Salmos 42 - New Testament Psalms and Proverbs in Mixtec Magdalena Peñasco

Salmo 42 LIBRO II Sukan ûni jiniñu'u ini anua o Su'si ma

¹ Sukan kúu yu'u isu ma, ja yichi xen‑xeen ti ma te ndánduku ti in yute ja ko'o ti ndute ma, sukan ndánduku ña'a ini anua sa a maa ni, vi Su'si.

² Ini anua sa a chi sukan kúu sa ora yichi sa ma, sukan jiniñu'u i Su'si iya téku ma. ¿Na kivi sana kuu ki'in sa ja koo sa nuu Su'si ma ini ve'e ya ma?

³ Nduu ñuu ni yo nda'yu, ni yo nda'yu sa, nani ka ka'an ndeva'a i nuu sa ma: “¿Ndenu iyo Su'si ni ma, ja jito ña'a ya?”, ka kuu i ka ka'an i.

⁴ Te núkoo núku'un sa, te ndákani ndáka'vi ini sa, te ndáka'án sa naxe ni yo skaka sa kua'a xeen ñayii ma onde ni ka yo kenda koo sa ini ve'e Su'si ma, te ka kayu'u sa ka jita sa ja ka ndachiñu'u sa Su'si ma, te ûni viko ka'nu xeen ni ka yo sa'a sa.

⁵ Te jani ini sa, ¿te naku ko kuxii ini o, te ko ndakani ini o? Su'va kúkanu ini o Su'si ma, te ndáchiñu'u o ya, vaa maa ya kúu Su'si o, vaa maa ya sa'a ja kaku o nuu ja u'vi ma.

⁶ Su'si maa sa, ûni ndí ini xeen sa, te chukan kúu ja ndeva'a‑ni ndenu iyo sa ma, te ndáka'án ña'a sa, visi onde ñu'ú Jordán ma, xi onde yuku nani Hermón ma, xi onde yuku nani Mizar ma.

⁷ Vaa onde yuu kunu ma ndijin, sukan kúu yu'u ndute kú'nu yute ma, te onde nuu kunu‑ka mar ma ñunee sa, te ni sa'a ni ja ni ya'a ndute ma siki sa a.

⁸ Kovaa nuna tuu na ndii ma, te kunda'vi ini ña'a Iya Tátnuni ma. Te nuna kunee ma, te ndusii ini sa, te kata sa yaa ká'an sukan sa'a sukan kúu ya ma, te kakan‑ta'vi sa nuu Su'si sa ma, iya sa'a ja koteku sa ma.

⁹ Te kuña'a sa nuu Su'si ma: “Maa ni kúu toto nuu koxtnee va'a sa ma. ¿Nava'a ko kani ini sa ja ni ndunaa ña'a ni? ¿Te nava'a ko kuxii ini sa, ja sa'a ña'a ñayii ñatuu kúnimani nuu sa a?” Sa'a kuña'a sa ya.

¹⁰ Kuenda tnu'u ja ka xtnakue'e ñayii ñatuu ka kunimani nuu sa ma onde yiki sa a, ja ka ka'an ndeva'a i nuu sa, vaa sa'a ka ka'an i ndi‑kivi ndi‑kivi: “¿Ndenu iyo Su'si ni ma, ja jito ña'a ya?”, ka kuu i ka ka'an i.

¹¹ Kovaa ni ndachu'un xeen ini sa, te ka'án sa: ¿Te naku ko kuxii ini o, te ko ndakani ini o? Su'va kúkanu ini o Su'si ma, te ndáchiñu'u o ya, vaa maa ya kúu Su'si o, vaa maa ya sa'a ja kaku o nuu ja u'vi ma.