Salmos 66 - New Testament Psalms and Proverbs in Mixtec Magdalena Peñasco

Salmo 66 Jayiñu'u kóo nuu Su'si ma vaa vivii ka kuu ja ni sa'a ya ji'in tnu'u ndee tnu'u ndatnu ya ma

¹ Ndaka o ja ka iyo o ni‑ka'nu ñuu ñayivi a, jín kata sii ini o nuu Su'si ma.

² Jín kata sii ini o nuu Su'si ma, te jín ndaka'an jín ndakachi o ndaka ja sa'a ya ma, te jín ndachiñu'u o ya.

³ Jín kuña'a o nuu Su'si ma sa'a: “Ndaka ja sa'a ja kúu ni ma chi vii xen‑xeen ka na'a. Vaa maa ni kúu ja iyo kua'a tnu'u ndee tnu'u ndatnu, te chukan kúu ja ndaka ñayii ñatuu ka kunimani nuu ni ma chi visi ñatuu ka kuni i, kovaa jin kandija i ja ká'an ni ma.

⁴ Te ñayii ka iyo ni‑ka'nu ñuu ñayivi a chi jin kata i nuu ni, te jin ndachiñu'u ña'a i maa ni, vi Su'si.” Sa'a jin kuña'a o nuu Su'si ma.

⁵ Ne'e koo ni, te jin kuni ni sukan sa'a sukan kúu Su'si o a ja jin kuu o, vaa masu nama uun kuiti sa'a ya in ja vii ja va'a ja ni ka jini o vitna a.

⁶ Vaa ni june ya nuu mar ma, te nuu ka jika i kuan koo i ma chi ni nduu ñu'ú yichi kuiti. Te ja sukan ni sa'a ya ma, te ka kusii ini xeen o nuu ya.

⁷ Te ji'in tnu'u ndee tnu'u ndatnu ya ma, tátnuni ya ni‑kani ni‑jika, te nde'ya vava'a ya ni‑ka'nu ñuu ñayivi a, sukan‑va'a ndaka ñayii ñatuu ka kandija ja ká'an ya ma, te máko jin ndokuiñi i te ko jin ka'an i ja maa i ka kuu‑ka.

⁸ Ndaka ni ja ka kuu ni ñayii ñuu Su'si o ma, jin ka'an ni ja vii ja va'a ja kuu ya, sukan‑va'a jín kuniso'o ñayii ma sukan ka jita ni ja ka ndachiñu'u ni ya ma.

⁹ Vaa maa ya ni sa'a ja ni ka kaku o nuu ja u'vi ma, te maa ya jito va'a ña'a, nasa yukan, te jin ndakakayata o te jin ndaskenaa o maa o.

¹⁰ Te maa ni, vi Su'si, kúu iya ni jitotnuni ña'a naxe ka iyo sa nuu ni a. Sukan, te ni ndasavii, ni ndasandoo ña'a ni sukan ndúu nanimaa plata ma.

¹¹ Ni sa'a ni ja ni ka jakun‑nee sa nuu tnundo'o tnuneni ma, te ni ka kuvee i siki sa ma nkuu.

¹² Te ni sa'a ni ja kuenda tnu'u ja ni ka jiñu ña'a caballu ka yoso tee ma xini sa a. Te ni ka ya'a sa nuu ñu'u i'ni ma, ji'in nuu ndute ma. Kovaa sani te ni ndatava ña'a ni, te kua'a xeen ja vii ja va'a ni ndataa ni.

¹³ Kenda sa ini veñu'u ni ma, te ka'mi sa kiti ndataa sa nuu ni ma, te sa'a sa ja ni skuiso sa ja sa'a sa nuu ni ma,

¹⁴ sukan ni ka'an, ni kachi sa ja sa'a sa nuu ni ma nuu iyo sa nuu tnundo'o tnuneni ma.

¹⁵ Te ka'mi sa ndikachi ma ji'in xndiki ma ji'in ndixi'yu kiti vava'a‑ka ma nuu ni, te xiko asi asi ma kenda nuu iyo ni ma, ja ndakuan‑ta'vi sa nuu ni, vaa sukan játna ini ni, vi Su'si.

¹⁶ Ndaka ni ja ka kandija ni ja ká'an Su'si ma, ne'e koo ni, te jin koniniso'o ni ja ndáka'an ndákachi sa a sukan ni sa'a Su'si ma ja kuu sa.

¹⁷ Ni ndakune'e sa Su'si ma, te ni‑yu'u ni‑ini sa ni jita sa ja ndáchiñu'u sa ya ma.

¹⁸ Nute ni jatanuu sa te konde'ya sa ja u'vi ma te ko sa'a sa ma chi masu kuniso'o Su'si Iya Tátnuni ma ja jikan‑ta'vi sa nuu ya ma nkuu.

¹⁹ Kovaa Su'si ma chi ja ndaa ndija kúu ja ni jiniso'o ya ja jikan‑ta'vi xen‑xeen sa ma, te ni jatanuu ya ja ni jiña'a sa ma.

²⁰ Ja vii ja va'a kúu Su'si ma, vaa masu ni saxiko ya ja ni jikan‑ta'vi sa nuu ya ma, vaa ni kunda'vi ini ña'a ya, te ñatuu ni saxiko ña'a ya.