Te ñasi'i de ni ka ndoo ma, masu nde ni kuu jin konda'yu ña ja jin kuxii ini ña ja ni ka ji'i de ma.

⁶⁵ Kovaa ni ndaka'án Su'si ma sa'ya tata ñayii ñuu Israel ma, te ni chindee ya i, te ni kayu'u nini'i ya sukan kúu in tee kua'an ja kanaa de.

⁶⁶ Te sani te ni kundee ya nuu ñayii ka kuni u'vi nuu ñuu ya ma, te ni sa'a ya ja ni ka ndakunu i kuan nu koo i, te ni ka ndatna'a maa i ja kan‑nuu ni‑kani ni‑jika.

⁶⁷ Ni saxiko ya sa'ya tata José ma, te ñatuu ni kaji ya sa'ya tata Efraín ma.

⁶⁸ Te ni kaji ya sa'ya tata Judá ma ji'in yuku nani Sion ma, yuku kutoo ya ma.

⁶⁹ Te ni sa'a ya ja ni ka sa'a i in veñu'u nuu koo ya te jin ndachiñu'u i ya ma, te ni sunkani va'a ya sukan ni sunkani va'a ya ñu'ú ya, sukan‑va'a koo va'a i ni‑kani ni‑jika.

⁷⁰ Te ni kaji ya David ma, nuu iyo de ja jito de ndikachi de ma, sukan‑va'a kunukuechi de nuu ya.

⁷¹ Ni jan nu kueka ya de nuu yikuu‑ka de jito de ndikachi de ma, sukan‑va'a ko koto va'a de ñayii ñuu ya ma sukan ni yo jito de ndikachi de ma.

⁷² Te David ma chi ni‑yu'u ni‑ini de ni yo jito va'a de ñayii ñuu Su'si ma, te ni yo jini de naxe skaka de i ichi va'a ma.