Salmos 44 - New Testament Psalms and Proverbs in Mixtec Magdalena Peñasco

Salmo 44 Sukan ni chindee Su'si ma tna'a o ñayii jana'a ma

¹ Saa vi, Su'si, ni ka jiniso'o maa sa ja ni ka yo ndakani yuva sa tee jana'a ma, sukan ni sa'a, ni kuu ni, ja ni chindee ni de kivi yukan ma.

² Nda'a maa ni, ni kene'e ni ñayii ka iyo ñuu yukan, te ni xndo'o, ni xneni ni i, te ni xnaa ni i. Te ni ndachi'i ni ndaka tna'a sa ma, te ni ka iyo va'a de ñuu yukan.

³ Kovaa ni masu ja ka yinda'a ka yija'a de kuan koo de ja jin kanaa de ma ni sa'a ja ni kuu ni ka ndani'i de ñu'ú nuu ka iyo sa vitna a, nú masu ja maa ni ni sa'a ji'in nda'a ni a. Vaa ni jatna ini ni sukan ka sa'a de ma, te ni kutoo ni de, chukan kúu ja ni wa'a ni ñu'ú nuu ka iyo sa ya.

⁴ Maa ni, vi Su'si, kúu Rey sa, te sa'a ni ja jin kaku sa'ya tata tee kúu Jacob ma.

⁵ Vaa ja maa ni, te jin kundee sa nuu ñayii ñatuu ka kunimani nuu sa ma, te jin sondikin sa i.

⁶ Vaa masu kúkanu ini sa kuji sa ya, ni a yuchi kúu espada yinda'a sa ya, ja jin chindee ña'a i ja kaku sa nuu ñayii ma.

⁷ Vaa maa ni ni yo jito va'a ña'a ja ñatuu ni ka kundee ñayii ñatuu ka kunimani nuu sa ma, te ni sa'a ni ja ni ka ndakukan‑nuu maa ñayii ni ka yo saxiko ña'a ma.

⁸ Te jin koo sii ini xen‑xeen sa, vi Su'si, te jin ndachiñu'u ña'a sa ni‑kani ni‑jika.

⁹ Kovaa vitna, te ni xndoo ña'a ni, te ka tna'a sa ja kan‑nuu, te ñatuu nde kíi ni ja chíndee ña'a ni ora ka kanaa sa ji'in ñayii ñatuu ka kunimani nuu sa ma.

¹⁰ Te sa'a ni ja ka ndakunu sa nuu ñayii yukan ma, te ka sakui'na i nawa ka neva'a sa ma, vaa ñatuu ka kunimani i nuu sa.

¹¹ Te sa'a ña'a ni sukan ka kuu ndikachi ma, ja ka kunda'a ña'a tee ka ja'ni ti ma, te ni jatenuu ña'a ni ni‑ka'nu ñuu ñayivi a.

¹² Te ni xiko ni ndaka ñayii ñuu ni a, te ñatuu nawa ni ni'i ni ja ni xiko ni i ma.

¹³ Te sa'a ni ja ka jakundee ña'a ñayii ka iyo yatni ji'in sa ma, te ka ka'an ndeva'a i ja jin kuu sa, te ka jakundee ña'a ndaka i ja ka nde'ya ña'a i ma.

¹⁴ Te ka ndaka'an ka ndakachi i sukan ka ndo'o ka neni sa ma, te ka jakundee ña'a i, te ka skuiko xini i.

¹⁵ Te saña chi ndaka kivi ndákukan‑nuu sa ja ndáka'án sa ndaka sukan ndó'o tná'a sa ya.

¹⁶ Vaa jiniso'o sa ja ka ka'an ndeva'a ñayii ñatuu ka kunimani nuu sa ma ja kuu sa, te ka ñu'u ini i ja jin ndachunaa i sukan ni ka kundee sa nuu i ma.

¹⁷ Ndaka tnundo'o ya'a ni kenda koo nuu sa ya, kovaa masu nde ka ndunaa ña'a sa, te masu nde ka ndunaa sa sukan ni ka'an ni ja jin kuu sa ma chi ka ñu'u ini sa.

¹⁸ Te ñatuu ka ndakokuiñi ini sa, te ni a jin skendoo sa ichi ni kaxtnu'u ni ja jin kaka sa ma.

¹⁹ Kovaa maa ni, ni xndoo nda'vi ni xndoo kee ña'a ni in nuu kini in nuu nee kuiti.

²⁰ Nute ni ka ndunaa ña'a sa ma, vi Su'si, te jin ndachiñu'u sa tna'a ja masu Su'si ka kuu ma,

²¹ kuiti kunitnuni maa ni nkuu, vaa maa ni chi jini ni nawa jani ini ñayii ma.

²² Kovaa kuechi ja ka jinukuechi sa nuu maa ni a, te chukan kúu ja ka xndo'o ka xneni ña'a ñayii ma, te sukan ka kuu ndikachi ka iyo tu'va ja jin koo ti nuu tee ka'ni ti ma, sukan ka kuu sa.

²³ Su'si maa sa, ndakatanuu ña'a ni, te máko skendoo ña'a ni, te máko kujika ni nuu ka iyo sa ya ni‑kani ni‑jika.

²⁴ ¿Naku ñatuu ndáka'án ña'a ni, te naku ni ndunaa ña'a ni te ka ndo'o ka neni sa ya, ja sukan ka sa'a ndeva'a ña'a ñayii ma?

²⁵ Vaa kua'a xeen ja ka ndo'o ka neni sa, te kuenda tnu'u ja onde nuu ñu'ú‑nka a ka ndatuu sa te ñatuu ka kundee‑ka ini sa.

²⁶ Konuu ni, te ki chindee ña'a ni ja na jin kaku sa nuu ja u'vi a, vaa maa ni chi kútoo ña'a ni, te kúnda'vi ini ña'a ni, vi Su'si.