Salmos 29 - New Testament Psalms and Proverbs in Mixtec Magdalena Peñasco

Salmo 29 Sukan iyo tnu'u ndee tnu'u ndatnu Su'si ma ji'in jayiñu'u ya ma

¹ Ndijin ja ka kuu ni sa'ya Su'si ma, jin ndakua'a ni jayiñu'u nuu Iya Tátnuni ma, te jin ndaka'an jin ndakachi ni sukan tátnuni ya ma, vaa maa in‑ni ya iyo tnu'u ndee tnu'u ndatnu.

² Te jin ndaka'an jin ndakachi ni sukan sa'a sukan kúu Iya Tátnuni ma, vaa ja sukan nani ya ma, te jin ndachiñu'u vivii ni ya, sukan iyo ja jin ndachiñu'u o ya ma.

³ Te onde siki ndute ma ka jiniso'o o ja ká'an Iya Tátnuni ma, te maa ya sa'a ja kána savi ma, te maa ya chi iyo ya ja tatnuni ya nuu ndute kua'a xen‑xeen ma.

⁴ Vaa ja ká'an Iya Tátnuni ma chi ûni nini'i ká'an ya ja tátnuni ya ma, te maa in‑ni ya iyo jayiñu'u ma.

⁵ Vaa ja ká'an Iya Tátnuni ma, te ka tna'nu yutnu ka kuu tnu itni ka iyo ñuu nani Líbano ma.

⁶ Te ja ká'an ya ma, te ni ka kandava, ni ka kandita ñuu nani Líbano ma sukan ka kandava ka kandita xndiki kuechi ma. Te sukan tna ni sa'a ya ñuu nani Sirión ma sukan ka kuu tna sa'ya xndiki yuku ma.

⁷ Te ja ká'an Iya Tátnuni ma, te jikin ñu'u káyu kóko ma.

⁸ Te ja ká'an maa Iya Tátnuni ma, te tnáa yuku nuu ñatuu kuiti nawa iyo ma, te suni maa ya sa'a ja tnáa yuku ñuu nani Cades ma nuu ñatuu kuiti nawa iyo ma.

⁹ Te ja ká'an Iya Tátnuni ma, te ka tna'nu yutnu ka kuu yutnu kaji ma, te ûni ka nduyanda kuiti‑nka ndaka yuku na'nu ma. Te chukan kúu ja ve'e nuu ka ndachiñu'u i ya ma chi ka ndaka'an i ndaka sukan iyo tnu'u ndee tnu'u ndatnu ya ma, te kúu sa'a ya ndaka ma.

¹⁰ Te maa Iya Tátnuni ma ni sa'a ja ni kii ndute kua'a xeen ma ñuu ñayivi a, te maa ya iyo ja tatnuni ya ni‑kani ni‑jika, sukan kúu in Rey ma ja núkoo va'a de ma te tátnuni de ma, sukan kúu ya.

¹¹ Maa Iya Tátnuni ma kua'a tnu'u ndee tnu'u ndatnu ja jin ko kuu ñayii ñuu maa ya ma, te sa'a ya ja jin koo vii jin koo va'a i, te jin koo mani i.