Salmos 74 - New Testament Psalms and Proverbs in Mixtec Magdalena Peñasco

Salmo 74 Sukan kakan‑ta'vi o nuu Su'si ma ja na kaku ñayii ñuu ya ma nuu ñayii ñatuu kúnimani nuu i ma

¹ Su'si maa sa, ¿Nava'a ni skendoo ña'a ni te ñatuu kí ndi nduku ña'a ni? ¿Nava'a ni ndakiti xeen ini ni nuu sa a? Te vaa maa ni jito ña'a sukan kúu tee jito ndikachi de ma.

² Ndaka'án ni ndaka ñayii ni ndaxtutu ni onde xi'na xen‑xeen‑ka ma, ja ni ndene'e ni i nuu ja u'vi ma, sukan‑va'a jin ko kuu i ñuu maa ni ma. Suni ndaka'án ni yuku nani Sion a nuu iyo ni a.

³ Ne'e ni, te kuni ni sukan ni kendoo nda'vi, ni kendoo kee ñuu ni a. Te ñayii ñatuu ka kunimani nuu o a, ni ka xnaa i ndaka ja iyo ini veñu'u maa ni a.

⁴ Te onde nuu ni ka yo ndatna'a sa ja ni ka yo ndachiñu'u ña'a sa ma, te ka iyo tee ka kana ka kayu'u ja ni ka kundee de nuu o ma, te ûni ni ka jani de in sa'ma ja kúni ka'an ja jâ ni ka kundee de nuu o ma.

⁵ Te sukan ka kuu tee ka ja'nde tutnu yuku na'nu ma, sukan ka kuu de ini veñu'u ni ma.

⁶ Ji'in kaa tá'vi tutnu ma, ji'in martillu de ma, ka ta'vi de ndaka ja vii iyo ini veñu'u ni ma.

⁷ Te ni ka ja'mi de veñu'u maa ni a, te ni ka sa'a ndeva'a de nuu ii ni ka yo ndachiñu'u ña'a sa ma, te ûni ni ka xnaa de ndaka.

⁸ Sa'a ka jani ini de: “Jín xnaa o ndaka in jichi‑ni”, ka jani ini de. Te sukan, te ni ka xnaa de ndaka veñu'u lilikin nuu ni ka yo ndachiñu'u ña'a sa ma.

⁹ Te ñatuu nde ka jini‑ka sa ja nú iyo ni ji'in sa, xi ñatuu‑ka, vaa ñatuu‑ka na tee ndaka'an tnu'u maa ni a nuu sa ja ka kuu sa ñuu maa ni a, te ni a in sa ñatuu jini na saa‑ka kivi jin ndo'o jin neni‑ka sa ya.

¹⁰ ¿Na saa‑ka kivi jin xndo'o jin xneni ña'a ñayii ñatuu ka kunimani nuu sa ma? ¿Na saa‑ka kivi jin ka'an ndeva'a ñayii ñatuu ka kunimani nuu sa ma ja kuu ni?

¹¹ ¿Nava'a ñatuu skuili ni nda'a ni a te chindee ña'a ni? ¿Nava'a chu'u ni a, te ñatuu kunda'vi ini‑ka ña'a ni?

¹² Kovaa maa ni kúu Rey sa onde xi'na xen‑xeen‑ka ma, vi Su'si. Te kúkanu ini sa ja maa ni kúu iya sa'a ja kaku sa ndeva'a‑ni na tnundo'o iyo ñuu ñayivi a ja kenda i nuu ka iyo sa ya.

¹³ Vaa maa ni ni june nuu ndute mar ma ji'in tnu'u ndee tnu'u ndatnu ni ma, ja na kuu jin ya'a ñayii kúu ñuu maa ni ma, te ni ta'vi ni xini kiti na'nu ka ñu'u nuu mar ma.

¹⁴ Te ni jaxi ni xini kiti kúu leviatán ma, te ni wa'a ni ti ja jin kaa kiti xeen ka iyo nuu ñatuu nawa iyo kuiti ma.

¹⁵ Te ni ndakune ni nuu tóo ndute ma, te ni jakona'a yute ma, te suni maa ni ni xsichi ndute jika kua'a ma.

¹⁶ Te maa ni ni sa'a nduu ma, te maa ni ni sa'a jakuaa ma, te maa ni ni jani ini ja koo yoo ma ji'in kandii ma, te ka iyo i nuu ni tatnuni ni ja jin koo i ma.

¹⁷ Te maa ni ni sa'a ni‑ka'nu ñuu ñayivi a. Te maa ni ni sa'a ja kénda kivi te ndúkuii ni‑ka'nu ñuu ñayivi a, te maa ni sa'a ja kénda kivi te ndáyichi i te kúvijin xeen ma, vaa nuu nda'a maa ni ka iyo ndaka.

¹⁸ Su'si, kona'a ni ja ndakan ni kuenda nuu ñayii ñatuu ka kunimani nuu ni ma te ka jakundee ña'a i ma te ka ka'an ndeva'a i ja kuu ni ma.

¹⁹ Kovaa saña, ja ka ndo'o ka neni sa ya, vaa sukan ka kuu kuku ma, sukan‑nka‑ni ka kuu sa ya, te máko ndunaa ña'a ni, te máko kua'a ni tnu'u ja jin kaa ña'a kiti xeen ma.

²⁰ Su'si, ndaka'án ni ja ni skuiso ni nuu sa ma, vaa ni‑ka'nu ñuu ñayivi a nanimaa‑nka ja ka sa'a ndeva'a tna'a ñayii a kúu.

²¹ Máko kua'a ni tnu'u ja ñayii ka kunda'vi ka kukee a, te jin ko ndo'o jin ko neni i te jin ko tna'a i ja kan‑nuu, vaa su'va ka ndachiñu'u ña'a i maa ni, vi Su'si. Chukan kúu ja kasi ndee kasi ndoso ni i, te jín kaku i.

²² Ndokuiñi ni, te máko kua'a ni tnu'u ja jin ka'an ndeva'a i ja kuu ni, vi Su'si. Ndaka'án ni ñayii inuso'o xeen‑ka ka ndaa i ma chi ndi‑kivi ndi‑kivi ka ka'an ndeva'a i ja kuu ni.

²³ Te máko ndunaa ni sukan ka kana ka kayu'u i ma, vaa nuu‑ni nuu‑ni ka ka'an ndeva'a i ja kuu ni ma, vi Su'si.