Salmos 22 - New Testament Psalms and Proverbs in Mixtec Magdalena Peñasco

Salmo 22 Tnu'u xii ini ma chi sani te ni nduu i tnu'u sii ini

¹ Su'si maa sa, Su'si maa sa, ¿nava'a ni xndoo ña'a ni? ¿Nava'a jika xeen iyo ni te ñatuu nde niniso'o ni ja kána sa a, sukan‑va'a chindee ña'a ni ja na kaku sa nuu tnundo'o tnuneni a?

² Su'si maa sa, kána ña'a sa nduu ma, te ñatuu ndákone'e ni ja ká'an sa ma, te jakuaa ma ñatuu ndátatu sa ja kána ña'a sa.

³ Kovaa maa ni chi iya ii kúu ni, vaa ni‑in ja u'vi ñatuu nde sa'a ni, te iyo ni ne'un ñayii ñuu Israel ma, vaa ndimaa ka ndachiñu'u ña'a i ma.

⁴ Nuu maa ni ni ka kukanu ini ndaka tna'a sa ñayii jana'a ma. Ni ka yo ndetu i ja maa ni sa'a ja jin kaku i ma, te sukan kuiti ni sa'a ni.

⁵ Ni ka ndakune'e ña'a i maa ni, te ni ka kaku i nuu tnundo'o ma. Ni ka kukanu ini i maa ni, te ñatuu ni ka tna'a i ja kan‑nuu, vi Su'si.

⁶ Kovaa saña chi sukan kúu in tindaku ma‑ni kúu sa nuu ñayii a, vaa masu nde ka nde'ya ña'a i ja in ñayii kúu sa chi ka jakundee ña'a i, te ka saxiko ña'a i, vi Su'si.

⁷ Ndaka i ka nde'ya ña'a, te ka ka'an ndeva'a i ja kuu sa, te ka skuita yu'u ka skuita nuu i, te ka skuiko i xini i, te kuan koo i‑ni, te ka ka'an i:

⁸ “Te vitna, kóto nú kii ya ki chindee ña'a ya ja kaku de, vaa kaa‑nka ni yo kukanu ini de Iya Tátnuni ma”, ka kuu i ka ka'an i.

⁹ Vaa maa ni ni yo jito va'a ña'a nuu ñunee sa chii si'i sa ma, te ni chindee ña'a ni ja ni kâku va'a sa ma, te maa ni ni sa'a ja sii ini ndátatu sa nani ñundee ña'a si'i sa ma.

¹⁰ Te nuu nda'a maa ni ni yo iyo sa, te ni yo jito va'a ña'a ni, visi ñatuu kâku‑ka sa ma, nuu ñunee‑ka sa chii si'i sa ma, te maa ni kúu Su'si sa onde kivi yukan.

¹¹ Te chukan kúu ja máko xndoo ña'a ni, vaa tnundo'o tnuneni ma chi ka sa'a i ja kúxii ini sa ma, te iyo yatni i nuu iyo sa ya, te másu na in chindee ña'a.

¹² Vaa ñayii ñatuu ka kunimani nuu sa ma chi ni ka ndakonduu ña'a i, kuenda tnu'u ja xndiki xeen ka iyo ñuu Basán ma.

¹³ Te nde'e xeen ka kuu yu'u i, sukan ka kuu yu'u ndika'a ma ora ka kokon xeen ti ma, te ka sa'a ña'a i sukan ka kandava ndee ti kiti jin tnii ti ma.

¹⁴ Te ni ndu‑uun sa, kuenda tnu'u ja ndute ma, te kuenda tnu'u ja ni ndi'i kuiti yiki sa ya ni ka ndatnana tna'a i. Sukan ni nduvita xe'en ma ja sani te ndandute i ma, sukan ni kuita kuiti ini anua sa ya.

¹⁵ Te ni yichi kuiti ñií yu'u sa ya, te ni ndatnii tna'a yaa sa ya ji'in nda'nda sa ya, jâ ni kuita kuiti sa, te vala‑nka ja kûu sa nkuu, vaa maa ni ni wa'a tnu'u ja sukan ndó'o néni sa a.

