Salmos 34 - New Testament Psalms and Proverbs in Mixtec Magdalena Peñasco

Salmo 34 Ñayii ka iyo va'a nuu Su'si ma chi maa ya jito vava'a ña'a

¹ Ndaka kivi ndimaa ndachiñu'u sa Su'si ma ji'in ndaka ja sa'a ja kúu sa ma, te ndimaa ko kata sa nuu maa ya.

² Ja maa ya, te iyo jayiñu'u xeen ini anua sa a te chukan kúu ja jita sa a, te ja jin kuniso'o ñayii inukuee ini ma, te jin koo sii ini i.

³ Jín ndututu ndaka o, te jín ndachiñu'u o ya, te ja jin ka'an jin kachi o ma kúu ja iya ka'nu xeen kúu ya.

⁴ Ni ndanduku sa Iya Tátnuni ma, te ni jiniso'o ya ja ni jiña'a sa ma, te ni sa'a ya ja ni kaku sa nuu ndaka ja ni yo yu'u sa ma.

⁵ Ndaka ñayii ni ka ndanduku ya ma te maa in‑ni ya ka nde'ya i ma, te ni ka ndundijin nuu i ma, te lili yu'u lili nuu i kuan koo i, te masu nde ka kukan‑nuu i.

⁶ Te tee nda'vi ya'a chi ni ndakune'e jajaa de Su'si Iya Tátnuni ma, te ni jiniso'o ya ja ni jiña'a de ma, te ni sa'a ya ja ni kaku de nuu ndaka tnundo'o tnuneni ma.

⁷ Vaa ángel jinukuechi nuu Iya Tátnuni ma chi ûni ndákonduu i jito vava'a i ñayii ka kandija ja ká'an ya ma, te ñatuu wa'a i tnu'u ja nawa sa'a ña'a suchi ñatuu kúnimani nuu ñayii ma.

⁸ Jin kototnuni ni, te jin kuni ni ja va'a xeen ini Su'si o Iya Tátnuni ma. ¡Te naka va'a kúu ñayii kúkanu ini ya ma!

⁹ Jin kandija ndija ni ja ká'an Su'si o Iya Tátnuni ma, ndaka ni ja ñatuu‑ka na ja u'vi ka sa'a ni a, vaa ñayii kándija ndaka ja ká'an ya ma chi ko ni'i ko tna'a i ndaka ja jiniñu'u i ma.

¹⁰ Vaa ndika'a kuechi ma chi kénda kivi ja ñatuu ka ni'i‑ka ti ja jin kaa ti, kovaa ñayii ka ndanduku Su'si ma chi ndaka ja vii ja va'a ma jin ni'i i, te ñatuu nawa ko ka'ni ña'a i.

¹¹ Ne'e koo ni, sa'ya maa sa, te jin koniniso'o ni ja ká'an sa a, vaa káxtnu'u sa naxe jin ko ndi ini ni ja jin kandija ni ndaka ja ká'an Su'si ma.

¹² ¿Nde ni kúni ja koteku ni kua'a xeen kivi, te kuni ni ja va'a ma?

¹³ Te ko koto va'a ni yaa ni a, ja máko ka'an ni ja u'vi ma, te ko koto va'a ni ñií yu'u ni a, ja máko xnda'vi ni ñayii ma.

¹⁴ Kakayata ni nuu ja u'vi ma, te nduku ni ja sa'a ni ja va'a ma. Nduku ni ja koo mani ni ji'in ndaka ñayii ma, te ndimaa sukan ko sa'a ni.

¹⁵ Vaa Su'si Iya Tátnuni ma chi nde'ya nde'ya‑ni ya nuu ka iyo ñayii ka sa'a ja va'a ja ndaa ma, te niniso'o ñukuun ya ja ka jikan‑ta'vi ka jikan‑ta'vi i nuu ya ma.

¹⁶ Kovaa Su'si Iya Tátnuni ma, ndákiti ini ya nuu ñayii ka sa'a ja u'vi ma, te xnaa ya i ñuu ñayivi a, sukan‑va'a ñatuu na in ndaka'án‑ka ña'a.

¹⁷ Te ñayii ka sa'a ja va'a ja ndaa ma, ora ka ndakune'e jajaa i Su'si ma, te niniso'o ya ja ka jiña'a i ya ma, te sa'a ya ja jin kaku i nuu ndaka tnundo'o tnuneni ka ndo'o ka tna'a i ma.

¹⁸ Vaa iyo yatni Su'si ma ja sa'a ya ja jin kaku ñayii ka kuxii ka kunda'vi ini ma ja ñatuu‑ka na tnu'u kanu ini ka neva'a i ma.

¹⁹ Visi kua'a xeen tnundo'o tnuneni tná'a ñayii sa'a ja va'a ja ndaa ma, kovaa sa'a Su'si Iya Tátnuni ma ja vivii yanduu yandoso i nuu ndaka tnundo'o tnuneni yukan.

²⁰ Te jito vava'a ya ndaka yiki i ma, te ni‑in masu tna'nu.

²¹ Kovaa ñayii sa'a ja u'vi ma chi maa ja u'vi sa'a i ma ndaka'ni ña'a, te kûu i, te ñayii ka kuni u'vi nuu ñayii ka sa'a ja va'a ja ndaa ma chi jin ndachunaa maa i.

²² Kovaa maa Su'si Iya Tátnuni ma chi sa'a ya ja ñayii ka jinukuechi nuu ya ma chi jin kaku anua i ma nuu ja u'vi ma, te masu nawa jin ndachunaa i, vaa ni ka kukanu ini i maa ya ma.