Salmos 52 - New Testament Psalms and Proverbs in Mixtec Magdalena Peñasco

Salmo 52 Ñayii kuvixi ja sa'a i ja u'vi ma chi ndachunaa maa i nuu Su'si ma

¹ Tee kanuu xeen, ¿nava'a kúvixi xeen ni, ja ndimaa ja u'vi ma sa'a ni? Te vitna ja Su'si ma ja kúu sa'a ya ndaka ma chi su'va ndimaa kúnda'vi ini ya ñayii ma.

² Te ndijin chi nanimaa tnu'u ndeva'a ká'an ni, te nanimaa tnu'u xnda'vi tna'a ká'an ni. Te kuenda tnu'u ja in yuchi xen‑xeen ka kuu tnu'u ká'an ni a.

³ Ni kutoo xeen‑ka ni ja u'vi ma sana ja va'a ma. Te ni kutoo‑ka ni tnu'u xnda'vi tna'a ma sana tnu'u ndaa ma.

⁴ Te ni jatna ini‑ka ni ja ka'an ndeva'a ni nuu ñayii ma te sa'a ni ja u'vi ja jin kuu ñayii ma.

⁵ Te chukan kúu ja Su'si ma chi xnaa ña'a ya, te masu koteku‑ka ni, te kene'e ña'a ya nuu iyo ni a, sukan‑va'a ma koo‑ka ni ji'in ñayii ka teku ma.

⁶ Ndaka ni ja ka sa'a ni ja va'a ma, jin konde'ya ni sukan ni kuu tee yukan, te jin koyu'u ni Su'si ma.

⁷ Jin konde'ya ni, te jin kuni ni ja sukan ni ndo'o tee ñatuu ni kukanu ini Su'si o ma ja suu ya sa'a ja kaku de ma te masu skenaa de maa de ma nkuu. Kovaa su'va nuu ja kua'a xen‑xeen ja ni yo ni'i ni yo tna'a de ma ni kukanu ini de, te ni yo jatanuu‑ka de ja u'vi ni yo sa'a de ma, te ni skenaa de maa de.

⁸ Kovaa saña chi iyo va'a sa. Kuenda sukan iyo yutnu kúu tnu olivo ma ja kuikuii iyo tnu ma, sukan iyo sa ve'e Su'si a, te kúkanu ini sa ja Su'si ma, kúnda'vi ini ña'a ya ni‑kani ni‑jika.

⁹ Te ndachiñu'u ña'a sa ni‑kani ni‑jika, ja sukan sa'a maa ni ja kútoo ña'a ni a. Te kondetu ña'a sa nuu ka iyo ndaka ñayii ñatuu‑ka na ja u'vi ka sa'a i ma, vaa va'a xen‑xeen ini ni, vi Su'si.