¹⁶ Ndaka ñayii ka sa'a ja u'vi ma, ja ka kuu i sukan ka kuu la‑ina ma, ni ka ndakonduu kuiti ña'a i, te ni ka xtnakue'e i nda'a sa ya ji'in ja'a sa ya.

¹⁷ Kuu ndaka'vi sa ndaka yiki sa ya, nani ka nde'ya ña'a i ma te ka ndaa ka nuu ña'a i ma.

¹⁸ Sani te ni ka ndaka'nde i sa'ma sa a, te ni ka chu'un i suerte sa'ma ndii sa ma, kóto na nde i ndake'en ma.

¹⁹ Kovaa maa ni, vi Iya Tátnuni, máko ndunaa ña'a ni, vaa maa ni kúu iya táa tnu'u ndee tnu'u ndatnu, te konuu ni, te kii ni chindee ña'a ni,

²⁰ sukan‑va'a kaku sa nuu ñayii ka kuu sukan ka kuu la‑ina ma, ja máko jin ka'ni ña'a i ji'in yuchi kúu espada ma, sukan‑va'a koteku sa.

²¹ Chindee ña'a ni, te kaku sa nuu ñayii ka kuu yu'u sukan ka kuu yu'u ndika'a ma, te ka kuu i sukan ka kuu xndiki xeen ma, vi Su'si.

²² Kaxtnu'u sa nuu ñani sa ma ji'in nuu ku'va sa ma na in kúu ni, te nuu ka ndatna'a ndaka sa ma, te kata sa ja ndachiñu'u ña'a sa.

²³ Ndaka o ja ka kuu o sa'ya tata Israel ma ja ni yo kuu de Jacob ma, jín kata o, te jín ndachiñu'u o Iya Tátnuni a, te jín koyu'u o ya, vaa ka jini o ja ndakan ya kuenda nuu o a.

²⁴ Vaa ñatuu nde ni saxiko ya ja ni jiña'a ñayii ndó'o néni ma, te ni masu nde ni chu'u ya nuu ya ma ora nuu ni ndakune'e i ya ma. Su'va ni yo niniso'o ñukuun ya ja ni jikan‑ta'vi i ma.

²⁵ Nuu ka ndatna'a sa ja ka ndachiñu'u ña'a sa ma, te ndaka'an ndakachi sa sukan vii sukan luu chíndee chítuu ña'a ni ma, te sukan sa'a sa, sukan‑va'a ñayii ka sa'a sukan játna ini ni ma, te jin kuni i sukan va'a ini ni ma.

²⁶ Ñayii nda'vi ma chi koo ja jin kaa i onde jin ndutu chii i ma, vaa ka ndanduku i Iya Tátnuni ma, te ka ndachiñu'u i ya, te chukan kúu ja jin koteku i ni‑kani ni‑jika.

²⁷ Te chukan kúu ja ndaka ñayii ka iyo ni‑ka'nu ñuu ñayivi a chi jin ndaka'án i ja Iya Tátnuni ma kúu Su'si, te jin ndakokuiñi i nuu ya ma, te jin ndachiñu'u i ya.

²⁸ Vaa suu ya tátnuni ni‑ka'nu ñuu ñayivi a ji'in ndaka tnu'u ndee tnu'u ndatnu ya ma.

²⁹ Ndaka ñayii ma ka iyo ja jin kûu i, visi ka ni'i ka tna'a maa i ñuu ñayivi a, kovaa ni a in i, másu kuu sa'a i ja maa i, te koteku i ni‑kani ni‑jika. Vaa ndaka tu'u i ndenda koo nuu Iya Tátnuni ma, te jin ndachiñu'u i ya, vaa maa in‑ni ya tátnuni.

³⁰ Te jin ndaka'an jin ndakachi ñayii ma nuu ndaka‑ka ñayii kenda kuee‑ka ma, sukan‑va'a jin kunukuechi i nuu Iya Tátnuni ma.

³¹ Te ndaka ñayii ya'a, jin ndaka'an jin ndakachi i nuu ñayii jin kâku kuee‑ka tuku ma, ndaka ja va'a ja ndaa sa'a Iya Tátnuni ma.