Salmos 71 - New Testament Psalms and Proverbs in Mixtec Magdalena Peñasco

Salmo 71 Sukan jikan‑ta'vi in tee nija'nu nuu Su'si ma

¹ Nuu maa ni kúkanu ini sa ja kaku sa, vi Su'si. Te má kua'a ni tnu'u ja tná'a sa ja kan‑nuu.

² Ja maa tnu'u ndaa tnu'u ndija ni a, te koniniso'o ni ja ká'an sa ya, te chindee ña'a ni ja kaku sa nuu ja u'vi ma.

³ Te ko kuu ni in nuu toto nuu ndimaa kuu kenda sa te koxtnee va'a sa te kaku sa nuu ñayii ka sa'a ja u'vi ma, vaa nuu maa ni kúu nuu kuu chu'u sa te kaku sa ma.

⁴ Su'si maa sa, chindee ña'a ni ja na kaku sa nuu ñayii ka sa'a ja u'vi ma te ka ja'ni tna'a i ma.

⁵ Vaa onde nuu jaa sa ma kúkanu ini ña'a sa ja maa ni kúu iya sa'a ja koo va'a sa.

⁶ Te onde nuu ñunee sa chii si'i sa ma, maa ni ni yo jito‑va'a ña'a, te maa ni ni sa'a ja ni kâku va'a sa ma. Te chukan kúu ja ni‑kani ni‑jika ndachiñu'u ña'a sa.

⁷ Visi kua'a ñayii chi ka jatnu'u ini ña'a i, kovaa saña chi nuu maa in‑ni ni kúkanu ini sa ja na chindee ña'a ni, te kaku sa nuu ja u'vi ma.

⁸ Te nii nduu ma ndaka'an ndakachi sa sukan sa'a sukan kúu ni ma. Kata sa, te ndachiñu'u ña'a sa ndaka ora.

⁹ Te nuna kuu nija'nu sa ma, te máko saxiko ña'a ni te ko xndoo ña'a ni kivi ma kundee‑ka sa nde a sa'a sa ma.

¹⁰ Ñayii ñatuu ka kunimani nuu sa ma, ka ndatna'a i, te ka ndatnu'u i ja jin ka'ni ña'a i.

¹¹ Te ka ka'an i: “Su'si ma chi jâ ni skendoo ya tee ya'a, te jín sondikin o de, te jín tnii o de, vaa masu na in tasa'an‑ka de”, ka kuu i ka ka'an i.

¹² Te chukan kúu ja máko kújika ni nuu iyo sa ya, vi Su'si maa sa, su'va koo ñama ni ja kii ni ki chindee ña'a ni.

¹³ Te sa'a maa ni ja na jin skenaa maa ñayii ka kuni i ja saña jin ka'ni i ma, te jín ndatna'a ndaka maa i ja kan‑nuu, vaa ka kuni i ja jin sa'a ndeva'a ña'a i.

¹⁴ Kovaa saña chi ndimaa kondetu ña'a sa te ndachiñu'u ndachiñu'u‑ka ña'a sa.

¹⁵ Te ndaka ora ndaka'an ndakachi sa tnu'u ndaa tnu'u ndija ni a nuu ñayii ma, ja sukan ni sa'a ni ja ni ka kaku sa nuu ja u'vi ma, te ni masu kuu ndaka'an sa ndaka ja ni sa'a ni ma, vaa kua'a xeen kúu.

¹⁶ Su'si Iya Tátnuni, ndaka'an ndakachi sa nuu ñayii ma ndaka milagru ni sa'a, ni kuu ni ma, te ndaka'an sa sukan ká'an tnu'u ndaa tnu'u ndija ni kaxtnu'u maa ni a.

¹⁷ Su'si maa sa, maa ni ni kaxtnu'u nuu sa tnu'u ndaa tnu'u ndija ni a onde nuu jaa sa ma, te ndimaa ndákaxtnu'u sa nuu ñayii ma ndaka ja vii ja va'a sa'a ni a.

¹⁸ Visi jâ ni kuu nija'nu sa te jâ ni vixi xini sa a, kovaa máko skendoo ña'a ni, vi Su'si, onde nú ni kuu ni ka'an, ni kachi sa tnu'u ndee tnu'u ndatnu ni a nuu ñayii ka iyo vitna a, ji'in nuu ñayii ñatuu jin kâku‑ka ma.

¹⁹ Kua'a xeen kúu ja sa'a ja kúu ni a, te tnu'u ndaa tnu'u ndija ni a ka'nu xen‑xeen sukan ka'nu andivi ma. Te ñatuu na in kúu sa'a sukan sa'a maa ni a, vi Su'si.

²⁰ Te visi ni wa'a ni tnu'u ja ni ndo'o ni neni sa te ni jini sa tnu'u xii ini ma, kovaa maa ni chindee ña'a ja koteku sa ni‑kani ni‑jika, te visi jâ yinee sa chii ñu'ú ma, te maa ni ndatava ña'a nuu nee ma, sukan‑va'a koo sa ji'in ni.

²¹ Te ndataa ni kua'a xeen jayiñu'u, te ndaka'an mani ña'a ni.

²² Te chukan kúu ja maa sa chi tee sa guitarra ma, te kata sa ja ndachiñu'u ña'a sa maa ni, vi Su'si, vaa maa ni kúu Su'si iya ii ñuu Israel ma.

²³ Te sii ini xeen jita sa nuu maa ni a, vaa maa ni ni sa'a ja ni kaku anua sa ya nuu ja u'vi ma.

²⁴ Te nii nduu ma ndaka'an ndakachi sa tnu'u ndaa tnu'u ndija ni a, vaa ni sa'a ni ja ni ka ndatna'a maa ñayii ñatuu ka kunimani nuu sa ma ja kan‑nuu, vaa ni ka jini i ja masu na kuechi sa ma.