Salmos 69 - New Testament Psalms and Proverbs in Mixtec Magdalena Peñasco

Salmo 69 Sukan ndanduku o Su'si ma ora ndó'o néni o ma

¹ Su'si, sa'a ni ja kaku sa, vaa ñunee sa nuu ndó'o néni sa ya,

² vaa kuenda tnu'u ja in nuu ñu'u tnaa kuan kêe ja'a sa ya, te ñatuu nde jakituu i, te kuenda tnu'u ja jâ ni kenda sa onde ka'a ndute ma, te ñú'u ña'a de.

³ Te ni kuita‑nka sa ja kána ña'a sa, te sukun sa ya chi ni kuu tikaña‑nka i, te nduchinuu sa ya chi ni ka kuita‑nka i, ja ndetu ña'a sa ja kii ni ki chindee ña'a ni, vi Su'si.

⁴ Vaa kua'a xeen‑ka ñayii ka saxiko ña'a ma ka kuu sana ixi xini sa ya, te masu na kuechi sa. Te ka iyo‑ka tnu'u ndee tnu'u ndatnu ñayii ñatuu ka kunimani nuu sa ma, te ka jani ini i ja jin xnaa ña'a i, kuenda tnu'u ja nawa tavi sa nuu i.

⁵ Su'si, maa ni chi jini ni sukan ni yo kaa so'o sa nuu ni ma, vaa ñatuu ni yo kandija sa ja ká'an ni ma, te ndaka kuechi sa ma, másu kuu jin koo yu'u i, vaa ndaka jini ni.

⁶ Má kua'a ni tnu'u ja ñayii ka kukanu ini ña'a i maa ni ma, te jin ko tna'a i ja kan‑nuu ja kuechi sa, vi Su'si Iya Tátnuni. Vaa maa ni neva'a tnu'u ndee tnu'u ndatnu ja tátnuni ni. Te masu ja kuechi sa ma, te ñayii ni‑yu'u ni‑ini i ndánduku ña'a i maa ni ma, te máko jin kani uu jin kani uni ini ñayii yukan ja nú ndija ja suu ni kúu Su'si ñuu Israel ma, xi ña'a.

⁷ Vaa saña chi kuechi ja kútoo ña'a sa ma, te ndó'o néni sa ja ka ka'an ndeva'a i nuu sa a, te vitna ja masu na kuechi sa, te ka sa'a ña'a i sukan, kovaa kánda sa.

⁸ Te kuenda tnu'u ja másu ñayii ñuu ya'a kúu sa nuu ñani sa ma, te sa'ya si'i sa ma, kuenda tnu'u ja ni masu ka jini ña'a i.

⁹ Vaa ni kukueñu xeen sa ve'e ni ma, vi Su'si, te chukan kúu ja siki saña ni ka kenda koo ndaka ja ka ka'an ndeva'a i nuu ni ma.

¹⁰ Te ora kuxii xen‑xeen ini sa te nda'yu sa te ndó'o néni sa ya, sani te ka ka'an ndeva'a i ja kuu sa, vaa ndánduku ña'a sa maa ni, vi Su'si.

¹¹ Te ni ndinuu sa sa'ma tindayi ma, te ni ka jakundee ña'a ñayii ma.

¹² Te ñayii ka nukoo nuu kívi o ini ñuu ma, ka ka'an i tnu'u sa, te ñayii ka ndajini ma, ka jita i yaa ja kuu sa ja ka jakundee ña'a i.

¹³ Kovaa saña chi jikan‑ta'vi sa nuu ni, vi Su'si. Te kivi kúni maa ni ja chindee ña'a ni ma, te kua'a xeen ja taa ni, vaa kúnda'vi ini ña'a ni, vaa ndija ni ja ká'an ni ja chindee ña'a ni te kaku sa nuu ja u'vi ma, te vitna, te koniniso'o ni ja ká'an sa ya, vi Su'si.

¹⁴ Ndatava ña'a ni nuu nde'yu ka'va a, sukan‑va'a máko kêe‑ka sa ki'in sa onde ka'a ndute ma. Chindee ña'a ni, te kaku sa nuu ñayii ka saxiko ña'a ma.

¹⁵ Máko kua'a ni tnu'u ja ñu'u ña'a ndute kua'a jika ma, sukan‑va'a máko kêe‑ka sa nuu kávanuu tna'a de ma, te kêe‑ka sa onde nuu ñu'u kunu‑ka de ma, te masu kuu nana‑ka sa ma.

¹⁶ Ndakone'e ni ja jikan‑ta'vi sa nuu ni a, vi Su'si, vaa iya va'a ini kúu ni. Te kunda'vi ini ña'a ni, sukan kútoo ña'a ni a, te konde'ya ña'a ni ja sukan ndó'o néni sa ya.

