Salmos 2 - New Testament Psalms and Proverbs in Mixtec Magdalena Peñasco

Salmo 2 Sukan tátnuni iya ni kaji maa Su'si ma

¹ ¿Nava'a ka ndaxtutu tna'a ñayii ndi‑in ndi‑in ñuu ma te ka ndatnu'u tna'a i tna'a ja masu nde jiniñu'u ma?

² Tee ka kuu rey ja ka tatnuni de ndi‑in ndi‑in ñuu ma, ji'in tee ka kuu gobiernu ma, ka ndututu de, te ka ndatnu'u tna'a de ja masu jin kandija de ja ká'an Su'si ma, ji'in ja ká'an Sa'ya ya ni sunkoo ya ja tatnuni ya ma.

³ Te ka ka'an de: “Jín sakuechi jín salikin o yo'o kaa yinda'a ya a, sukan‑va'a jín yaa o te máko jin kunukuechi‑ka o nuu ya ma”, ka kuu de ka ka'an de.

⁴ Kovaa Iya Tátnuni iyo onde andivi ma chi jakundee‑ni ya ñayii ka ka'an sukan.

⁵ Sani te nuna ndakiti ini ya te ndonda ya nuu i chi jin koyu'u xen‑xeen i, vaa îyo xeen ndonda ya nuu i.

⁶ Te kuña'a ya: “Saña chi ni satu'va sa Rey sa ma ja tatnuni ya ñuu Sion ma nuu iyo yuku ii ma.”

⁷ Sa'a ká'an Sa'ya ya ma: “Saña chi kaxtnu'u sa sukan ká'an Iya Tátnuni ma. Maa ya chi sa'a ká'an ya ja kuu sa: Ro'o kúu Sa'ya ri, te vitna te maa ri kúu Yuva ro.

⁸ Kakan‑ta'vi nuu ri, te taa ri ja nduta'vi ro ni‑ka'nu ñuu ñayivi a, te kuenda maa ro ko kuu ndaka ñuu a.

⁹ Te maa ro tatnuni ji'in tnu'u ndee tnu'u ndatnu kinda'a ro a, te na in ma kandija ja tatnuni ro ma chi iyo tnu'u ndee tnu'u ndatnu ro ja xnaa ro i sukan tá'vi kisi ñu'ú ma ja kukuechi kulikin i te naa i ma‑ni, kúu ya ká'an ya.”

¹⁰ Ndijin ja ka kuu ni rey ma ji'in gobiernu ja ka tatnuni ni ñuu ñayivi a, jin koniniso'o ñukuun ni ja ká'an sa a, te jin jaku'ni ini ni sukan káxtnu'u sa a.

¹¹ Jin kunukuechi ni nuu Iya Tátnuni ma, te jin koyu'u ni ya, vaa ndakan ya kuenda naxe ka sa'a ka kuu ni ma. Chukan kúu ja jin koo sii ini ni, te jin ndachiñu'u ni ya.

¹² Vivii jin ndachiñu'u ni Sa'ya ya ma, nasa yukan te ndakiti ini ya, nú ma sa'a o sukan kúni ya ma, te xnaa ña'a ya ichi kuan koo ni ma, vaa masu yii‑ni kúu ja ndakiti ini ya ma. Kovaa ndaka ñayii ka kukanu ini ja suu ya ko koto va'a ña'a ma chi sii ini xeen ka iyo i.