Salmos 43 - New Testament Psalms and Proverbs in Mixtec Magdalena Peñasco

Salmo 43 Sukan kakan‑ta'vi o nuu Su'si ma ja na chindee ña'a ya te kaku o nuu ñayii ka sa'a ña'a ja u'vi ma

¹ Su'si maa sa, ka'nde ni tniñu sa a ji'in ñayii ka sa'a ndaka ja u'vi ma, te ka xnda'vi tna'a i ma, sukan‑va'a jín kuni i ja másu na kuechi sa.

² Vaa maa ni kúu nuu kuu kaku sa nuu ja u'vi ma. ¿Te nava'a koo jika sa nuu ni a? ¿Te nava'a ko kuxii ini sa ja kuechi ja ka xndo'o ka xneni ña'a ñayii ñatuu ka kunimani nuu sa ma?

³ Tetniñu ni tnu'u ndaa tnu'u ndija ni a nuu iyo sa a, te na xtnuu i nuu sa, te káxtnu'u i ichi ko kaka sa, sukan‑va'a kenda sa onde yuku ii nuu iyo maa ni a.

⁴ Te kivi sa nuu iyo altar ni ma, vi Su'si maa sa, iya táa tnu'u sii ini xen‑xeen, te tee sa arpa ma, te kata sa ja ndáchiñu'u ña'a sa, vi Su'si maa sa.

⁵ Te jani ini sa: ¿Te naku ko kuxii ini o, te ko ndakani ini o? Su'va kúkanu ini o Su'si ma, te ndáchiñu'u o ya, vaa maa ya kúu Su'si o, vaa maa ya sa'a ja kaku o nuu ja u'vi ma.