Salmos 40 - New Testament Psalms and Proverbs in Mixtec Magdalena Peñasco

Salmo 40 Sukan ndakuan‑ta'vi o nuu Su'si ma ja ni chindee ña'a ya ja ni kaku o nuu tnundo'o tnuneni ma

¹ Ni kaa kuee ini sa, te ni yo ndetu sa ja ni jikan‑ta'vi sa nuu Iya Tátnuni ma. Te maa ya chi ni jakindeyi ñukuun‑ka ya, te ni yo niniso'o ya ja ká'an nda'vi ká'an kee sa nuu ya ma ja kána sa ya ma.

² Te ni ndatava ña'a ya soko nuu ñunee sa ma, nuu ñu'u nde'yu ka'va ma, nuu ñu'u tnaa ma, nuu ñatuu ní'i ini‑ka sa nawa sa'a sa ma. Te ni ndasunkani ña'a ya siki toto ma, te ni ndaskaka ya ja'a sa a ichi va'a ma, sukan‑va'a ma ndêe‑ka tuku sa.

³ Te ni sa'a ya ja ni ndusii ini sa, te ni keja'a sa jita sa in yaa jaa, te ndáchiñu'u sa Su'si o a. Te nuna jin kuni kua'a ñayii ma sukan sa'a sukan kúu sa a, te jin koyu'u i Su'si ma, te masu jin ko sa'a‑ka i ja u'vi ma, te jin kukanu ini tna i Iya Tátnuni a.

⁴ Vava'a kendoo ñayii ni kukanu ini Iya Tátnuni ma te ñatuu nde'ya i ñayii inuso'o ka ndaa ma, ja ka xndoo i ichi Su'si ma te ka ndachiñu'u i ja masu Su'si ka kuu ma.

⁵ Su'si maa sa, Iya Tátnuni, kua'a xeen ja vii ja va'a sa'a ni nuu sa a, ji'in sukan ndí ini xeen ni ja jin kuu sa a. Te ñatuu na in kuu sa'a sukan sa'a ni a. Te ni masu kundee sa ndaka'an ndakachi sa ndaka ja sa'a ja kúu ni, vi Su'si.

⁶ Ja ndataa sa in kiti ma te ka'mi sa ti nuu ni ma, sukan‑va'a naa kuechi sa ma, vi Su'si, masu nde játna ini ni. Te ni a ndataa sa nuu ni ka kuechi ka likin ja kée itu sa ma, sukan‑va'a naa kuechi sa ma. Másu sukan kúni ni ja jin sa'a sa ma. Su'va ni ndakune ni so'o sa a, ja na jaku'ni ini sa tnu'u tátnuni ni ma.

⁷ Te chukan kúu ja ni ka'an sa: “Ya'a iyo sa, vaa sukan ká'an tutu ndee ja kuu sa ma”, ni ka'an sa.

⁸ Te játna ini sa ja sa'a sa sukan kúni maa ni, vi Su'si maa sa, vaa ini anua sa a ñunee tnu'u ni kaxtnu'u ni ma.

⁹ Te maa ni jini, vi Su'si Iya Tátnuni, ja másu nde jasiyu'u sa chi su'va káxtnu'u sa tnu'u vii tnu'u ndaa ni a nuu ka ndatna'a kua'a ñayii ka kandija sukan ká'an tnu'u maa ni a, vi Su'si.

¹⁰ Te másu nde ni chu'u sa tnu'u ndaa tnu'u ndija ni a ini anua sa a, su'va káxtnu'u sa sukan ndija ni ja ká'an ni a, ji'in ja sukan sa'a ni ja jin kaku ñayii ma nuu ja u'vi ma, ji'in sukan nda'vi ini ni ma, ji'in ja sukan kútoo ni ñayii ma. Ndaka ni ka'an sa nuu ka ndatna'a kua'a ñayii ka kandija sukan ká'an maa ni a, vi Su'si, te másu nde ni jasiyu'u sa.

¹¹ Su'si, sukan kúnda'vi ini ña'a ni a, ji'in sukan kútoo ña'a ni a, ji'in sukan ká'an tnu'u ndaa tnu'u ndija ni a, te ko koto va'a ña'a ni ni‑kani ni‑jika.

¹² Vaa kua'a xeen ja u'vi ni ka ndakonduu ña'a, ni masu kundee sa ka'vi sa ndaka. Vaa ndaka ja u'vi ni yo sa'a sa ma ni ka ndenda koo nuu sa a, te ni masu nde kúu ndonenuu‑ka sa. Kua'a xeen‑ka ka kuu sana ixi xini sa a, te ini anua sa a chi ni kuita i.

¹³ Su'si, jikan‑ta'vi xeen sa nuu ni ja chindee ña'a ni. Ne'e kunu ni, kí chindee ña'a ni, vi Su'si Iya Tátnuni.

¹⁴ Ndaka ñayii ka ndanduku ña'a ja jin xnaa ña'a i saña ma, na jin ndakokuiñi i te jín ndakukan‑nuu maa i. Te ndaka ñayii ka kuni ja jin sa'a ña'a i ja u'vi ma, te jín tna'a maa i ja kan‑nuu.

¹⁵ Ndaka ñayii ka jakundee ña'a saña ma, jin ndani'i jin ndatna'a maa i ja kan‑nuu, vaa másu nde ni ka kundee i ja ka ñu'u ini i ma.

¹⁶ Kovaa ndaka ñayii ka ndanduku ña'a ndijin ma, vi Su'si, chi jin koo sii ini xen‑xeen i. Te ndaka ñayii ka kuni ja sa'a ni ja jin kaku i nuu ja u'vi ma, ndimaa jin ka'an i: “Su'si Iya Tátnuni a, iya ka'nu xeen kúu ya”, jin ka'an i.

¹⁷ Te saña ja kúnda'vi kúkee sa te ndó'o néni sa a, máko ndunaa ña'a ni, vi Su'si. Maa ni kúu iya chíndee ña'a, te sa'a ni ja kaku sa nuu ja u'vi ma. Máko ko kukuee ni ja ki chindee ña'a ni, vi Su'si maa sa.