Salmos 3 - New Testament Psalms and Proverbs in Mixtec Magdalena Peñasco

Salmo 3 Sukan kukanu ini o te kakan‑ta'vi o nuu Su'si ma ora ni ndoto o ma

¹ Su'si maa sa, ni ka ndukua'a xeen ñayii ñatuu ka kunimani nuu sa a. Kua'a xeen i ñatuu ka jatna ini sukan sa'a sukan kúu sa nuu ni a.

² Kua'a xeen i chi sa'a ka ka'an i ja kuu sa, vi Su'si: “Masu chindee ña'a Su'si i ma ja kaku i”, ka kuu i ka ka'an i.

³ Kovaa ndijin, vi Su'si Iya Tátnuni, maa ni kúu nuu kuu kaku sa. Maa ni kúu iya sa'a ja koo jayiñu'u sa. Maa ni kúu iya ndátaa tnu'u ndee tnu'u ndatnu ini anua sa a, vi Su'si maa sa.

⁴ Saña chi káyu'u sa jikan‑ta'vi sa nuu Iya Tátnuni ma ja na chindee ña'a ya, te maa ya chi onde nuu yuku ii iyo ya ma, te ni ndakone'e ya ja ni jikan‑ta'vi sa ma.

⁵ Te sii ini‑ni jínkavatuu sa, te kixi sa, te sii ini‑ni ndóto sa, vaa maa Iya Tátnuni ma jito ña'a.

⁶ Masu koyu'u sa, visi uxi mil soldado ni ka ndakonduu ña'a nuu iyo sa ma ja jin ka'ni ña'a de ma, vaa saña chi kúkanu ini sa ya, te kuña'a sa ya sa'a:

⁷ “Iya Tátnuni, ndokuiñi ni, te chindee ña'a ni ja na kaku sa nuu tnundo'o tnuneni a. Su'si maa sa, maa ni kua'a yikinuu ñayii ñatuu ka kunimani nuu sa ma, te kaku sa, te ta'vi ni nu'u ñayii ka sa'a ja u'vi ma.

⁸ Iya Tátnuni, maa ni kúu iya sa'a ja jin kaku ñayii ñuu ni a nuu ja u'vi ma. Te maa ni kua'a ja vii ja va'a ja jin kuta'vi i, vi Su'si.”