Salmos 18 - New Testament Psalms and Proverbs in Mixtec Magdalena Peñasco

Salmo 18 Sukan ndakuan‑ta'vi o nuu Su'si ma ja ni chindee ña'a ya ja ni kaku o nuu ja u'vi ma

¹ Iya Tátnuni, kútoo xeen ña'a sa, vaa maa ni kúu iya táa tnu'u ndee tnu'u ndatnu.

² Iya Tátnuni, maa ni kúu toto nuu kuu konukuiñi va'a sa, te maa ni kúu ve'e sukun sukun nuu kuu chu'u sa. Te maa ni kúu iya sa'a ja kaku sa. Maa ni kúu Su'si maa sa. Maa ni kúu iya táa tnu'u ndee tnu'u ndatnu. Nuu maa ni kúkanu ini sa, vaa maa ni kúu iya jasi ndee jasi ndoso ña'a, ja ni‑in ja u'vi ma másu kaki'i ña'a, te maa ni chíndee ña'a ja na kaku sa nuu ndaka ñayii ñatuu ka kunimani nuu sa ma, vaa maa ni kúu ve'e sukun sukun nuu kuu chu'u sa ma.

³ Ndakune'e sa Iya Tátnuni ma, vaa maa ya iyo ja ndachiñu'u o ya ma. Te kaku sa nuu ñayii ñatuu ka kunimani nuu sa ma.

⁴ Nuu ndó'o néni sa ma, ni jani ini sa ja kûu sa nkuu, vaa ni ka ndakonduu ña'a ja u'vi ma, ja jin ka'ni ña'a i, te ni yu'u sa.

⁵ Ni ka jani ini i ja jin ka'ni ña'a i, te ni kenda sa nuu kûu sa ma nkuu.

⁶ Te maa ora nuu yikuu sa ndó'o néni sa ma, te ni ndakune'e sa Su'si Iya Tátnuni ma, te káyu'u sa jiña'a sa ya, te maa ya ja iyo ya onde ini veñu'u ka'nu ya ma, te ni jiniso'o ya ja jiña'a sa ya ma.

⁷ Sani te nuu ñu'ú ya ni tnaa, te onde ja'a yuku ma ni ka ndakanda. Te ndaka tu'u ni ka kanda, ja ni ndakiti xen‑xeen ini Iya Tátnuni ma.

⁸ Te xitni ya ma ni kee ñu'ma ma ni tetniñu ya ma, te yu'u ya ma ni tetniñu ya ñu'u ndu'va ma, sukan‑va'a jin kayu jin koko ñayii ka sa'a ja u'vi ma.

⁹ Ni sa'a ya ja ni kuxiñi andivi ma, te ni nuu ya vee ya, te nee ñu'ú kuiti chii ja'a ya ma.

¹⁰ Te ni jakoxtnee ya siki in ángel nani querubín, te ni ndava i kua'an i, te sukan kua'an vee ya kúu ya.

¹¹ Te ni sa'a ya ja viko ni ndutnuu kuiti ma, ja sani te kuun savi ma, ni jasi i nuu iyo ya onde andivi ma.

¹² Te ja ye'e ni'ni nuu iyo ya ma, te viko ma, ni ka yanduu i kuan koo i, te ni sa'a ya ja ni kuun ñiñi ma te sakanuu i ji'in ñu'u ka kanda'a ka kanda'a‑nka.

¹³ Te ni sa'a ya ja ni kana savi ma, te ja ni ka'an Iya Tátnuni ma, te ni kuun tuku ñiñi ma te sakanuu i ji'in ñu'u ka kanda'a ka kanda'a‑nka.

¹⁴ Ni kani ya flecha ya ma, te ni jandute, te ni jatenuu ya ndaka ñayii ñatuu ka kunimani nuu sa ma, te ni xnaa ya i.

¹⁵ Te ja ni tutachi ya ji'in xitni ya ma, sani te ni ka ndatuu ja'a yuku ka iyo nuu mar ma, te ja ni ka'an nini'i ya ma, te ni ndatuu ni‑ka'nu ñuu ñayivi a.

¹⁶ Onde sukun ma iyo ya, te ni skuili ya nda'a ya ma, te ni ndatava ña'a ya onde ka'a ndute mar ma.

¹⁷ Ni sa'a ya ja ni kaku sa nuu nda'a ñayii ñatuu ka kunimani nuu sa ma, te vitna ja kua'a xeen‑ka i ka kuu ja ka saxiko ña'a i ma sana saña ma.

