Salmos 68 - New Testament Psalms and Proverbs in Mixtec Magdalena Peñasco

Salmo 68 Maa Su'si ma kúu iya ni kenda nuu ñayii Israel ma nuu yuku nani Sinaí ma

¹ Ndokuiñi ni, vi Su'si, te jín kunu maa ñayii ñatuu ka kunimani nuu ni a jín koo i, te jín kuitenuu ya'a jín kuitenuu yukan maa i, vaa ka saxiko ña'a i.

² Te xnaa ni i sukan kúu ñu'ma ma, xi sukan ndándute xe'en ma nuu ñu'u ma, sukan xnaa ni ndaka ñayii ka sa'a ja u'vi ja ñatuu ka kunimani i nuu ni ma, vi Su'si.

³ Kovaa ñayii ka sa'a ja va'a ja ndaa ma chi jin kandava jin kandita i ja ka iyo sii ini i nuu ni, vi Su'si.

⁴ Jin kata ni nuu Su'si ma. Jin kata ni salmo nuu ya, in yaa ja ká'an vivii ja kuu ya ma, te jin ndachiñu'u ni ya, vaa siki viko ma yoxtnee ya, te kua'an vee ya kúu ya andivi ma. Jin koo sii ini ni nuu ya, vaa suu ya kúu iya tátnuni nuu ndaka o.

⁵ Vaa suu ya kúu yuva suchi kuechi ja ñatuu‑ka na yuva na si'i i ma, te suu ya kúu iya jasi ndee jasi ndoso ña'a ñatuu‑ka na yii ma, te maa ya kúu Su'si onde nuu ii iyo ya ma.

⁶ Te maa ya sa'a ja ñayii ni ka ndoo nda'vi ma, jin ni'i i in ve'e nuu jin koo i, te kuenda tnu'u ja ve'e maa i kúu. Te ñayii ka ndo'o ka neni ma, sa'a ya ja jin ndusii ini i te jin koo va'a i. Kovaa ñayii ka sa'a so'o xeen ma chi nuu jin koo i ma ko kuu in nuu ñu'ú yichi, nuu ñatuu kuiti nawa iyo ma.

⁷ Saa vi, Su'si, nuu ni kee ni ja koxtnuu ni nuu ñayii ñuu ni ma te ni skaka ni i ichi nuu ñatuu kuiti nawa iyo ma,

⁸ te ni tnaa nuu ñu'ú a, te andivi ma ni ndanune, te ni kuun savi, te suni ni tnaa yuku nani Sinaí ma, vaa yukan iyo ni, vi Su'si, ja kúu ni Su'si ñuu Israel ma.

⁹ Te ni sa'a ni ja ni kuun xeen savi, te ni ndakua'a ni tnu'u kanu ini in in ñayii ñuu ni ma, ja kuenda maa ni ka kuu i.

¹⁰ Te ndaka i ni ndasunkoo ni nuu ñu'ú ni ka nduta'vi i ma. Vaa ni kunda'vi ini ni i, te sukan ndí ini ni naxe jin koo va'a ñayii nda'vi ma.

¹¹ Te Iya Tátnuni ma, ni kaxtnu'u tnu'u jin ka'an ña'a ma, te jaku ña'a kuan koo ka kaxtnu'u ña tnu'u vii tnu'u va'a ni ka jini ña ma.

¹² Te sa'a ka ka'an ña: “Ni ka jinu tee ka kuu rey ma, ji'in ndaka soldado de ma”, ka kuu ña ka ka'an ña. Te jaku‑ka ña'a ñatuu ni ka ke koo ja jin kaxtnu'u ña ma, ni ka ndaka'nde ña ndaka ja ni ka xndoo rey ma te ni ka jinu de ma.

¹³ Vaa ndijin chi sukan ka kuu tichiyo‑nka ma ka kuu ni nuu ni ka iyo ni ne'un ñayii yukan ma, te vitna, te ni ka nduu ni sukan kúu plata ma, xi tnumi sata ma ja kaa sukan kaa oro vivii ma.

¹⁴ Kovaa kivi ni jatenuu Su'si o iya kúu sa'a ndaka ma ndaka tee ka kuu rey ma, te kuenda tnu'u ja ni kuun yu'va ja ni kuvijin xeen ma, sukan ni kendoo yuku Salmón ma.

¹⁵ Yuku Su'si kúu yuku sukun sukun iyo ñuu Basán ma.

¹⁶ Ndaka yuku sukun‑ka ma, ka nde'ya i, te ka kukueñu ini i nuu yuku ni kaji maa Su'si ma ja koo ya ma. Kovaa yukan koo Iya Tátnuni ma ni‑kani ni‑jika.

¹⁷ Su'si ma chi neva'a ya kua'a xen‑xeen carreta nuu ki koo suchi ka jinukuechi nuu ya ma ja jin kanaa i ma. Te onde nuu yuku Sinaí ma iyo Iya Tátnuni ma, te kuan no'o ya ini veñu'u ii ya ma.