¹⁷ Máko chu'u ni, sukan‑va'a kuni ni ndenu iyo sa ja jinukuechi sa nuu ni a. Konuu ni, te kii ni ki chindee ña'a ni vaa ndó'o néni sa.

¹⁸ Ki tu'va ni ini anua sa ya, te chindee ni ini anua sa ya, sukan‑va'a kaku sa nuu ñayii ñatuu ka kunimani nuu sa ma.

¹⁹ Maa ni jini sukan ka ka'an ndeva'a i nuu sa ma te ka sa'a i ja tná'a sa ja kan‑nuu, te ni ñatuu jini sa naxe sa'a sa. Kovaa maa ni chi nde'ya ni ndaka ñayii ñatuu ka kunimani nuu sa ma.

²⁰ Sukan ka ka'an ndeva'a i ma, te ni tna‑u'vi ini anua sa ya, te ni kuita kuiti sa. Te ñatuu‑ka na tnu'u kanu ini iyo ini anua sa ya, te ni yo ndetu sa na in chindee ña'a, kovaa ñatuu na in ni kenda ja chindee ña'a i, te ni‑in ñayii ndaka'an mani ña'a i, ñatuu nde ni kenda i.

²¹ Su'va ja uwa ni ka taa i ja ni jaa sa, te nuu yichi sa ma, su'va ni ka taa i ndute nde'ya uva ja ni jiya ja ko'o sa.

²² Te ne'un viko ka sa'a i ma, ja ka jani ini i ja va'a xeen kúu ma, te na jin ndani'i jin ndatna'a maa i ja u'vi ka sa'a ka kuu i ma.

²³ Sa'a ni ja jin ndunee nduchinuu i ma, sukan‑va'a máko jin kuni‑ka i, te sa'a ni ja jin ni'i jin ndeyu yata i ma, sukan‑va'a ñatuu‑ka na tnu'u ndee tnu'u ndatnu i jin koo.

²⁴ Te xndo'o xneni ni i, sukan‑va'a jín kuni i ja ndákiti xen‑xeen ini ni nuu i.

²⁵ Sa'a ni ja ve'e ka'nu ve'e va'a ka yinee i ma másu na in koo‑ka, te kéndoo nda'vi kéndoo kee nuu ka iyo i ma.

²⁶ Vaa ni ka sondikin i ñayii ni wa'a ni tnu'u ja ni tnakue'e i ma, te ka ndakani i sukan ndó'o néni ñayii ni tnakue'e ma.

²⁷ Sa'a ni ja ndaka ja u'vi ka sa'a maa i ma, te jín ndani'i jín ndatna'a maa i, te máko sakanu ini ni kuechi ka sa'a i ma.

²⁸ Te xnaa ni nuu yoxtnee ja ka nani ñayii ka sa'a ja u'vi ma nuu libru ni a, vaa nuu libru yukan chi nanimaa ja ka nani ñayii ka sa'a ja va'a ja ndaa ma te jin koteku i ni‑kani ni‑jika ma ka yoxtnee.

²⁹ Kovaa saña tee nda'vi ja ndó'o néni sa ya, ko koto va'a ña'a ni, sukan‑va'a kaku sa nuu ja u'vi ma te koo va'a sa.

³⁰ Kata sa, te ndachiñu'u ña'a sa, vi Su'si, te ndaka'an ndakachi sa ndaka ja vii ja va'a sa'a ni a.

³¹ Te ja sa'a sa sukan ma, jatna ini‑ka ni sana ja ka'mi ndi'i kuiti sa in xndiki xi in serru nuu ni a, vi Su'si.

³² Nuna jin kuni ñayii ka ndo'o ka neni ma ja sukan sa'a ni ja kuu sa a chi jin ndusii ini i, te jin ndatnii i tnu'u kanu ini, vaa ka ndanduku i maa ni, vi Su'si.

³³ Vaa Iya Tátnuni ma chi niniso'o ya ja ka jikan‑ta'vi ñayii ka kunda'vi ka kukee ma, te ñatuu na nde saxiko ya ñayii ka ndo'o ka neni ma.

³⁴ Ndaka ja ka iyo andivi ma, ji'in ndaka ja ka iyo nuu ñu'ú ya, ji'in ndaka ja ka iyo nuu mar ma, na jin ndachiñu'u ña'a i maa ni, vi Su'si.

³⁵ Vaa maa ni sa'a ja jin kaku ñayii ñuu Sion ma, te ndasava'a ni ñayii ñuu Judá ma, te yukan jin nduta'vi i ja jin koo i.

³⁶ Ndaka sa'ya tata ñayii ka jinukuechi nuu ya ma chi jin nduta'vi i ñuu yukan, ji'in ndaka ñayii ka kutoo Iya Tátnuni ma, yukan jin koo i ji'in ya.