Salmos 39 - New Testament Psalms and Proverbs in Mixtec Magdalena Peñasco

Salmo 39 Sukan‑ni kúu o ja vee o ñuu ñayivi ya

¹ Ni jani ini sa: Katanuu o kondikin o ichi Su'si o a, sukan‑va'a ma ka'an o ni‑in ja u'vi ma. Te kasiyu'u vava'a o, sukan‑va'a nú iyo in ñayii ñatuu sa'a sukan játna ini Su'si ma nuu iyo o a, te ñatuu nawa kondekuechi yu'u o a.

² Ni jasiyu'u vava'a sa, te ñatuu ni ka'an sa ni a in tnu'u kini xi tnu'u va'a, te chukan kúu ja su'va ndó'o néni‑ka sa nkuu.

³ Te ûni ndó'o xeen ini anua sa ya, ja ñatuu ni ka'an sa ni‑in tnu'u jani ini sa ma, kovaa ñatuu kúndee‑ka ini sa, te kuiti va'a‑ka ni jiña'a sa ya:

⁴ “Iya Tátnuni, sa'a ni ja jaku'ni ini sa nawa iyo‑ka ja ndo'o neni sa, te nde saa‑ka kivi koteku sa ñuu ñayivi a, te sa'a ni ja jaku'ni ini sa ja másu ni‑kani ni‑jika koo sa ñuu ñayivi ya.

⁵ Vaa jaku‑ni kivi ni taa ni ja koteku sa ñuu ñayivi ya. Te kuiya ni taa ni ja koo sa ñuu ñayivi ya chi vala ñii‑ni kúu nuu maa ni a. Te ja ndaa ndija kúu ja ndaka ñayii ma chi nunuu‑ni kúu ja téku i ñuu ñayivi a.

⁶ Vaa sukan kúu kuanda'vi ma‑ni, sukan‑ni kúu ñayii ma. Te chukan kúu ja másu nde jiniñu'u ja xtutu kua'a xeen i xu'un ja koneva'a i ma, vaa masu nde jini i na in kendoo ji'in ja ni xtutu i ma.

⁷ Te nú sukan, vi Su'si Iya Tátnuni, ¿na nde a kúu ja kondetu sa ñuu ñayivi ya? Te chukan kúu ja va'a‑ka ja nuu maa ni kúkanu ini sa chi koo va'a‑ka sa.

⁸ Te sakanu ini ni ndaka kuechi sa ma, te kaku sa nuu ja u'vi ma, sukan‑va'a máko jin jakundee ña'a ñayii ñatuu ka jaku'ni ini ma.

⁹ ’Ni jasiyu'u sa, te ñatuu ni ka'an sa, vaa sukan ni kuni maa ni, vi Su'si.

¹⁰ Te nuu nda'a maa ni iyo sa, te xndo'o xneni ña'a ni. Kovaa xtandiyo tna ni ja xndo'o xneni ña'a ni a, vaa jâ ni kuita kuiti sa.

¹¹ Vaa ndijin chi xndo'o xneni ni ñayii sa'a ja u'vi ma, sukan‑va'a ndasa'a i kuenda te nukuiñi ndaa i nuu ni. Te ndaka ja neva'a i ma te kútoo xeen i ma chi xnaa ni sukan xnaa tikixin ma nawa ní'i ti ma. Vaa ja ndaa ndija kúu ja ñayii ma chi nunuu‑ni kúu ja koo i ñuu ñayivi a.

¹² ’Iya Tátnuni, koniniso'o ñukuun ni ja jikan‑ta'vi jikan‑ta'vi sa nuu ni a, te máko sa'a ni ja ñatuu jini ni ja ndá'yu sa ya, vaa saña chi ñayii iyo nunuu‑ni kúu sa ñuu ñayivi a, sukan‑ni ni ka yo kuu ndaka tna'a sa ñayii jana'a ma.

¹³ Te má konde'ya‑ka ni kuechi ni yo sa'a sa ma, su'va chindee ña'a ni ja na naa, te ndátnii sa tnu'u ndee tnu'u ndatnu, nasa yukan, te skenaa sa maa sa, vi Su'si”, kuu sa jiña'a sa ya.