Salmos 30 - New Testament Psalms and Proverbs in Mixtec Magdalena Peñasco

Salmo 30 Sukan iyo tnu'u ndee tnu'u ndatnu Su'si ma ji'in jayiñu'u ya ma

¹ Iya Tátnuni, ni‑yu'u ni‑ini sa ndáchiñu'u ña'a sa, vaa maa ni ni sa'a ja ni nukuiñi va'a sa. Te ñatuu ni wa'a ni tnu'u ja jin jakundee ña'a ñayii ñatuu ka kunimani nuu sa ma.

² Su'si maa sa, nuu maa in‑ni ni ni jikan‑ta'vi, ni jikan‑ta'vi sa, te ni ndasava'a ña'a ni.

³ Su'si maa sa, maa ni ni sa'a ja ni ndateku sa, vaa nú ña'a chi ini anua sa ya chi jâ iyo yatni i nuu ka iyo ñayii ni ka ji'i ma nkuu.

⁴ Jin kata ni, te jin ndachiñu'u ni Iya Tátnuni ma, ndaka ni ja ñatuu‑ka na ja u'vi ka sa'a ni ma, te jin ndaka'an ni ja iya ii kúu ya.

⁵ Vaa Su'si ma chi nunuu‑ni kúu ja ndakiti ini ya ma, kovaa ja nda'vi ini ya ma chi ni‑kani ni‑jika iyo. Te chukan kúu ja visi jakuaa ma kúxii kúnda'vi ini maa o, kovaa nú ni ndii ma, sani te jâ ni ndusii ini o.

⁶ Te nuu ni nduvii, ni nduva'a sa ma, te ni jiña'a sa ya: “Másu nde ichi ki'in‑ka sa, vi Su'si”, kúu sa jiña'a sa ya.

⁷ Te sukan, vi Iya Tátnuni, te ja ni kunda'vi ini ña'a ni, te ja maa tnu'u ndee tnu'u ndatnu ni a, te ni sunkani vava'a ña'a ni sukan núkuiñi in yuku ma. Kovaa nuu ñatuu nde ni jini‑ka ña'a sa ma, te ni yu'u xen‑xeen sa.

⁸ Nuu maa in‑ni ni, vi Iya Tátnuni, ka'an kachi sa, te kakan‑ta'vi kakan‑ta'vi sa nuu ni ja na chindee ña'a ni.

⁹ ¿Nawa chíndee ña'a i maa ni, nuna kûu sa te jin chu'u ña'a i ma? Vaa ñuyaka ma chi másu kuu ndachiñu'u‑ka ña'a i ma. Te ni masu ndaka'an ndakachi i ja va'a ja ndaa sa'a ni ma.

¹⁰ Iya Tátnuni, koniniso'o ni, te kunda'vi ini ña'a ni saña, vaa maa ni kúu iya chíndee chítuu ña'a, vi Su'si.

¹¹ Su'si maa sa, ni ndaxsama ni ndaka ja ni yo kuxii, ni yo kunda'vi ini sa ma, ji'in ja ni yo ndakani, ni yo ndaka'vi ini sa ma. Te vitna chi kandava kandita sa ja ni ndusii ini xeen sa, ni sa'a ni, vaa ni xtandiyo ni sa'ma tindayi ni yo ne'nu sa ma, te ni ndataa ni tnu'u ndee tnu'u ndatnu ni ma.

¹² Te chukan kúu ja nuu maa in‑ni ni kata sa, te ndaka'an ndakachi sa sukan vii sukan luu chíndee ña'a ni a, te ni masu kasiyu'u sa. Su'si maa sa, Iya Tátnuni, ndachiñu'u ña'a sa ni‑kani ni‑jika.