Salmos 57 - New Testament Psalms and Proverbs in Mixtec Magdalena Peñasco

Salmo 57 Sukan kakan‑ta'vi o nuu Su'si ma ja na chindee ña'a ya ja na kaku o nuu ñayii ka sondikin ña'a ma

¹ Su'si maa sa, kunda'vi ini xeen ña'a ni saña, vaa ni‑yu'u ni‑ini sa kúkanu ini ña'a sa, vaa kúkanu ini ña'a sa ja maa ni kasi ña'a te kaku sa, sukan ka kuu chili ma chii ndijin si'i ti ma onde ndi'i kuiti tnundo'o tnuneni ma jin ya'a.

² Ni‑yu'u ni‑ini sa kakan‑ta'vi sa nuu Su'si iya iyo onde sukun ma, vaa suu ya kúu iya chíndee ña'a.

³ Vaa onde andivi ma iyo ya, te sa'a ya ja kaku sa nuu ñayii ka saxiko ña'a te ka sondikin ña'a i ma. Vaa maa Su'si ma chi kútoo ña'a ya, te kúnda'vi ini xeen ña'a ya, te jini ndaa jini ndija ya nawa sa'a sa.

⁴ Vaa kuenda tnu'u ja ne'un ndika'a ma iyo sa, vaa ni ka ndakonduu ña'a ñayii a. Te kuenda tnu'u ja ñu'u i'ni ka kuu tnu'u ka ka'an i ma, te kuenda tnu'u ja lanza xi flecha ka kuu nu'u i ma, te yaa i ma kuenda tnu'u ja yuchi nduva nduva nuu i ma kúu.

⁵ Kovaa maa ni, vi Su'si, ni‑ka'nu andivi a na koo jayiñu'u ni, te ni‑ka'nu ñuu ñayivi a na jin ndachiñu'u ña'a i, vi Su'si Iya Tátnuni.

⁶ Te ni ka skuili i yo'o ichi kua'an sa ma, ja ni ka jani ini i ja jin ke'en‑su'va ña'a i, te ni kuxii xeen ini anua sa ya. Te ni ka jate i yavi ichi kua'an sa ma xi ma kêe sa nkuu, ka kuni i. Kovaa maa i ni ka ndê koo ini yavi ni ka sa'a i ma.

⁷ Saña chi iyo tu'va ini anua sa ya, vi Su'si. Iyo tu'va sa ja kata sa te ndachiñu'u ña'a sa.

⁸ Ora ndákoo sa xtnee ne'e ma te tee sa guitarra sa ma ji'in arpa sa ma. Te ni‑yu'u ni‑ini sa ndachiñu'u ña'a sa, vi Su'si.

⁹ Visi onde ne'un ñayii ñuu ñayivi ya iyo sa ya, kovaa saña chi kata sa nuu ni a, te ndachiñu'u ña'a sa, vi Su'si Iya Tátnuni.

¹⁰ Vaa tnu'u nda'vi ini ni a chi ka'nu xen‑xeen sukan ka'nu andivi a, te tnu'u ndaa tnu'u ndija ni a sukan tna ka'nu.

¹¹ Vaa maa ni, vi Su'si, ni‑ka'nu andivi a na koo jayiñu'u ni, te ni‑ka'nu ñuu ñayivi a na jin ndachiñu'u ña'a i, vi Su'si Iya Tátnuni.