Salmos 55 - New Testament Psalms and Proverbs in Mixtec Magdalena Peñasco

Salmo 55 Sukan kakan‑ta'vi o nuu Su'si ma ja na chindee ña'a ya te kaku o nuu ñayii ka kuni ja jin ke'en su'va ña'a i ma

¹ Su'si maa sa, koniniso'o ni ja jikan‑ta'vi sa nuu ni a, te katanuu ni ja ká'an káchi sa nuu ni a.

² Chindee ña'a ni ja ká'an sa a, vaa maa ni chi jini ni sukan ndó'o néni sa a, te ñatuu ni'i ini‑ka sa nawa sa'a sa. Chukan kúu ja jikan‑ta'vi jikan‑ta'vi sa nuu ni a,

³ ja kuechi ja ni jiniso'o sa ja ka ka'an ñayii ñatuu ka kunimani nuu sa ma. Te kúxii ini sa, vaa ka ka'an u'vi i ja kuu sa, te ûni ka kiti ini i, te ka sondikin ña'a i.

⁴ Te ini anua sa ya, tna‑u'vi xeen ini i, te yu'u xeen sa kuenda tnu'u ja kûu sa.

⁵ Te ni'i ni'i‑nka sa ja yu'u xen‑xeen sa, te ñatuu ní'i ini‑ka sa nawa sa'a sa.

⁶ Te jani ini sa, “Nute iyo ndijin o sukan iyo ndijin sata ma chi ndava o, te kuu ndatatu o.

⁷ Nute kuu sukan chi ndava ndava‑ni o te ki'in jika jika o, te koo o onde nuu ñatuu na in kuiti iyo ma.

⁸ Nute kuu sukan chi konuu xeen o ki'in o onde nuu kaku o ma, sukan‑va'a kaku o nuu tnundo'o tnuneni iyo nuu o a.” Sukan jani ini sa.

⁹ Su'si maa sa, xnaa ni ja ka jani ini ñayii ñatuu ka kunimani nuu sa ma, te xsama ni sa'an ka ka'an in in i ma, sukan‑va'a máko jin jaku'ni ini nuu tna'a‑ka i. Vaa jini sa ja ndaka ñayii ka iyo ini ñuu a chi ndimaa ka kanaa i, te ka sa'a tna i ja u'vi.

¹⁰ Te nduu ñuu ka ndakonduu maa i ni‑ka'nu yika ve'e ndesi ini ñuu ma, ja ka sa'a i nanimaa ja u'vi ma.

¹¹ Te nanimaa ja u'vi iyo nuu ka iyo i ma, te nanimaa ja ka xnda'vi tna'a i ma kúu nuu ka ndatna'a i ma.

¹² Nute in ñayii ñatuu kúnimani nuu sa ma, te ni ka'an ndeva'a i nuu sa a chi kanda sa ndaka ja ká'an i ma. Xi nute in ñayii saxiko ña'a ma, te kúni i ja sa'a ndeva'a ña'a i chi kuu chu'u sa, te ma kuni‑ka ña'a i.

¹³ Kovaa saa ndijin ja ka ketna'a xeen ini o a, ja kuenda tnu'u ja ndi‑tna'a ñani o a, te ni yo ndakani ichi ña'a ni ja na kaka va'a sa ma.

¹⁴ Te nduu kua'an nduu vee o kuan koo o ne'un ñayii ma ka ndachiñu'u o Su'si ma. Te vivii ni ka yo ndatnu'u o vaa ni ka yo ketna'a xeen ini o ma, te vitna, te ñatuu kúnimani‑ka ni nuu sa.

¹⁵ Kovaa ndaka maa ñayii ñatuu ka kunimani nuu sa ma, jin kê koo teku maa i nuu andeya ma, vaa ndimaa ja u'vi ka ñu'u ini i ja jin sa'a i.

¹⁶ Kovaa saña chi nuu Su'si ma kakan‑ta'vi sa, te maa Iya Tátnuni ma sa'a ja kaku sa nuu ja u'vi ma.

¹⁷ Te ora ne'e ma, ora sava nduu ma, ji'in ora ve ñini ma kakan‑ta'vi kakan‑ta'vi sa nuu ya, te maa ya chi kuniso'o ya.

¹⁸ Te ndene'e ña'a ya nuu tnundo'o tnuneni tna'a sa ma, te sii ini xeen koo ini anua sa ya, visi kua'a xeen maa i ka iyo ja jin kanaa i ji'in sa ma.

¹⁹ Su'si iya iyo onde xinañu'u ma chi kuniso'o ya ja ká'an sa ya, te maa ya sa'a ja jin ndando'o jin ndaneni ñayii ñatuu ka xndoo ja u'vi ka sa'a i ma, te ni masu ka yu'u i Su'si ma.

²⁰ Vaa ñayii sa'a nanimaa ja u'vi ma chi onde nuu ñayii ka iyo mani ji'in i ma ni ndakuni u'vi i, te ñatuu ni sa'a i sukan ni skuiso i ja jin koo mani i ma.

²¹ Te ndaka tnu'u ká'an i ma chi vita vita‑ni ká'an i kuenda tnu'u ja xe'en ma. Kovaa ini anua i ma chi ûni kanaa i kúni i. Te vivii ká'an i kuenda tnu'u ja xe'en ni ndandute ma. Kovaa ndaka ja ká'an i ma chi kuenda tnu'u ja in yuchi jâ ni kana nuu ñunee i ma kúu ndaka tnu'u ká'an i ma.

²² Sonee ni ndaka tnundo'o tnuneni ni a nuu nda'a Iya Tátnuni ma, te maa ya chindee ña'a ja koo va'a ni nuu ya. Vaa ñayii sa'a ja va'a ja ndaa nuu ya ma chi ni masu kua'a kuiti ya tnu'u ja ko ndo'o ko neni i.

²³ Chukan kúu ja saña chi nuu maa in‑ni ni kukanu ini sa, vi Su'si. Kovaa maa ni, vi Su'si, chi skee ni ndaka ñayii ka sa'a ja u'vi ma yavi nuu jin koo i ja jin skenaa i maa i ma. Ndaka ñayii inundee xeen ini ma ji'in ñayii ka xnda'vi tna'a ma, másu kenda koo i sukan iyo ja jin koteku i ma chi xi'na‑ka jin kûu i.