Salmos 4 - New Testament Psalms and Proverbs in Mixtec Magdalena Peñasco

Salmo 4 Sukan kukanu ini o te kakan‑ta'vi o nuu Su'si ma ora kusu o ma

¹ Su'si maa sa, ndakone'e ni ora jikan‑ta'vi sa ma, vaa maa ni chi iya sa'a ndaa sa'a ndija kúu ni. Vaa maa ni ni ndasava'a ña'a nuu kúxii kúnda'vi ini sa ja ku'u sa ma. Te vitna, kunda'vi ini tuku ña'a ni, te koniniso'o ni ja jikan‑ta'vi sa nuu ni a, vi Su'si.

² Te sa'a ká'an ya: “Ndaka ni ja ka kuu ni sa'ya ñayii a, ¿Na saa‑ka kivi jin sa'a ni ja u'vi a, te jin ka'an ndeva'a ñayii ma ja kuu sa? ¿Te na saa‑ka kivi, ma jin ndachiñu'u ña'a ni? ¿Nava'a ka saxiko ña'a ni te ka ndachiñu'u ni tna'a ja masu Su'si ka kuu ma te ka xnda'vi ni maa ni?”, kúu ya ká'an ya.

³ Kovaa jin kona'a ni ja Su'si ma chi játna ini ya ñayii sa'a sukan kúni ya ma te ndí ini i ja ko kuu i ñuu maa ya ma. Te chukan kúu ja saña chi nuna kakan‑ta'vi sa nuu ya ma chi koniniso'o ya ja kuña'a sa ya ma, vaa sa'a sa sukan kúni ya ma.

⁴ Jin koyu'u ni ya, te má jin kua'a ni tnu'u ja jin ndakiti ini ni, nasa yukan, te jin kuiso kuechi ni nuu Su'si ma. Te ora ka ndatuu ni ka ndatatu ni jakuaa ma, te na'ñi na'ñi‑nka iyo ma, te jin ndasa'a ni kuenda, te jin ndakani jin ndaka'vi ini ni nuu Su'si ma.

⁵ Onde sukan jin sa'a ni ma, te ko kuu ja va'a ja ndaa ja jin ndakua'a ni nuu Su'si ma, te jin kukanu ini ni Iya Tátnuni ma.

⁶ Kua'a xeen ñayii ma ka ka'an: “¿Na in iyo ja sa'a i ja va'a ñuu ñayivi a ja jin kuni o?”, ka kuu i ka ka'an i. Iya Tátnuni, sa'a ni ja saña, te jín sa'a sa ja vii ja va'a, sukan‑va'a jin kuni i ja iyo ni, vi Su'si.

⁷ Maa ni sa'a ja iyo sii ini ini anua sa a, te iyo sii ini xeen‑ka sa sana ndaka‑ka ñayii ka ni'i ka tna'a ndaka ja ka neva'a i ma, vi Su'si.

⁸ Te chukan kúu ja sii ini‑ni jínkavatuu sa te sii ini‑ni kixi sa. Vaa maa ni, vi Iya Tátnuni, sa'a ni ja iyo sii ini sa te kúkanu ini ña'a sa, vi Su'si.