Salmos 23 - New Testament Psalms and Proverbs in Mixtec Magdalena Peñasco

Salmo 23 Su'si ma kúu iya jito ña'a sukan kúu tee jito ndikachi de ma

¹ Iya Tátnuni ma kúu iya jito vava'a ña'a sukan jito in tee ndikachi de ma, te ñatuu nawa ko ka'ni ña'a i ja ko kuu sa.

² Te sa'a ya ja ndatatu sa nuu kuii kuii ma, te yu'u yute nuu jika kuee ndute ma skaka ña'a ya,

³ te ndataa jaa ya tnu'u ndee tnu'u ndatnu ini anua sa ya, te skaka ña'a ya ichi ndaa ma, sukan‑va'a koo jayiñu'u ja nani ya ma.

⁴ Visi na ya'a sa yuu nuu nee xeen ma nuu ka ja'ni tna'a i ma, kovaa masu nawa koyu'u sa, vaa maa ni iyo ji'in sa, vi Su'si. Karroti ni a ji'in yutnu xii yinda'a ni a ka sa'a ja kúkanu ini ña'a sa.

⁵ Yikuu ni satu'va ni ndaka ja kaa sa nuu mesa ma, visi ka nde'ya ña'a ñayii ka kuni u'vi nuu sa ma, te chíso ni ndute jáxiko asi xini sa ma, te xchitu lili ni nuu ñu'u ndute ji'i sa ma.

⁶ Ja ndaa kúu ja ndaka kivi ja koteku sa ma, te skuta'vi ña'a ni ja va'a ja vii, vaa kúnda'vi ini ña'a ni, te ve'e ni ma, koo sa ni‑kani ni‑jika, vi Su'si Iya Tátnuni.