Salmos 25 - New Testament Psalms and Proverbs in Mixtec Magdalena Peñasco

Salmo 25 Sukan kakan‑ta'vi o nuu Su'si ma ja na sakanu ini ña'a ya te ko koto ña'a ya

¹ Iya Tátnuni, nuu maa ni ndonenuu sa, te kakan‑ta'vi sa.

² Su'si maa sa, nuu maa ni kúkanu ini sa, te máko kua'a ni tnu'u ja tna'a sa ja kan‑nuu, te máko jin jakundee ña'a ñayii ñatuu ka kunimani nuu sa ma.

³ Ja ndandaa kúu ja ndaka ñayii ka kukanu ini ña'a i maa ni ma chi másu jin tna'a i ja kan‑nuu, kovaa jin ndatna'a maa ñayii ñatuu ka kandija ja ká'an ni ma ja kan‑nuu.

⁴ Iya Tátnuni, kaxtnu'u ni ichi maa ni a, te kaxtnu'u ni naxe sa'a sa ja játna ini ni ma.

⁵ Kaxtnu'u ni naxe sa'a sa ja ndaa ma, vaa maa ni kúu Su'si sa, iya sa'a ja kaku sa nuu ja u'vi ma, te maa in‑ni ni kúkanu ini sa ndaka kivi ndaka ora.

⁶ Iya Tátnuni, ndaka'án ña'a ni sukan vivii kútoo ña'a ni ma, te kúnda'vi ini ña'a ni ma, vaa sukan ndimaa káxtnu'u ni nuu sa a.

⁷ Kovaa máko ndaka'án ni ndaka ja u'vi ni yo sa'a sa ma nuu ni kaa kuechi‑ka sa ma, vaa so'o xeen ni kaa sa, te ñatuu ni kandija ña'a sa ma. Su'va ndaka'án ña'a ni sukan kútoo ña'a ni ma, sukan nda'vi ini ni ma, vi Iya Tátnuni.

⁸ Iya va'a ini, iya sa'a ja ndaa kúu Su'si o a. Chukan kúu ja ndáka'an‑so'o ya nuu ñayii ka sa'a ja u'vi ma ja na jin ndasa'a i ja va'a ma, sukan kúni ya ma.

⁹ Vaa ñayii kúkanu ini ja maa Su'si ma, sana kuu koo va'a i ma chi maa ya kaxtnu'u ja sa'a i ja va'a ja ndaa ma, sukan kúni ya ma.

¹⁰ Te chukan kúu ja ñayii ka kandija sukan ni ka'an ya ma, ndimaa jin kuni i sukan kútoo ña'a ya ma, ji'in sukan kúnda'vi ini ña'a ya ma, ji'in sukan ndija ya ja ká'an ya ma.

¹¹ Ja na koo jayiñu'u maa ni, Iya Tátnuni, te sakanu ini ña'a ni, vaa kua'a xeen kuechi ndiso sa a.

¹² ¿Nde in kúu ñayii yu'u ja ndakan Iya Tátnuni ma kuenda nuu i ma? Ñayii yukan ma chi maa ya kaxtnu'u ichi va'a ko kaka i ma.

¹³ Te koo sii ini i, te ndimaa koo va'a i, te sa'ya tata i ma chi jin nduta'vi i ñu'ú nuu ka iyo i ma.

¹⁴ Te Iya Tátnuni ma chi káxtnu'u ya ndaka ja iyo ja sa'a ya ma nuu i, vaa ni‑yu'u ni‑ini i ndánduku i ya ma, te jin jaku'ni ini i ndaka ja ni skuiso ya ma.

¹⁵ Chukan kúu ja maa sa chi ndimaa nde'ya nde'ya‑ni sa Iya Tátnuni ma, vaa maa ya sa'a ja kaku sa nuu yo'o skuili tachi ma, ja tnii ña'a i te sa'a sa ja u'vi kúni i ma.

¹⁶ Iya Tátnuni, konde'ya ña'a ni, te kunda'vi ini ña'a ni, vaa iyo maa in‑ni sa ya'a, te jiniñu'u ña'a sa, vaa ndó'o néni sa a.

¹⁷ Vaa ini anua sa ya chi kúxii xeen ini i, vi Su'si. Sa'a ni ja na jin ndiyo tnundo'o tnuneni iyo nuu sa a, te kaku sa.

¹⁸ Jikan‑ta'vi sa nuu ni ja konde'ya ni sukan ndó'o néni sa a, te sakanu ini ña'a ni ndaka kuechi sa ma, te xnaa ni.

¹⁹ Vaa jini maa ni ja ñayii ka kuni u'vi nuu sa a chi su'va ni ka kukua'a‑ka i, te ka saxiko ña'a i, te ka kuni i ja jin sa'a ña'a i ja u'vi.

²⁰ Ko koto ña'a ni, te sa'a ni ja kaku sa nuu ja u'vi ma. Te máko kua'a ni tnu'u ja tna'a sa ja kan‑nuu ma, vaa maa in‑ni ni kúkanu ini sa.

²¹ Te ûni ni‑yu'u ni‑ini sa ká'an sa nuu ni a, te másu xnda'vi ña'a sa, vaa jini maa ni ja masu na ja u'vi sa'a sa, vaa kúkanu ini ña'a sa ja maa ni, te koo va'a sa.

²² Su'si maa sa, sa'a ni ja jin kaku ndaka ñayii ñuu Israel ma nuu ndaka tnundo'o tnuneni ka tna'a i ma.