Salmos 73 - New Testament Psalms and Proverbs in Mixtec Magdalena Peñasco

Salmo 73 LIBRO III Sukan jin ndando'o jin ndatna'a maa ñayii ka sa'a ja u'vi ma

¹ Ja ndaa ndija kúu ja Su'si ma chi sa'a ya ja va'a ja jin kuu ndaka yo'o ja ka kuu o ñayii ñuu Israel ya. Maa ya chi sa'a ya ja va'a ja jin kuu ñayii ka iyo vii ka iyo ndoo ini anua i nuu ya ma.

² Kovaa saña chi vala‑nka‑ni nkuu, te kendeka sa nuu ja u'vi ma, te skenaa sa maa sa nkuu.

³ Vaa kuechi ja nde'ya sa ja ñayii ka sa'a ja u'vi ma, te ka ni'i ka tna'a i ma, te ka sa'a vixi i maa i ma.

⁴ Te nde'ya sa ja másu nawa ka ndo'o ka tna'a i ma, te ka iyo sii ini i, te ka iyo ndee ka iyo ndatnu i ma.

⁵ Te masu nde ka satniñu xeen i sukan ka kuu‑ka sava ñayii ka satniñu xeen ma, te ni masu nde ka ndo'o ka neni i sukan ka ndo'o ka neni‑ka sava ñayii ma.

⁶ Te chukan kúu ja ka jani ini i ja jayiñu'u xeen kúu ja ka sa'a i ma te ja vii xen‑xeen kúu ja ka sa'a ndeva'a i in‑ka ñayii ma.

⁷ Te onde nduchinuu i ma ndijin ja nanimaa ja u'vi ka ñu'u ini i ja jin sa'a i ma, vaa ûni kua'a xeen ja u'vi ka ñu'u ini i ma.

⁸ Ka jakundee i ñayii ma, te ka ka'an u'vi i ja jin kuu ñayii ma, te onde nuu ñayii ma, te ka jiña'a i naxe ka jani ini i ma. Te ka sa'a ndeva'a i ñayii nda'vi ma, te ka jani ini i ja maa i‑ni ka kuu‑ka.

⁹ Te ka ka'an u'vi i ja kuu Su'si ma, iya iyo onde andivi ma, te ka kunuu maa ja ka ka'an i ma nuu ñayii ma.

¹⁰ Te chukan kúu ja ndaka ñayii ma ka kandija ja ka ka'an ñayii ka sa'a ja u'vi ma, te ka jan koo i ka jan tu'va‑ka i ñayii yukan, vaa ka jani ini i ja va'a xeen‑ni kúu ja ka sa'a ñayii yukan ma.

¹¹ Te ka ka'an i: “Másu kuni Su'si ma ndaka ja ka sa'a o a. Iya iyo onde sukan ma ni masu ndasa'a maa ya kuenda”, ka kuu i ka ka'an i.

¹² Jin konde'ya ni, te jin kuni ni ja ñayii ka sa'a ja u'vi ma, ja masu nde ka ndo'o ka neni i, te ve jin kuxiku xen‑xeen i.

¹³ Te nú sukan, masu nde jiniñu'u ja ni‑in ja u'vi ñatuu nde sa'a sa a, jani ini sa, te masu nde jiniñu'u ja jito va'a sa maa sa ja ñatuu na ja u'vi ko sa'a sa ji'in nda'a sa a, jani ini sa.

¹⁴ Te saña chi nii nduu ma ka xndo'o ka xneni ña'a ñayii ma, te nú ni ndatuu ni ndandii sa in‑ka kii ma, in‑ka tuku jichi ka xndo'o ka xneni ña'a i.

¹⁵ Kovaa ñatuu ni wa'a sa tnu'u ja kani ini sa sukan ka jani ini i ma te ka'an sa sukan ka ka'an i ma chi nute ni sa'a sa sukan ma chi ja kuechi sa ma, te ma jin kaka ndaa ñayii ñuu ni ma, vi Su'si.

¹⁶ Kovaa nuu ni ndakani, ni ndaka'vi ini sa ma, te ni ndasa'a sa kuenda ja yii xeen kúu ja jaku'ni ini o ja maa in‑ni o ma.

¹⁷ Nú masu ja onde ni kivi sa ve'e ii Su'si ma, te yukan, sana ni jaku'ni ini sa na ndenu jin kenda koo ñayii ka sa'a ja u'vi ma, visi ka ni'i ka tna'a maa i ñuu ñayivi a.

¹⁸ Vaa ja ndaa kúu ja sukan ka sa'a ka kuu maa i ma, te ni sunkani ni i nuu ndi'vi xen‑xeen ma, te maa ni sa'a ja jin kendeka ja'a i ma, te jin skenaa i maa i ma.

¹⁹ Te sanaa sanaa‑ni, te jin kûu i, te ndaka maa ja u'vi ka sa'a ka kuu i ma sa'a ja jin ndayu'u xen‑xeen i.

²⁰ Kivi kenda ja ndokuiñi ni ma, vi Su'si chi sukan‑ni kúu in ja jani o ora kixi o ma ja nú ni ndoto o ma sani te ni ndunaa o ma, sukan‑ni jin ko kuu ñayii yukan nuu ni. Vaa visi ka jani ini i ja maa i ka kuu‑ka kovaa maa ni chi su'va saxiko ni i.

²¹ Saña chi ni yo kuxii, ni yo kunda'vi ini sa, te ûni ni yo tna‑u'vi ini anua sa a ja nde'ya sa ja sukan ka kuu i ma.

²² Vaa ûni ni ñatuu ni kuu jaku'ni‑ni ini sa ma, te sukan kúu in kiti, sukan kúu sa nuu ni ma nkuu, vi Su'si.

²³ Visi ndaka sukan ni yo sa'a, ni yo kuu sa ma, kovaa masu nde ni xndoo ña'a ni, vi Su'si, su'va ni yo tnii ni nda'a kua'a sa a.

²⁴ Te ni ka'an, ni kachi ni nuu sa naxe ko sa'a ko kuu sa ma te sukan ndikin ña'a sa sa'a sa a. Te nuna jinu ma, te ndakuan‑ta'vi ña'a ni nuu iyo ni a, te koo jayiñu'u sa, vi Su'si.

²⁵ Ñatuu na in‑ka Su'si sa iyo onde andivi a, nú masu ja maa in‑ni ni, vi Su'si, te nú iyo sa ji'in maa ni, masu nawa nde‑u'vi ini sa ja iyo ñuu ñayivi a.

²⁶ Visi na kuita maa yikikuñu sa a ji'in ini anua sa a, kovaa maa ni ndachindee ndachituu ini anua sa a, vi Su'si, vaa maa ni iyo ja koo ji'in sa ni‑kani ni‑jika.

²⁷ Ñayii ka kujika nuu ni ma, jin skenaa i maa i, vaa maa ni chi xnaa ni ndaka ñayii ñatuu ka kuni ja jin kondikin ndaa ña'a i maa ni ma, vi Su'si.

²⁸ Kovaa saña chi ja va'a xeen kúu ja koo yatni sa nuu Su'si Iya Tátnuni ma, te kúkanu ini sa ya, vaa suu ya ndetu sa ja chindee ña'a ya, sukan‑va'a ndaka'an ndakachi sa nuu ñayii ma ndaka ja va'a ja sa'a ja kúu ya ma.