Salmos 46 - New Testament Psalms and Proverbs in Mixtec Magdalena Peñasco

Salmo 46 Su'si ma kúu iya taa tnu'u ndee tnu'u ndatnu te kaku o nuu tnundo'o tnuneni ma

¹ Su'si ma kúu iya chíndee chítuu ña'a nuu tnundo'o tnuneni ma. Suu ya kúu iya chíndee kunu ña'a ora kénda koo tnundo'o tnuneni ma, te ka sa'a i ja kúxii ini o ma.

² Te chukan kúu ja máko jin koyu'u o, visi na ndatnana maa ñu'ú a, te visi na jin kê koo yuku ma onde ka'a ndute mar ma,

³ te visi kúu yu'u maa ndute mar ma, ja kuá'an vee nuu de ma kúu, te visi ka kanda ka kanda‑nka maa yuku ma, ja ka ndakani ndee tna'a nuu ndute ma.

⁴ Kovaa onde ñuu nuu iyo maa Su'si ma, nuu ñatuu na ja u'vi iyo ma, te iyo in yute ja sa'a ja jin koo sii ini ñayii kúu ñuu maa ya ma.

⁵ Te sasava ini ñuu ma iyo ya, te nú ve tuu ve ndii ma, te maa ya chindee chituu ñuu ya ma, te masu kotuu i.

⁶ Te ndaka ñuu ma ka ndakanda, te ndaka tee ka tatnuni in in ñuu ma, ka ni'i ka ni'i‑nka de. Sani te ni ka'an Su'si ma, te ni ndi'i ñu'ú ma ni kuun, te ni naa.

⁷ Kovaa Su'si iya kúu sa'a ndaka ma chi iyo ya ji'in yo'o, te suni maa ya ni yo kuu Su'si tee ni yo kuu Jacob ma, te maa ya kasi ndee kasi ndoso ja masu kaki'i ña'a ni‑in ja u'vi ma.

⁸ Ne'e koo ni, te jin kuni ni ja sukan ni sa'a Iya Tátnuni a, ja ni kendoo nda'vi, ni kendoo kee nuu ñu'ú ya.

⁹ Te maa ya ni sunkani ja ñatuu ka kanaa‑ka ndaka ñuu ka iyo ni‑ka'nu ñuu ñayivi a, te maa ya ni ja'nu ndaka ja ni ka yo jatniñu i ja ni ka yo kanaa i ma, te ni xnaa ya, te ni ja'mi ya carreta ni ka yo jatniñu i ja ni ka yo kanaa i ma.

¹⁰ Te sa'a ká'an ya: “Jin ko nañii kuiti ni, te jin kuni ni ja maa sa kúu Su'si ni, te iyo sa ja chindee chituu ña'a sa nuu tnundo'o tnuneni ma, te maa sa chi jin ndachiñu'u ña'a ndaka ñayii ndaka ñuu ni‑ka'nu ñuu ñayivi a, te jin ndaka'an jin ndakachi i ndaka ja va'a sa'a kúu sa a ja jin kuu i ma”, kúu ya ká'an ya.

¹¹ Vaa Su'si iya kúu sa'a ndaka ma chi iyo ya ji'in yo'o, te suni maa ya ni yo kuu Su'si tee ni yo kuu Jacob ma, te maa ya kasi ndee kasi ndoso ja masu kaki'i ña'a ni‑in ja u'vi ma.