Salmos 56 - New Testament Psalms and Proverbs in Mixtec Magdalena Peñasco

Salmo 56 Sukan jikan‑ta'vi o nuu Su'si ma ja kúkanu ini o ya ma

¹ Kunda'vi ini ña'a ni saña, vi Su'si, vaa ka sondikin ña'a ñayii ñatuu ka kunimani nuu sa a, ja jin sa'a ndeva'a ña'a i. Te ndi‑kivi ndi‑kivi ka kuni i ja jin kanaa i ji'in sa.

² Te nii nduu ma ka sa'a ndeva'a ña'a i, vaa kua'a xeen i ka kuni ja jin kanaa i ji'in sa, te ka savixi i maa i ja maa i ka kuu‑ka.

³ Te kivi yu'u sa ma chi nuu maa ni kúkanu ini sa.

⁴ Saña chi kúkanu ini xeen sa Su'si Iya Tátnuni ma, vaa ja vii ja va'a kúu tnu'u tátnuni ya a jini sa, te ni masu koyu'u sa, vaa masu nawa kuu sa'a ña'a ñayii ma.

⁵ Ndaka kivi ka ka'an ndeva'a i nuu sa, te ndaka i chi ndimaa ja u'vi ka jani ini i ja jin sa'a ña'a i.

⁶ Te ka ndututu i in nuu ka chu'u i, te ka nde'ya vava'a ña'a i ndenu kua'an ndenu vee sa ma, vaa ka jito yu'u ña'a i, vaa jin ka'ni ña'a i ka kuni i.

⁷ Su'si, kivi kenda ja ndakiti ini ni nuu ndaka ñayii ka sa'a ja u'vi ma, te ndakan maa ni kuenda nuu ñayii ka kuni u'vi nuu sa ma, te jín ndatna'a maa i ja kan‑nuu, ja ka iyo i ñuu yukan.

⁸ Te maa ni chi jini ni sukan ndó'o néni sa a te kúxii xeen ini sa a te nda'yu nda'yu sa ya, te kuiti ndaka jâ ni sotnuni ni nuu libru neva'a ni a.

⁹ Te nuna kakan‑ta'vi sa nuu ni a ja chindee ña'a ni a chi ndaka ñayii ñatuu ka kunimani nuu sa ma, jin ndakakayata i jin koo i. Vaa jini sa ja iyo ni ji'in sa, vi Su'si.

¹⁰ Saña chi kúkanu ini xeen sa Su'si Iya Tátnuni ma, vaa jini sa ja ja vii ja va'a kúu tnu'u tátnuni ya a.

¹¹ Te nuu maa in‑ni Su'si ma kúkanu ini sa, te ni masu koyu'u sa, vaa masu nawa kuu sa'a ña'a ñayii ma.

¹² Su'si maa sa, ko sa'a sa ndaka ja ni skuiso sa nuu ni a. Kata sii ini sa nuu ni, te ndachiñu'u ña'a sa.

¹³ Vaa ni sa'a ni ja ni kaku anua sa ya, te ñatuu ni skenaa sa maa sa. Te ni ndakani va'a ña'a ni nuu koo va'a sa a, sukan‑va'a koo sa nuu iyo ni a te koteku sa sukan ka teku ñayii ka iyo nuu xtnuu maa ni ñu'u ni ma.