Salmos 48 - New Testament Psalms and Proverbs in Mixtec Magdalena Peñasco

Salmo 48 Vivii kaa yuku nani Sion ma nuu iyo jayiñu'u Su'si ma

¹ Iya Tátnuni ma kúu iya kanuu xeen, te maa in‑ni ya iyo ja ni‑yu'u ni‑ini o jin ndachiñu'u o ya, vaa iyo ya ne'un ñayii ñuu ya ma, ja ka iyo i nuu yuku ii ya ma.

² Te nuu iyo ya ma vivii kaa, te ka iyo sii ini ñayii ka iyo ni‑ka'nu ñuu ñayivi ya ja ka nde'ya i ñuu ya ma. Te yuku nani Sion ma, ja iyo i ichi ninu ñuu Jerusalén ma, yukan kúu ñuu nuu iyo maa Su'si ma ja kúu ya Rey ma.

³ Te ve'e ka'nu neva'a Su'si ma kúu nuu kuu kaku ñayii ma nuu ja u'vi ma.

⁴ Ni ka ndututu ndaka tee ka netniñu ndi‑in ndi‑in ñuu ma ja ka kuu de rey ma, te ni ka ndatnu'u tna'a de sukan jin kanaa de ji'in ñayii ñuu Jerusalén ma.

⁵ Kovaa nuu ni ka jini de ja îyo kaa yika ve'e ni ndakonduu ndesi ñuu Jerusalén ma, te ni ka sa'vi‑nka ini de, te ni ka yu'u de, te ni ka ndakunu de kuan nu koo de.

⁶ Te ka ndakuiyo ka ndakaa de ja ni ka yu'u xeen de ma. Sukan kúu ña'a u'vi ja kâku lulu ña ma, sukan ka kuu de.

⁷ Te maa ni, vi Su'si, chi kuu sa'a ni ja jaki'i xeen tachi, vaa sukan ni sa'a ni, nuu ni ndakana ni barcu kuan koo ñuu Tarsis ma.

⁸ Sukan ni ka jiniso'o sa ma, te ni ka jini sa, ja ñuu Su'si o Iya Tátnuni ma chi ndasunkani vava'a ya ni‑kani ni‑jika, vaa ñuu maa ya kúu.

⁹ Ora ka iyo sa ini veñu'u ni ma, te ka ndaka'an ka ndakachi sa sukan kúnda'vi ini ña'a ni ma, vi Su'si.

¹⁰ Te ja sukan sa'a ja sukan kúu ni ma, te ni‑ka'nu ñuu ñayivi a ka ndachiñu'u ña'a i, vi Su'si, vaa nuu nda'a kua'a ni a chi ndimaa ja va'a ja ndaa ñu'u.

¹¹ Ndusii ini xeen yuku nani Sion ma, te jin ndusii ini xeen sasi'i ñayii ñuu Judá ma, ja jin kuni i ja sukan ja'nde ndaa ni tniñu ñayii ma, vi Su'si.

¹² Kuán koo ni, te jin ndakonduu ni ñuu Sion ma, te jin ndaka'vi ni na saa ve'e sukun ka iyo ma.

¹³ Te ûni jin konde'ya ñukuun kuiti ni ni‑ka'nu yika ve'e ñuu ma, ji'in ve'e kanuu nuu yinee rey ma, sukan‑va'a jin ndakani ni nuu sa'ya tata ni kenda koo‑ka ma.

¹⁴ Vaa Su'si o ya chi ni‑kani ni‑jika iyo ya, te maa ya kúu iya ko koto ña'a, visi jâ ni ka ji'i o ma.