Salmos 32 - New Testament Psalms and Proverbs in Mixtec Magdalena Peñasco

Salmo 32 Naka va'a kúu o ja ni sakanu ini ña'a Iya Tátnuni ma

¹ ¡Naka vii naka va'a kúu ñayii ja jâ ni sakanu ini Iya Tátnuni ma kuechi i ma te ni ka naa ndaka ja u'vi ni yo sa'a i ma!

² ¡Naka vii naka va'a kúu ñayii ja ñatuu ndánduku‑ka Iya Tátnuni ma ndaka ja u'vi ni yo sa'a i ma te ndakan‑ka ya kuenda nuu i ma, te ini anua i ma ñatuu‑ka na tnu'u xnda'vi tna'a iyo!

³ Nani ni jasiyu'u sa kuechi sa ma, te yikikuñu sa ma, ni kuita‑nka i ja ni tnana u'vi sa nii nduu ma,

⁴ vaa nduu ma ji'in jakuaa ma ni yo kuvee nda'a ni a siki sa a, te ni nduu sa sukan ka nduu ita ma ja ka xii i ma. Sukan kúu tiempu i'ni xeen ma, sukan ni kuita sa.

⁵ Te ni ndaka'an ni ndakachi sa kuechi sa ma nuu ni a, te ñatuu ni chu'u sa ja u'vi ni yo sa'a sa ma. Ni jani ini sa: “Ndáka'an ndákachi o ndaka kuechi o ma nuu Iya Tátnuni ma”, te ni sakanu ini ña'a ni kuechi sa ma, ji'in ja u'vi ni yo sa'a sa ma, vi Su'si.

⁶ Visi na yanduu ndute ma nuu ñu'u de ma te ndakana de, kovaa masu kenda de nuu ka iyo ñayii ma. Te sukan kúu ni ji'in ñayii ka iyo va'a nuu ni ma chi ka jikan‑ta'vi i nuu ni ora ka kuxii xeen ini i ma, te maa ni chi chíndee ni i.

⁷ Maa ni kúu nuu kuu chu'u sa, te ko koto va'a ña'a ni nuu kua'an nuu vee sa ma, te ñatuu nawa ndo'o sa, te ndimaa ko kata sa yaa ja ka ka'an ja ni sa'a ni ja jâ ni kaku sa nuu ja u'vi ma.

⁸ Te sa'a ká'an Su'si o a: “Sa'a sa ja jaku'ni ini ni, te kaxtnu'u sa ichi ko kaka ni, te kaxtnu'u sa tnu'u ndichi nuu ni a, te ko koto ña'a sa.

⁹ Máko kuu ni sukan kúu in caballu xi sukan kúu in mula, ja ñatuu ka jaku'ni ini ti ma, vaa inundee xeen ini ti, te nde nini ja jin kinee kaa yu'u ti ma te jin konu'ni i ji'in in yo'o, vaa nú ña'a chi másu jan koo ti jan tu'va ña'a ti”, kúu ya ká'an ya.

¹⁰ Ñayii ñatuu ka kandija ja ká'an Iya Tátnuni ma chi kua'a xeen ja jin ndo'o jin neni i, kovaa ñayii ka kukanu ini Iya Tátnuni ma chi ka ndakonduu ña'a ja nda'vi ini ña'a ya ma.

¹¹ Jin koo sii ini ni nuu Iya Tátnuni ma, te jin koo sii ini xeen ni, ja ka kuu ni ñayii ka sa'a ja va'a ja ndaa ma, te jin kata ndaka ni, ja ka kuu ni ñayii ka iyo ndaa ini anua ni a nuu Su'si ma.