Salmos 47 - New Testament Psalms and Proverbs in Mixtec Magdalena Peñasco

Salmo 47 Su'si ma kúu Rey iya tátnuni ni‑ka'nu ñuu ñayivi a

¹ Ndaka ni ja ka iyo ni ndaka ñuu ma, jin katu nda'a ni, te jin kayu'u ni, jin kata ni ja ka iyo sii ini ni, te sukan jin ndachiñu'u ni Su'si o ma.

² Vaa Su'si iya iyo onde sukun ma kúu Iya Tátnuni, te jín koyu'u o ya, te máko jin sa'a o ni a in ja ñatuu nde játna ini ya ma, vaa maa ya chi kúndee ya nde'ya ya ni‑ka'nu ñuu ñayivi ya.

³ Te maa ya sa'a ja kuu jin tatnuni o nuu ndaka ñuu na'nu ñuu kuechi ka iyo ni‑ka'nu ñuu ñayivi a, te jin kandija i ja jin ka'an o ma.

⁴ Te maa ya ni kaji in ñu'ú vava'a ko kuu ta'vi o, te ni kusii ini xeen Jacob ma ja ni kuta'vi de ñu'u yukan, vaa Su'si ma chi ni yo kutoo xen‑xeen ya de.

⁵ Te ka kayu'u i ja ka iyo sii ini i, te ka tivi i trompeta ma, te ni ndaa Su'si Iya Tátnuni ma nuu núkoo ya ma.

⁶ Jín kata o nuu Su'si ma, vaa maa ya kúu Rey tátnuni nuu o a, te chukan kúu ja jín kata o, te jín ndachiñu'u o ya.

⁷ Te ni‑yu'u ni‑ini o jín kata o yaa játna ini maa ya ma, vaa maa ya kúu rey iya tátnuni ni‑ka'nu ñuu ñayivi ya.

⁸ Te onde nuu ii nuu núkoo ya ma, te tátnuni ya ni‑ka'nu ñuu ñayivi ya.

⁹ Ndaka tee ka netniñu in in ñuu ma, ni jan koo de ni jan nu tu'va de sa'ya tata tee ni yo nani Abraham ma, ja ka kuu de ñuu Su'si o ma.

¹⁰ Vaa maa Su'si ma tátnuni nuu ndaka tee ka tatnuni ndaka ñuu ma te nuu maa in‑ni ya iyo xeen jayiñu'u.