Salmos 38 - New Testament Psalms and Proverbs in Mixtec Magdalena Peñasco

Salmo 38 Sukan kakan‑ta'vi o nuu Su'si ma ja na chindee ña'a ya

¹ Iya Tátnuni, máko ndonda ni nuu sa te xndo'o xneni ña'a ni ora ndákiti ini ni ma.

² Vaa flecha ja ni kani ni ji'in nda'a ni ma chi ni jaku'un ña'a i, te jâ ni kenda nda'a ni a siki sa a.

³ Te yikikuñu sa ya chi ñatuu nde iyo sii ini‑ka i, kuechi ja ni ndakiti ini ni nuu sa a, te ñatuu nde ndátatu‑ka yikikuñu sa ya, kuechi ja ni yo sa'a sa ja u'vi ma,

⁴ Te ndaka ja u'vi ni yo sa'a sa ma, ni ka nukoxtnee i siki sa a, te jâ ni kuvee xeen, te masu nde kúndee‑ka ini sa.

⁵ Te kue'e ndó'o sa ya chi kini jáxiko, ja kuechi ja ñatuu nde ni ndasa'a sa kuenda ja ndimaa ja u'vi ni yo sa'a sa ma.

⁶ Te yindeyi nuu sa nde kua'an nde vee sa ma, vaa ndása'a sa kuenda, te kúkan‑nuu sa, te kúxii ini sa nduu ñuu.

⁷ Te ni‑ka'nu yata sa a játu jani'ni, te ñatuu nde iyo sii ini yikikuñu sa ya.

⁸ Te ni kuita nda'a, ni kuita ja'a sa, te tnána u'vi tnána u'vi‑nka sa, vaa ndó'o néni ini anua sa a.

⁹ Su'si maa sa, maa ni chi jini ni ndaka ja kúu ini sa ja taa ni, te maa ni jini nava'a jáka yu'u jáka ini sa ma.

¹⁰ Te ni kuita ini anua sa a ja ndó'o néni sa a, te ñatuu na nde kúndijin va'a‑ka nuu sa ya, vaa ñatuu na tnu'u ndee tnu'u ndatnu‑ka neva'a sa.

¹¹ Te ñayii ka ketna'a ini ji'in sa ma, ji'in tna'a sa ma chi ni ka skendoo ña'a i ja kuechi ja ku'u sa ya, te ñayii ka iyo yatni ji'in sa ma chi ka kujika ka kusu'va‑ni i nuu iyo sa a.

¹² Te ndaka ñayii ka kuni ja jin ka'ni ña'a i ma chi ka nduku i naxe jin tnii ña'a i, te ka ka'an ndeva'a i ja kuu sa, te ndaka ora ka jani ini i naxe jin xnda'vi ña'a i.

¹³ Kovaa saña chi ñatuu nde niniso'o sa ja ka ka'an i ma, kuenda tnu'u ja so'o sa, te sa'a sa tnu'u ja ñatuu nde kúu ka'an sa te ñatuu nde ndákune sa yu'u sa ya.

¹⁴ Kúu sa kuenda tnu'u ja in tee ja ñatuu nde jiniso'o de te ñatuu nde kúu ka'an de, sukan‑va'a ma ndakone'e xiko sa.

¹⁵ Vaa nuu maa in‑ni ni kúkanu ini sa, vi Iya Tátnuni. Su'si maa sa, ndakone'e ni ja jikan‑ta'vi sa nuu ni a.

¹⁶ Te ni jikan‑ta'vi sa nuu ni ma ja ñayii ñatuu ka kunimani nuu sa ma, te máko jin jakundee ña'a i nuna jin kuni ña'a i ja xtaya sa ma te jin ka'an i ja maa i ka kuu‑ka ma.

¹⁷ Kovaa saña chi ndi‑kivi ndi‑kivi ndáka'án sa ja u'vi ni yo sa'a sa ma, te kuenda masu kundee‑ka ini sa.

¹⁸ Te chukan kúu ja ndáka'an ndákachi sa nuu ni ndaka ja u'vi ni yo sa'a sa ma, sukan‑va'a sakanu ini ña'a ni.

¹⁹ Te ñayii ñatuu ka kunimani nuu sa ma te ka saxiko ña'a i ma chi kua'a xeen i kúu, te ka iyo tu'va i ja jin sa'a ndeva'a ña'a i, visi ñatuu nawa sa'a sa i.

²⁰ Kuechi ja kúni sa ja sa'a sa ja va'a ma, te ka ndasa'a ña'a i ja u'vi ma, vaa sukan‑ni ka sa'a maa i.

²¹ Iya Tátnuni, máko skendoo ña'a ni te kujika ni nuu iyo sa ya, vi Su'si maa sa.

²² Konuu ni, te kii ni ki chindee ña'a ni, vi Iya Tátnuni, iya sa'a ja kuu kaku sa nuu ja u'vi ma.