Salmos 21 - New Testament Psalms and Proverbs in Mixtec Magdalena Peñasco

Salmo 21 Sukan ndachiñu'u o Su'si ma ja ni chindee ña'a ya te ni kaku o nuu ñayii ñatuu kúnimani nuu o ma

¹ Iya Tátnuni, iyo sii ini xeen tee kúu rey ni kaji maa ni ma, ja iyo de ji'in tnu'u ndee tnu'u ndatnu ni wa'a maa ni ma. Te maa ni sa'a ja ndimaa káku de nuu ñayii ka kuni u'vi nuu de ma, te chukan kúu ja kúsii ini xeen de.

² Vaa ni jikan‑ta'vi de nuu ni ma, te maa ni chi ni wa'a ni ja ni kuu ini de ma, te ñatuu nde ni jiña'a ni ja másu kuu.

³ Vaa nuu ni kenda ni ja ni ka ndatna'a ni ji'in de ma, te yinda'a kua'a ni ja vii ja va'a ja kuta'vi de, te ni sonee ni in corona xini de ma, te nanimaa oro kúu i.

⁴ Ni jikan‑ta'vi de nuu ni ja kani kivi koteku de, kovaa maa ni chi ni jiña'a ni de ja ni‑kani ni‑jika koteku de.

⁵ Ja ni chindee ni de ja ni kaku de nuu ndaka tnundo'o tnuneni ni yo tna'a de ma, te ni ni'i de tnu'u ndee tnu'u ndatnu ja ni yo tatnuni de ma, te ni iyo xeen jayiñu'u de nuu ndaka ñayii ma.

⁶ Vaa maa ni ni wa'a ndaka ja vii ja va'a ja kuta'vi de ni‑kani ni‑jika ma. Ni sa'a ni ja ni iyo sii ini xeen de, vaa ni iyo ni ji'in de.

⁷ Ja ni yo kukanu ini rey ma Iya Tátnuni ma, te ja nda'vi ini iya iyo onde sukun ma, te másu na in skanda ña'a nuu iyo de ma, vi Su'si.

⁸ Iya Tátnuni, ji'in tnu'u ndee tnu'u ndatnu ni ma, te jin tnii ni ndaka ñayii ñatuu ka kunimani nuu ni ma te ka saxiko ña'a i ma.

⁹ Te jin chunee ni i jitnu káyu kóko ma kivi kenda ja ndakan ni kuenda nuu i ma te xnaa ni i ji'in ñu'u káyu kóko ma, vaa sukan sa'a ni, vaa ni ndakiti ini ni nuu i ma.

¹⁰ Te sukan xnaa ni i ne'un ñayii ñuu ñayivi a, ji'in ndaka sa'ya tata i ma, kuechi ja u'vi ni ka yo sa'a i ma.

¹¹ Visi ni ka nduku i ja jin sa'a ña'a i ja u'vi maa ni, vi Su'si, kovaa masu ni ka kundee i nuu ni ja jin sa'a i sukan ni ka ndatnu'u tna'a i ma.

¹² Vaa maa ni chi nuna tnii ni kuji ni ma, te kani ni ichi nuu ka iyo i ma chi jin ndakunu i jin ndakakayata i.

¹³ Iya Tátnuni, vaa iyo tnu'u ndee tnu'u ndatnu ni ma, te maa ni iyo ja ndani'i ni jayiñu'u ma, te chukan kúu ja jin kata sa te jin ndachiñu'u ña'a sa, vaa ni kundee ni ma, vi Su'si.