Salmos 75 - New Testament Psalms and Proverbs in Mixtec Magdalena Peñasco

Salmo 75 Su'si ma kúu iya ja'nde ndaa tniñu ñayii ma

¹ Su'si, ka ndakuan‑ta'vi xeen sa nuu ni, vaa iyo yatni ni nuu ka iyo sa ya, te ndaka ñayii ma ka ndaka'an ndaka ja vii ja va'a sa'a ni ma.

² Te sa'a ka'an Su'si ma: “Maa sa na'a na kivi, te ndakan sa kuenda nuu ndi‑in ndi‑in ñayii ma, te jin ndundaa nawa ni ka yo sa'a, ni ka yo kuu i ma.

³ Te maa sa sa'a ja ñatuu ka kotuu ja ka yituu ñuu ñayivi a ora tnáa xeen ma.

⁴ Te ni jiña'a sa nuu ñayii inuso'o xeen ka ndaa ma: Máko jin ko sa'a ni ja u'vi ma, te máko jin ko kani ini ni ja maa ni ka kuu‑ka ma, te máko jin ko kuvixi jin ko kusu'va ni.

⁵ Te masu kuu‑ni‑nka ja ka neva'a ni tnu'u ndee tnu'u ndatnu ja jin tatnuni ni ma te jin ko kuvixi maa ni te jin ko ka'an ni ja masu na in‑ka ko tatnuni nuu ni ma”, kúu ya ká'an ya.

⁶ Jín kona'a o ja ni‑in ñayii vee ichi nuu kána kandii ma, xi ñayii vee ichi nuu kée kandii ma, xi ñayii iyo nuu ñatuu kuiti nawa iyo ma, ko kuu ñayii sa'a ja jin ndani'i o jayiñu'u ma, chi ña'a.

⁷ Su'va jín kona'a o ja maa in‑ni Su'si ma kúu iya sa'a ndaa naxe jin ndani'i jin ndatna'a ñayii ma. Te maa ya sa'a ja ñayii ka sa'a ja u'vi ma, jin ndatna'a i ja kan‑nuu te jin skenaa i maa i. Te ñayii ka sa'a ja va'a ma, sa'a ya ja jin ndani'i i jayiñu'u te jin nduu i ñayii ka ndanuu nuu ya ma.

⁸ Vaa Iya Tátnuni ma, jâ yinda'a tu'va ya ndaka ja u'vi jin ndo'o jin neni ndaka ñayii ñatuu ka kandija ja ká'an ya ma te ndimaa ja u'vi ka sa'a i ma. Te kivi kenda ja xndo'o xneni ya ndaka ñayii ka iyo ni‑ka'nu ñuu ñayivi a ja ñatuu ka sa'a i sukan játna ini ya ma, te jin ndo'o jin neni maa i ndaka sukan ni jani ini ya ma.

⁹ Kovaa saña chi ni‑kani ni‑jika ndaka'an ndakachi sa sukan sa'a sukan kúu Su'si ma, te kata sa, te ndachiñu'u sa Su'si Jacob ma.

¹⁰ Sa'a ká'an maa Su'si o a: “Sa'a sa ja maa ñayii ka jani ini ja maa i ka kuu‑ka ma, jin ndatna'a i ja kan‑nuu te jin skenaa i maa i, kovaa sa'a sa ja koo‑ka tnu'u ndee tnu'u ndatnu ñayii sa'a ja va'a ja ndaa ma, te koo jayiñu'u i”, kúu ya ká'an ya.