Salmos 49 - New Testament Psalms and Proverbs in Mixtec Magdalena Peñasco

Salmo 49 Masu va'a ja ndiyo ini o ja koneva'a kua'a o xu'un ma

¹ Ndaka ni ja ka iyo ni ni‑ka'nu ñuu ñayivi a, jin koniniso'o ni ja ka'an sa ya.

² Ka kuu ni ñayii ka netniñu, ka kuu ni ñayii ñatuu ka netniñu, ka kuu ni ñayii nda'vi, ka kuu ni ñayii xiku, ndaka ni, jin koniniso'o ni ja ká'an sa ya.

³ Vaa ndimaa tnu'u ndichi ka'an sa, te ndimaa ja ndákani ichi tna'a o ma jani ini sa.

⁴ Koniniso'o ñukuun sa tnu'u ndichi ka ka'an i ma, te ndaka'an sa tna'a ja yii ja jáku'ni ini o ma, nani tée sa arpa ma.

⁵ Vaa maa ni iyo ji'in sa, vi Su'si, te ¿nava'a koyu'u sa kivi kenda ja u'vi ma, te jin ndakonduu ña'a ñayii ñatuu ka kunimani nuu sa ma ja jin sa'a ña'a i ja u'vi ma?

⁶ Vaa maa i chi ka kukanu ini i ndaka ja ka neva'a i ma, te ka kuvixi i ja kua'a xeen ja ka neva'a i ma.

⁷ Kovaa ni‑in i, masu kundee chuya'vi i, te kaku in ñani i ma xi in tna'a i ma, vaa ni a kaku maa i masu kundee i chuya'vi i.

⁸ Te ni a in ñayii masu kundee chuya'vi i ja kaku in‑ka ñayii ma, vaa ni a ndaka xu'un iyo ñuu ñayivi a masu kanda ja chuya'vi o ja kaku in‑ka ñayii

⁹ te koteku i ni‑kani ni‑jika te ma skenaa i maa i ma.

¹⁰ Vaa onde ñayii inundichi ma chi jin kûu tna i, te inuu kuiti jin skenaa i maa i ji'in ñayii inuso'o ka ndaa ma te ñatuu ka jaku'ni kuiti ini i sukan kúni Su'si ma. Te ndaka ja ka neva'a i ma in‑ka ñayii ndunda'a.

¹¹ Te ñayii ya'a chi ja ka ñu'u xeen ini i kúu ja ve'e i ma chi ni‑kani ni‑jika jin koo va'a te ndi‑in ndi‑in sa'ya tata i ma jin nduta'vi i ve'e ma, te visi ka ka'an i ja kuenda maa i ka kuu ñu'ú i ma,

¹² kovaa masu ka ndasa'a i kuenda ja jayiñu'u ñayii ma chi másu koo ni‑kani ni‑jika, vaa sani te jin kûu i sukan ka ji'i kiti ma.

¹³ Te ja sukan ka ñu'u ini i ma chi masu ichi va'a kuan koo i, vaa ka kuneé ka ku‑uun‑ni i, te ndaka ja ka sa'a ka kuu i ma chi ka jatna ini sa'ya tata i ma.

¹⁴ Te sukan ka kuu ndikachi ma ja iyo ñayii skaka ña'a nuu jin koo ti ja jin kûu ti ma, sukan kuan koo i ja jin skenaa i maa i ma, vaa maa ja u'vi ma tátnuni nuu i ma. Te ndaka ñayii ka sa'a ja va'a ja ndaa ma chi xtnee ne'e ma‑ni, te jin kundee i nuu ñayii ka sa'a ja u'vi ma. Sani te ñayii yukan, te jin skenaa i tnu'u ndee tnu'u ndatnu i ma ji'in ja vivii ka ndaa i ma, te nuu jin koo i ni‑kani ni‑jika ma ko kuu andeya ma kuechi ja u'vi ni ka yo sa'a i ma.

¹⁵ Kovaa saña chi maa Su'si ma sa'a ja kaku sa nuu andeya ma, vaa maa ya ndakueka ña'a.

¹⁶ Máko ko ndi ini ni nú ve kuxiku in‑ka ñayii ma te ve kukua'a‑ka jayiñu'u i ji'in ñayii ka iyo ve'e i ma.

¹⁷ Vaa kivi jin kûu i ma, másu nawa jin koo ji'in i, te ni a jayiñu'u i ma másu ki'in ji'in i.

¹⁸ Vaa visi nani ka téku i ma, te ka jani ini i: “Ja vava'a kúu yo'o, vaa iyo jayiñu'u o ja kúndee o ní'i tna'a‑ka o ma”, ka jani ini i,

¹⁹ kovaa suni jin koo tna i nuu nee ka iyo ndaka tna'a i ñayii jâ ni ka skenaa i maa i ma, te ni masu jin kuni‑ka i nuu vivii xtnuu Su'si ma ñu'u ya ma.

²⁰ Ñayii iyo xeen jayiñu'u i ma te másu nde ndása'a i kuenda ma, sukan kúu kiti ja sani te kûu ti ma, sukan‑ni kúu i.