¹⁸ Ni kaa ni onde sukun ma, te ni chinee va'a ni ja u'vi ni ka yo tatnuni nuu ñayii ma. Te ni skuta'vi ni in in ñayii ma ja vii ja va'a, te onde ñayii inuso'o xeen ka ndaa ma, ni ka ndakunitnuni i ja maa ni kúu Su'si, te ni ka jan‑ta'vi ña'a i ja koo ni ji'in i ma, vi Su'si.

¹⁹ Ja vii ja va'a kúu Iya Tátnuni ma Su'si iya sa'a ja jin kaku o nuu ja u'vi ma, vaa ndi‑kivi ndi‑kivi chíndee ña'a ya ja ka ya'a o nuu tnundo'o tnuneni ma.

²⁰ Su'si o ma, Su'si o Iya Tátnuni ma kúu iya sa'a ja jin kaku o nuu ja u'vi ma, te suni maa ya sa'a ja masu jin skenaa o maa o ma.

²¹ Ja ndaa kúu ja kueñu ndoso ya xini suchi ñatuu kunimani nuu ya ma, ji'in ndaka ñayii ñatuu ka xndoo ichi u'vi ma, te ka jiso kuechi ka jiso kuechi‑ni i ma.

²² Sa'a ni ka'an Iya Tátnuni ma: “Visi onde ñuu Basán ma xi onde ka'a ndute mar ma ka iyo ni, kovaa sa'a sa ja jin ndakokuiñi ni.

²³ Te sa'a sa ja jin kaka ni nuu ka jika niñi ñayii ñatuu ka kunimani nuu ni ma, te jin ko'o la‑ina ni ma niñi ñayii yukan”, kúu ya ká'an ya.

²⁴ Te ja jin kuni ñayii ma sukan kua'an ni ini veñu'u ii ni ma, te jin ndachiñu'u ña'a i, vaa maa ni kúu Rey, vi Su'si.

²⁵ Te ka yoxtnuu tee ka jita ma, te ka ndandikin tee ka tee yaa ma, te me'ñu ma kuan koo suchi si'i suchi jaa ma, ka skixin i pandero i ma.

²⁶ Ndaka ni ja ka ndatna'a ni ma, jin ka'an ni ja vii ja va'a, te jin ndachiñu'u ni Su'si Iya Tátnuni ma, ndaka ni ja ka kuu ni sa'ya tata Israel ma.

²⁷ Te yoxtnuu Benjamín ma, ja kúu i suchi jaa‑ka ma, te ka ndikin‑ka ña'a ndaka tee ka tatnuni ñuu Judá ma, ji'in tee ka tatnuni ñuu Zabulón ma, ji'in tee ka tatnuni ñuu Neftalí ma.

²⁸ Su'si maa sa, sukan ni sa'a ni ji'in tnu'u ndee tnu'u ndatnu ni a ja jin kuu sa ma, te káxtnu'u ni, sukan‑va'a jín kona'a sa ja sukan sa'a ni.

²⁹ Kuechi ja iyo veñu'u ii ni ma ñuu Jerusalén ma, te ki koo rey ma, jin ndataa de ja vii ja va'a nuu ni, vi Su'si.

³⁰ Ndonda ni nuu ñayii ka ndatna'a ja jin kanaa i ma, vaa ka sa'a ndeva'a i ñayii nda'vi ma. Te sukan ka kuu xndiki xeen ma ji'in xndiki kiti ndoo ma, sukan ka kuu i. Sa'a ni ja jin kuitenuu ñayii ka jatna ini ja ndimaa jin kanaa jin kanaa‑ni i ka kuni i ma, te sa'a ni ja na jin ndakunitnuni i ja maa ni, te ka neva'a i xu'un plata ma, te na jin ndataa i nuu ni.

³¹ Sani te ki koo tee ka ndanuu xeen ka iyo ñuu Egipto ma, ji'in ñuu Etiopía ma, ja jin ndanduku de Su'si ma.

³² Ndaka ni ja ka tatnuni ni ndaka ñuu ma, jin kata ni nuu Su'si ma, jin ndachiñu'u ni Iya Tátnuni ma.

³³ Vaa suu ya kua'an vee andivi ma kúu ya, te maa ya kúu Su'si iya iyo onde xinañu'u ma, te maa ya kúu iya ká'an vitna ji'in tnu'u ndee tnu'u ndatnu ya ma.

³⁴ Jin ndakunitnuni ni sukan iyo tnu'u ndee tnu'u ndatnu Su'si ma sukan tátnuni ya siki ñuu Israel ma. Te tnu'u ndee tnu'u ndatnu ya ma chi onde andivi ma iyo.

³⁵ Su'si, maa in‑ni ni kúu iya ka'nu xen‑xeen, te masu na in‑ka kundee nuu ni a, te iyo ni onde ini veñu'u ii ni a, te maa ni kúu Su'si ñayii ñuu Israel ya, te maa ni wa'a tnu'u ndee tnu'u ndatnu ja kuu ñuu maa ni a, sukan‑va'a jin koyu'u ña'a ndaka ñayii ñuu ñayivi a, vaa iya sa'a ndaa sa'a ndija kúu ni. Chukan kúu ja jayiñu'u kóo nuu Su'si o a.