Salmos 41 - New Testament Psalms and Proverbs in Mixtec Magdalena Peñasco

Salmo 41 Sukan kakan‑ta'vi o nuu Su'si ma ja na sakanu ini ña'a ya te ndasava'a ña'a ya kue'e ndó'o o ma

¹ Ja vava'a kúu ñayii kúnda'vi ini ñayii kúnda'vi kúkee ma chi Iya Tátnuni ma chi sa'a ya ja kaku i kivi kenda tnundo'o tnuneni nuu i ma.

² Te ko koto va'a ña'a Iya Tátnuni ma, te sa'a ya ja koteku i te sii ini xeen koo i nuu ñuu ñayivi a, te másu kua'a ya tnu'u ja sa'a ndeva'a ña'a ñayii ñatuu kúnimani nuu i ma.

³ Te Iya Tátnuni ma chi ndakua'a ya tnu'u ndee tnu'u ndatnu kivi u'vi i ja ku'u i ma, te kue'e ndo'o i ma chi sa'a ya ja nduva'a i.

⁴ Vaa saña chi ni jiña'a sa ya: “Iya Tátnuni, kunda'vi ini ña'a ni, te sakanu ini ña'a ni, te ndasava'a ña'a ni, vaa nuu maa ni ni jiso kuechi sa”, kúu sa jiña'a sa ya.

⁵ Te ñayii ka kuni u'vi nuu sa ma chi ka kuni i ja ka'vi‑ka ndo'o neni sa, te ka ndatnu'u i: “¿Na kivi kûu de sukan‑va'a na ya'a‑ni cuentu de?”, ka kuu i ka ka'an i.

⁶ Te nú ve koo i ve koto ña'a i ma, te másu inundija i ja ka ka'an i ma chi ja ka nduku i kúu ja naxe jin ka'an i tnu'u sa. Sani te ka nde koo i ke'e ma, te ka ndaka'an i tnu'u sa nuu in‑ka ñayii ma.

⁷ Te ndaka ñayii ñatuu ka kunimani nuu sa ma, ka ndututu i, te ka ka'an ndeva'a i ja kuu sa, vaa ndimaa ja u'vi ka ñu'u ini i ja ko ndo'o ko tna'a sa, te ka ka'an i:

⁸ “Nuu tachi ma vee kue'e ndó'o kue'e tná'a de ma, te másu ndakoo‑ka de”, ka kuu i ka ka'an i.

⁹ Te onde ñayii kétna'a ini ji'in sa ma, ñayii ni yo kukanu ini sa ma, ñayii ni yo jaa kaa ji'in sa xita ma, ni ndakuni u'vi i nuu sa.

¹⁰ Kovaa maa ni, vi Iya Tátnuni, kunda'vi ini ña'a ni, te ndone'e ña'a ni, te ndakoo sa, te konde'ya sa sukan jin ndo'o tna i ma.

¹¹ Te sukan, te kuni sa ja játna ini ni ja sa'a sa a, te ñatuu ko ka'an ñayii ñatuu kúnimani nuu sa a: “Jâ ni kundee o nuu de.”

¹² Te sukan ni‑yu'u ni‑ini sa kúkanu ini ña'a sa a, te maa ni chindee chituu ña'a, te maa ni sa'a ja koo sa nuu ni a ni‑kani ni‑jika, vi Su'si.

¹³ Ja vii ja va'a kúu Su'si iya tátnuni ñuu Israel ma, te sukan jín ka'an o ni‑kani ni‑jika. Te sukan kó kuu.