Salmos 77 - New Testament Psalms and Proverbs in Mixtec Magdalena Peñasco

Salmo 77 Jín ndasa'a o kuenda ndaka ja vii ja va'a sa'a Su'si ma

¹ Ni‑yu'u ni‑ini sa ndákune'e sa Su'si ma, te ora ndákune'e sa ya ma chi jiniso'o ya ja jiña'a sa ya ma.

² Te kivi ni yo ndo'o, ni yo neni sa ma, te ndaka jakuaa ma ndánduku sa Su'si iya tátnuni nuu o a, te skata nda'a skata nda'a sa nuu ya, te jikan‑ta'vi jikan‑ta'vi sa nuu ya ja na chindee ña'a ya. Kovaa ñatuu ni ndani'i sa tnu'u kanu ini, vaa kúxii xeen ini sa ma.

³ Te ndáka'án sa sukan vii sukan va'a ini Su'si ma, te nda'yu sa, kovaa ndása'a sa kuenda sukan ndó'o néni sa ma, te ndákuxii tuku ini sa.

⁴ Kovaa maa ni, vi Su'si, másu nde ni taa ni tnu'u ja kusu sa ma, chi vaa ndó'o néni sa ma, te ni masu nde kúu ka'an‑ka sa ma.

⁵ Ndáka'án sa sukan ni yo kuu sa ji'in ni onde xi'na‑ka ma.

⁶ Te ndáka'án sa sukan ni yo jita sa ndaka jakuaa ma ja ni yo ndachiñu'u ña'a sa ma, te ndákani ndáka'vi ini sa. Te jikan‑tnu'u sa maa sa:

⁷ “¿Kuiti ja ni‑kani ni‑jika ndakiti ini Iya Tátnuni ma nuu o a te xndoo ña'a ya? ¿Te ma ndunda'vi ini‑ka ña'a ya?

⁸ ¿Kuiti ja ñatuu kútoo‑ka ña'a ya? ¿Jâ ni ndunaa ya ndaka ja ni skuiso ya nuu o ma?

⁹ ¿Jâ ni ndunaa Su'si ma sukan kúnda'vi ini ña'a ya ma? ¿Ndákiti xeen ini ya nuu o?”, Sa'a ka'án sa.

¹⁰ Te ja tna‑u'vi xeen ini sa kúu ja ñatuu iyo‑ka ni ji'in sa, ja chindee ña'a ni sukan ni yo sa'a ni onde xi'na‑ka ma, vi Su'si.

¹¹ Te ndáka'án sa ndaka milagru ni yo sa'a, ni yo kuu ni onde xi'na‑ka ma nuu tna'a sa ñayii jana'a ma, vi Su'si.

¹² Te ndákani ndáka'vi ini sa ndaka ja vii ja va'a sa'a ni ma, te ndáka'an ndákachi sa nuu ñayii ma ndaka ja sa'a ni ma.

¹³ Su'si maa sa, iya ii kúu ni, te masu na in‑ka su'si iyo ja kuu sa'a ndaka sukan sa'a maa ni a.

¹⁴ Maa ni kúu Su'si iya sa'a milagru, vaa maa ni káxtnu'u tnu'u ndee tnu'u ndatnu ni a nuu ñayii ñuu ñayivi a.

¹⁵ Te ja maa tnu'u ndee tnu'u ndatnu ni ma, te ni sa'a ni ja ni ka kaku ndaka ñayii ka kuu sa'ya tata Jacob ma ji'in José ma ja ka kuu i ñayii ñuu ni ma.

¹⁶ Te nuu ni jini ña'a ndute ma maa ni ma, vi Su'si, te onde ka'a ndute ma ní'i ní'i‑nka ja ni yu'u de ja ká'an ni ma, te ni kandija de ja ni tatnuni ni ma.

¹⁷ Te suni viko tna ma, ka kandija i ja tátnuni ni ma, vaa sani te kúun savi ma, te jándute ni‑ka'nu andivi ma, te kána savi ma.

¹⁸ Vaa maa ni sa'a ja jándute ma, te ni‑ka'nu ñuu ñayivi a yé'e ni'ni, te kána savi ma ora ndákavanuu tna'a ndákavanuu tna'a‑nka viko ma, vi Su'si.

¹⁹ Maa ni ni jika ichi nuu mar ma kovaa masu nde ka na'a ja'a ni a ichi nuu ni ya'a ni ma.

²⁰ Te ni sa'a ni ja Moisés ma ji'in Aarón ma ni ka skaka ñayii ñuu ni ma. Kuenda tnu'u ja sukan kúu tee jito ndikachi de ma, sukan ni ka yo kuu de nuu ñayii ma.