Salmos 24 - New Testament Psalms and Proverbs in Mixtec Magdalena Peñasco

Salmo 24 Su'si ma kúu Rey iya iyo jayiñu'u

¹ Kuenda maa Iya Tátnuni ma kúu ni‑ka'nu ñu'ú iyo ñuu ñayivi a, ji'in ndaka ñayii ka iyo a, ji'in ndaka‑ka ja ka iyo a.

² Te ni sonee ya ñu'ú a siki ndute ma, te ni sunkani va'a ya.

³ ¿Na in kuu kaa nuu yuku iyo Iya Tátnuni ma? ¿Te nde in kuu koo nuu ii iyo ya ma?

⁴ Ñayii ñatuu na kuechi ndiso nda'a i ma, te iyo vii ini anua i ma, te ñatuu nde ndáchiñu'u i tna'a ja masu Su'si ka kuu ma, te ni masu nde xnda'vi i in‑ka ñayii ma.

⁵ Ñayii ñatuu nde sa'a ndaka chukan ma chi ni'i i ja vii ja va'a ja skuta'vi ña'a Iya Tátnuni ma, te maa ya sa'a ja kaku i nuu ja u'vi ma.

⁶ Sa'a jin ko kuu ini ndaka ñayii ka ndanduku i ya ma. Sa'a jin ko kuu ini ñayii ka ndi ini ja kenda koo i nuu iyo ni a, vi Su'si, te jin kuni ña'a i ja maa ni kúu Su'si iya ni yo kukanu ini Jacob ma.

⁷ Jín ndakani va'a o yutnu ye'e ñuu o Jerusalén ma, te jín ndakune va'a o ye'e ma ni‑kani ni‑jika, sukan‑va'a kuu kivi Rey iya iyo jayiñu'u ma.

⁸ ¿Nde in kúu Rey iya iyo jayiñu'u ma? ¡Su'si Iya Tátnuni ma, iya kúu sa'a ndaka ma, iya kúndee nuu ndaka ma, kúu ya!

⁹ Jín ndokani va'a o yutnu ye'e ñuu o Jerusalén ma, te jín ndakune va'a o ye'e ma ni‑kani ni‑jika, sukan‑va'a kuu kivi Rey, iya iyo jayiñu'u ma.

¹⁰ ¿Nde in kúu Rey iya iyo jayiñu'u ma? ¡Su'si Iya Tátnuni ma, iya kúndee nuu na in kúni ja kanaa i ji'in ya ma, iya ya'a kúu Rey, iya iyo jayiñu'u ma!