Salmos 33 - New Testament Psalms and Proverbs in Mixtec Magdalena Peñasco

Salmo 33 Jayiñu'u kóo nuu iya ni sa'a ndaka ja iyo ñuu ñayivi a te jito va'a ya a

¹ Ndaka ni ja ka sa'a ni ja va'a ja ndaa ma, jin kata sii ini ni nuu Iya Tátnuni ma. Ndaka ni ja ni‑yu'u ni‑ini ni ka sa'a ni ja va'a ma, jin kona'a ni ja ja vii ja va'a kúu ja jin ndachiñu'u ni ya ma.

² Jin tee ni guitarra xi arpa, te jin kata ni, te jin ndachiñu'u ni ya.

³ Jin kata ni yaa jaa ka kutu'va ni ma nuu Su'si ma, te vivii jin tee ni yaa ma, te jin kata sii ini xen‑xeen ni.

⁴ Vaa tnu'u Iya Tátnuni a chi tnu'u ndaa tnu'u ndija kúu, te ndaka ja ká'an ya ma, te sukan sa'a ya.

⁵ Vaa maa ya chi játna ini ya ja ndaa ja ndija ma. Te ni‑ka'nu ñuu ñayivi a iyo tnu'u nda'vi ini ya ma.

⁶ Ja ni sa'a Iya Tátnuni ma kúu ja ni ka'an ya, te ni ka kuva'a andivi a. Te ja ni tutachi ya ji'in yu'u ya ma, te ni ka kuva'a ndaka tiuxini ka iyo andivi a.

⁷ Vaa maa ya chi kúu ndáxtutu ya ndute mar ma in‑ni nuu ku'un de ma kuenda ñu'u ndute ma in nuu ñajin ma‑ni.

⁸ Ndaka ni, ja ka iyo ni ñuu ñayivi a, jin koyu'u ni Su'si Iya Tátnuni ma, te máko jin ko sa'a‑ka ni ja u'vi ma, vaa maa ya ndakan kuenda nuu ndaka ñayii ñuu ñayivi a.

⁹ Vaa ja ni sa'a ya kúu ja ni ka'an ya, te ni ka kuva'a ndaka ja ka iyo a, te ja ni tatnuni ya ma, te ni ka jinkuiñi vava'a ndaka.

¹⁰ Te chukan kúu ja maa Iya Tátnuni ma chi kuu ndakana ya ndaka ja ka jani ini ndaka ñayii ka iyo ni‑ka'nu ñuu ñayivi a, ja maa i‑ni, te kuu jin sa'a i ma.

¹¹ Kovaa tna'a ja jani ini maa Su'si ma ja sa'a ya ma chi ni‑kani ni‑jika iyo, te masu na in kuu ndakana.

¹² Ja vava'a ka kuu ñayii ka iyo in ñuu ma, nuu ka kukanu ini i Su'si Iya Tátnuni ma, vaa ñuu yukan chi maa ya ni kaji ja nduu kuenda maa ya.

¹³ Vaa Iya Tátnuni ma chi onde andivi ma, te nde'ya ya ndaka ñayii ñuu ñayivi a.

¹⁴ Te onde nuu iyo ya ma, te nde'ya ya ndaka ja ka sa'a ka kuu ñayii a onde nuu ñu'ú ya.

¹⁵ Kuechi ja maa ya ni sa'a ini anua ndi‑in ndi‑in ñayii ma, te chukan kúu ja ñukuun jito ya ndaka ja ka sa'a ka kuu i ma.

¹⁶ Ni‑in rey ma, másu jin kundee soldado ka jito ña'a ma ja kaku de, ni a jin kaku ñayii ka jani ini ja maa i inundatnu xen‑xeen‑ka ma.

¹⁷ Te ni a caballu ma, visi kiti ndatnu xen‑xeen kúu ti ma, kovaa masu kundee ti ja kaku ñayii yoso ti ma.

¹⁸ Kovaa Iya Tátnuni ma chi kúndee ya jito ya ñayii ka kandija ja ká'an ya ma te ka kukanu ini i ya ja chindee ña'a ya, vaa iya va'a ini kúu ya.

¹⁹ Vaa sa'a ya ja jin kaku i, te masu jin kûu i, te sa'a ya ja jin koteku i kivi koo soko koo tnama ma.

²⁰ Yo'o chi ka kukanu ini o Iya Tátnuni ma, vaa maa ya chindee ña'a, te maa ya kasi ndee kasi ndoso ja ñatuu nawa sa'a ña'a ja u'vi ma.

²¹ Te chukan kúu ja nuu maa Iya Tátnuni ma na jin koo sii ini ini anua o a, vaa ûni ka kukanu ini o nuu maa ya ja kúu ya iya ñatuu na ja u'vi sa'a ma.

²² Iya Tátnuni, kunda'vi ini ña'a ni, sukan ka kukanu ini sa ja sa'a ni ja jin kuu sa a.