Salmos 50 - New Testament Psalms and Proverbs in Mixtec Magdalena Peñasco

Salmo 50 Su'si ma kúu iya ndakan ndaa kuenda nuu ñayii ñuu ñayivi a

¹ Su'si Iya Tátnuni ma kúu Su'si ndija sana ndeva'a‑ni ja ka xnani i su'si i ma. Suu ya kúu iya ni ka'an ni‑ka'nu ñuu ñayivi a. Onde ichi nuu kana kandii ma, onde ichi nuu kee kandii ma, ni ndakana ya ñayii ma ja jin ndututu i.

² Onde ñuu Sion ma ñuu nuu vivii kaa ma xtnuu Su'si ma ñu'u ya ma.

³ Kii Su'si o ma, te masu na'ñi na'ñi‑ni kii ya chi koxtnuu ñu'u i'ni ma kii, te ki'i xen‑xeen tachi ma, te xnaa ñu'u i'ni ma ja iyo ni‑ka'nu ñuu ñayivi a, te îyo xen‑xeen ko kuu.

⁴ Te ndaxtutu ya ndaka ja ka iyo andivi ma, ji'in ndaka ja ka iyo nuu ñu'ú ya, sukan‑va'a jin kuni i naxe ndakan ya kuenda nuu ñayii kúu ñuu ya ma.

⁵ Te sa'a tatnuni Su'si ma nuu i ma: “Jin ndaxtutu ndaka ñayii ni ka ketna'a ini ji'in ri ma ja ñatuu ni ka yo sa'a‑ka i ja u'vi ma te ni ka yo ja'mi i kiti nuu ri ma, te ni ka skuiso i ja jin ko sa'a i sukan kúni ri ma”, kúu ya jiña'a ya.

⁶ Te andivi ma chi sa'a jin ndaka'an i: “Su'si o a chi iya ndákan ndaa kuenda kúu ya te ndandaa‑ni ja'nde ya tniñu ñayii ma”, jin ndaka'an i.

⁷ Kovaa ká'an ya: “Ñuu maa sa, jin koniniso'o ni ja ká'an sa a. Ndijin ja ka kuu ni ñuu Israel a, jin koniniso'o ni, te ndáka'an ndákachi sa ja jin kuu maa ni. Maa sa kúu Su'si ni, te jin kukanu ini ña'a ni.

⁸ Te ni masu ndakiti ini sa nuu ni kuechi ja ndimaa ka ja'mi ni kiti a nuu sa a, kovaa masu ka ndasa'a ni kuenda.

⁹ Vaa masu nde jiniñu'u sa xndiki jaa ka iyo ve'e ni a, xi ndixi'yu ka neva'a ni a ja jin ndataa ni ti.

¹⁰ Vaa kuenda maa sa ka kuu ndaka kiti ka iyo ni‑ka'nu yuku ma.

¹¹ Te jini sa ndaka lasaa ka ndava onde yuku ma, ji'in ndaka kiti ka iyo nuu ñu'ú a, vaa kuenda maa sa ka kuu ndaka ti.

¹² Nute kokon sa chi masu nuu ni kakan sa, chi vaa kuenda maa sa kúu ni‑ka'nu ñuu ñayivi a, ji'in ndaka ja ka iyo a.

¹³ ¿Xi ka jani ini ni ja kuñu xndiki ma jaa sa, xi ko'o sa niñi ndixi'yu ma ja ka ndataa ni ma? Ña'a.

¹⁴ Su'va ja jin ndataa ni nuu sa ma kúu ja jin ndaka'an jin ndakachi ni sukan sa'a sukan kúu sa ma, te jin ndachiñu'u ña'a ni ja kúu sa Su'si iya iyo onde sukun ma, te jin sa'a ni sukan ni ka skuiso ni ja jin sa'a ni nuu sa ma.

¹⁵ Te jin ndakune'e ña'a ni kivi kénda tnundo'o tnuneni nuu ni ma te ñatuu ka ni'i ini‑ka ni nawa jin sa'a ni ma, te saña chi chindee ña'a sa ja vivii jin yanduu jin yandoso ni nuu tnundo'o yukan ma, sani te maa ni chi jin ndachiñu'u ña'a ni”, kúu ya ká'an ya.

¹⁶ Kovaa ñayii sa'a ja u'vi ma chi kuña'a Su'si ma: “¿Nava'a ndáka'an ni ja jini ni tnu'u ni tatnuni sa ma, te ndáka'an ni sukan ni skuiso sa ma, kovaa maa ni chi ni masu sa'a ni sukan tátnuni sa ma?

¹⁷ Vaa ndijin chi su'va ndákiti ini ni nuu ñayii ndáka'an‑so'o nuu ni sukan kúni sa ja ko kuu ni ma, te ja sukan sa'a ni a chi saxiko ni tnu'u tátnuni sa a.

¹⁸ Te nú jini ni ñayii sakui'na ma chi jinu ni kua'an ni sakui'na ni ji'in i, te suni kétna'a ini ni ji'in ñayii ka kivi nduu ji'in in‑ka ñayii masu ni tnanda'a ji'in i ma.

¹⁹ Vaa játna ini xeen ni ja ka'an ni tnu'u ndeva'a ma, te yaa ni a, vivii jakin tna'a i tnu'u xnda'vi tna'a ma.

²⁰ Ndimaa jínkoo ñukuun ni, te ká'an ni tnu'u ñani ni ma, te ndimaa ká'an u'vi ni ja kuu sa'ya si'i ni ma.

²¹ Ndaka cha'a ni yo sa'a ni, te saña chi ni jasiyu'u sa. Te jani ini ni ja saña, te kúu sa sukan kúu ni a. Ña'a. Vaa saña chi sa'a sa ja ndakuni ni ndaka ja u'vi ni yo sa'a ni yo kuu ni ma.

²² ’Te vitna, te jin jaku'ni ini ni tnu'u ká'an sa ya, ndaka ni nde ni ka ndunaa ña'a ja saña kúu Su'si ni ma, nasa yukan, te sakuechi salikin ña'a sa, te masu na in tasa'an ña'a ja jin kaku ni.

²³ Chukan kúu ja nú na in jita nuu sa ma te ndáchiñu'u ña'a i, te suni ndákani ndáka'vi ini i te jika ndaa i ichi ni kaxtnu'u sa ma te ñatuu na ja u'vi sa'a‑ka i, chi sa'a sa ja kaku i nuu ja u'vi ma.” Sa'a ká'an Su'si ma.