Salmos 6 - New Testament Psalms and Proverbs in Mixtec Magdalena Peñasco

Salmo 6 Sukan kakan‑ta'vi o nuu Su'si ma ja na kunda'vi ini ña'a ya ora kénda in tnundo'o tnuneni nuu o ma

¹ Iya Tátnuni, máko ndonda tna ni nuu sa ora ndákiti ini ni ma, te máko xndo'o xneni ña'a ni ora ndákiti xeen ini ni ma.

² Kunda'vi ini ña'a ni saña, vi Iya Tátnuni, te ndasava'a ña'a ni, vaa onde yikikuñu sa a ni kuita kuiti kuenda tnu'u ja kûu sa kúni sa.

³ Te ní'i ní'i‑nka sa, vaa yu'u sa. Te ndijin Iya Tátnuni, ¿na kivi sana kii ni ja chindee ña'a ni?

⁴ Ne'e ni, vi Iya Tátnuni, te ndasava'a ña'a ni, te kaku sa ja ma kûu sa te skenaa sa maa sa, vaa jâ ni skuiso ni ja kúnda'vi ini ña'a ni.

⁵ Vaa ñayii jâ ni ji'i ma chi masu kuu ndachiñu'u‑ka ña'a i, vaa nú onde andeya ma ñunee i ma, te masu kuu ndaka'an‑ka ña'a i.

⁶ Vaa jâ ni kuita sa ja tnána u'vi sa a. Ndaka jakuaa ma nda'yu nda'yu sa, te ni ndoyo kuiti‑nka nuu kátuu sa ma, sa'a ndute nuu sa a.

⁷ Te ni kuita nduchinuu sa ya, te ñatuu ka kundijin‑ka, kuechi ja nda'yu nda'yu sa ma ja kuechi ja ka sa'a ndeva'a ña'a ñayii ñatuu nde ka kunimani nuu sa ma.

⁸ Ndaka ni ja ka sa'a ni ja u'vi a, kuán jin ndiyo ni. Máko jin koo‑ka ni nuu iyo sa ya, vaa Iya Tátnuni ma chi ni jiniso'o ya ja nda'yu sa a.

⁹ Te Iya Tátnuni ma chi ni jiniso'o ya ja jikan‑ta'vi sa ma, te ni jan‑ta'vi ya ja jiña'a sa ma.

¹⁰ Ndaka ñayii ñatuu ka kunimani nuu sa ma, jin ndanda'yu xen‑xeen maa i, te sanaa sanaa‑ni, te jin ndatna'a maa i ja kan‑nuu ma, te jin ndakakayata i jin koo i.