Salmos 31 - New Testament Psalms and Proverbs in Mixtec Magdalena Peñasco

Salmo 31 Sukan kuña'a o Iya Tátnuni ma ja kúkanu ini o ya ma

¹ Iya Tátnuni, nuu maa in‑ni ni kúkanu ini sa, te ni masu sanuu sa nawa jin ka'an maa ñayii ma, vaa maa tnu'u ndaa tnu'u ndija ni a sa'a ja kaku sa.

² Su'si maa sa, koniniso'o ñukuun ni ja jikan‑ta'vi sa nuu ni a, te kii ni ki chindee kunu ña'a ni, sukan‑va'a kaku sa nuu tnundo'o tnuneni ma. Vaa maa ni kúu kuenda kúu in toto núkuiñi vava'a ma, te chukan kúu ja kúkanu ini ña'a sa, te nuu maa ni iyo ndaka tnu'u ndee tnu'u ndatnu ja sa'a ja kuu kaku sa nuu tnundo'o tnuneni ma.

³ Vaa maa ni kúu kuenda kúu in toto núkuiñi vava'a ma, te maa ni kúu sukan kúu in ve'e sukun sukun nuu kuu kaku sa ma, vaa maa ni skaka ña'a ichi va'a ma, te ja sukan sa'a ni ma, te jin ndachiñu'u ña'a ñayii ma.

⁴ Ndatava ña'a ni nuu yo'o ni ka satu'va i ja ni ka tnii ña'a i ma, vaa nuu maa ni kúu nuu kuu kaku sa, vi Su'si.

⁵ Te nuu nda'a maa ni ndásonee sa ini anua sa ya, vaa maa ni ni chunaa ja ni kaku sa nuu ja u'vi ma. Iya Tátnuni, maa ni kúu Su'si ndija.

⁶ Saña, vi Su'si, chi ñatuu játna ini sa ndaka ñayii ka kukanu ini tna'a ja masu Su'si ka kuu ma. Vaa saña chi maa ni, vi Iya Tátnuni, kúkanu ini sa.

⁷ Te koo sii ini xen‑xeen sa, vaa maa ni kúnda'vi ini ña'a, vaa ni jini ni ja kúxii ini sa ma, te ni jini maa ni ja ini anua sa ya, ndó'o néni i ma.

⁸ Te ñatuu ni wa'a ni tnu'u ja suchi ñatuu ka kunimani nuu sa ma, te jin ni'i ña'a i chi su'va ni ndasunkani ña'a ni nuu nune kua'a‑ka ma.

⁹ Kunda'vi ini ña'a ni, vi Iya Tátnuni, vaa ndó'o néni sa, te ve jin kuita‑nka nduchinuu sa ya, ji'in anua sa ya, ji'in ni‑ka'nu yikikuñu sa ya, ja kúxii ini sa.

¹⁰ Ndaka kivi vee sa ñuu ñayivi a, ve ndi'i sa sa'a maa tnundo'o tnuneni kénda nuu sa a, te ñatuu‑ka na tnu'u ndee tnu'u ndatnu neva'a sa ja sa'a ña'a maa ja u'vi ma, te yiki sa ya chi ve jin kuita i.

¹¹ Te ndaka ñayii ñatuu ka kunimani nuu sa ma chi kuenda tnu'u ja in mi'i‑nka‑ni kúu sa nuu i ma, te ñayii iyo yatni ji'in sa ma, vi'i‑ka ka sa'a ña'a i, te ñayii ka jini ña'a nde kua'an nde vee sa ma chi ka jinu ndee ña'a i kuan koo i.

¹² Te ni ka ndunaa ña'a i, kuenda tnu'u ja in ñayii jâ ni ji'i kúu sa, te sukan kúu in vasu jâ ni ta'vi, sukan‑nka kúu sa nuu i ma.

¹³ Vaa jiniso'o sa ja kua'a ñayii ma, ka ka'an i tnu'u sa ma, te ka xsiu'u ña'a i nde kua'an nde vee sa ma. Te nú ka ndatna'a i, te ka ndatnu'u tna'a i ja jin ka'ni ña'a i, vaa ñatuu nde ka kunimani i nuu sa.

¹⁴ Kovaa saña chi maa ni kúkanu ini sa, vi Iya Tátnuni, te ká'an sa nuu ni ja maa ni kúu Su'si sa.

¹⁵ Nuu nda'a maa ni iyo sa, te máko kua'a ni tnu'u ja jin tnii ña'a ñayii ñatuu ka kunimani nuu sa ma te ka sondikin ña'a i ma.

¹⁶ Te saña ja jinukuechi sa nuu ni a, sa'a ni ja jin kuni i ja iyo ni ji'in sa. Te ja nda'vi ini ni a, te sa'a ni ja kaku sa.

¹⁷ Te máko kua'a ni tnu'u ja tna'a sa ja kan‑nuu, vi Iya Tátnuni, vaa nuu maa in‑ni ni ni jikan‑ta'vi sa ma. Te tetniñu ni ñayii ka sa'a ja u'vi ma nuu kuan koo ñayii ni ka ji'i ma, sukan‑va'a máko jin ka'an‑ka i.

¹⁸ Sa'a ni ja jin nduñi'i ñayii ka ka'an tnu'u ñayii ka sa'a ja va'a ja ndaa ma. Vaa másu nde ka tnii i kuenda, te ka ka'an ndeva'a i, te ka saxiko i ñayii ka sa'a ja va'a ja ndaa ma.

¹⁹ Ja vava'a kúu ndaka ja sa'a ja kúu ni ja jin kuu ndaka ñayii ka sa'a sukan tátnuni ni ma, vaa maa ni chi sa'a ni ja jin kuni ndaka‑ka ñayii ma sukan vivii chíndee ni ñayii ka kukanu ini ña'a i maa ni ma, vi Su'si.

²⁰ Te maa ni, jasi ndee jasi ndoso ni i nuu ja u'vi ma, vaa iyo ni ji'in i, te sa'a ni ja ka kaku i nuu ñayii ka kuni ja jin sa'a ndeva'a ña'a i ma. Te ini ve'e ni ma ka yinee va'a i, te sa'a ni ja ñatuu ka jiniso'o i ja ka ka'an ndeva'a ñayii ñatuu ka kunimani nuu i ma.

²¹ Iya sa'a ja vii ja va'a kúu Iya Tátnuni ma, vaa ni kutoo ña'a ya, te kua'a xeen ja vii ja va'a ni sa'a ya ja kuu sa ora nuu ni ndo'o ni neni sa ma.

²² Kovaa ni kenda ja ni jani ini sa ja jâ ni xndoo ña'a ni te kúu maa kúu in‑nka sa nkuu. Kovaa nuu ni ndakune'e ña'a sa ja na chindee ña'a ni ma, te maa ni chi ni jiniso'o ni ja ni ka'an sa ma.

²³ Ndaka ni ja ñatuu‑ka na ja u'vi ka sa'a‑ka ni a, jin kutoo ni Iya Tátnuni ma chi jito va'a ya ñayii ja ni‑yu'u ni‑ini i ndáchiñu'u i ya ma. Kovaa ñayii ka jani ini ja maa i ka kuu‑ka ma chi sa'a ya ja jin ndando'o jin ndaneni i ndaka ja ka sa'a ka kuu i ma.

²⁴ Jin ku'un vava'a ini ni, te jin ndatnii ni tnu'u ndee tnu'u ndatnu ini anua ni a, ndaka ni ja ka kukanu ini ni Iya Tátnuni ma.