¹⁸ Kivi ndó'o néni sa ma, te ni kenda koo i ni ka kani ña'a i, kovaa maa Iya Tátnuni ma chi ni chindee ña'a ya.

¹⁹ Te ni ndene'e ña'a ya, te ni jan xsia'a ña'a ya nuu nune ma, te ni sa'a ya ja ni kaku sa, vaa ni jatna ini ya ja masu na ja u'vi sa'a sa ma.

²⁰ Te maa Iya Tátnuni ma, ni ndataa ya ja vii ja va'a, vaa maa ya jini ja ni sa'a ndaa, ni sa'a ndija sa ma, te ñatuu na ja u'vi ni sa'a sa ji'in nda'a sa a.

²¹ Vaa maa sa chi kándija sa ja ká'an káchi Iya Tátnuni ma, te ñatuu na nde ni xndoo sa tnu'u tátnuni Su'si o a te ki'in sa ichi u'vi ma.

²² Su'va ndaka ja va'a ja ndaa ja tátnuni ya ma ñu'u ini sa te sa'a sa, te ñatuu nde ndúnaa sa ja ko sa'a sa sukan ká'an tnu'u tátnuni ya ma.

²³ Ni yo nukuiñi va'a, ni yo nukuiñi ndaa sa nuu ya, te ni yo jito va'a sa maa sa ja ni‑in ja u'vi ñatuu nde ni sa'a sa.

²⁴ Te chukan kúu ja sukan ni iyo va'a sa nuu Iya Tátnuni ma, te ni skuta'vi ña'a ya ja vii ja va'a, vaa ni jini ya ja ni‑in ja u'vi ñatuu ni yo sa'a sa.

²⁵ Maa ni chi kúnda'vi ini ni ñayii nda'vi ini ma, te ni‑yu'u ni‑ini ni jito va'a ni ñayii ni‑yu'u ni‑ini i jinukuechi i nuu ni a, vi Su'si.

²⁶ Te vivii ko kuu ni ji'in ñayii vivii kúu i ji'in ni ma, kovaa xndo'o xneni ni ñayii sa'a ndeva'a tna'a i ma.

²⁷ Vaa maa ni chi sa'a ni ja jin kaku ñayii ka kuxii ka kunda'vi ini i ma, kovaa sa'a ni ja jin ndakukan‑nuu ñayii ka jani ini ja maa i ka kuu‑ka ma.

²⁸ Vaa maa ni sa'a ja tnúu ñu'u ini anua sa a, te maa ni, vi Iya Tátnuni, ora ñatuu ní'i ini sa nawa sa'a sa ma, xtnuu ni ñu'u ni a nuu sa ma.

²⁹ Ja iyo ni ji'in sa, te kundee sa nuu ndaka ñayii ka kanaa ji'in sa ma, te ja maa ni, vi Su'si maa sa, te kandava sa te kuiso sa ja ka ndesi yu'u ñuu ma, vi Su'si.

³⁰ Ichi káxtnu'u Su'si ma chi ichi va'a ichi ndaa kúu, te tnu'u káxtnu'u ya a chi tnu'u ndaa tnu'u ndija kúu, te ndaka ñayii ka kukanu ini ya ma chi maa ya kasi ndee kasi ndoso ja ñatuu ni‑in ja u'vi kaki'i ña'a.

³¹ Vaa maa in‑ni Iya Tátnuni ma kúu Su'si o a, te ñatuu na in‑ka ya iyo, nú masu ja maa in‑ni ya kúu toto nuu kuu koxtnee va'a o.

³² Maa ya kúu iya táa tnu'u ndee tnu'u ndatnu, te maa ya kúu iya chíndee ña'a ja jika va'a sa ichi ya a.

³³ Vaa maa ya sa'a ja kúñama ja'a sa sukan kúñama ja'a isu ma, te maa ya sa'a ja núkuiñi va'a sa onde sukun ma.

³⁴ Vaa maa ya kúu iya satu'va ña'a naxe sa'a sa ja ki'in sa kanaa sa ma, te maa ya káxtnu'u naxe tnii sa kuji kaa ma.

³⁵ Te maa ni kúu iya jasi vava'a ña'a, sukan‑va'a kaku sa nuu ja u'vi ma, te nda'a kua'a ni a chíndee ña'a, te iyo va'a sa, te ja va'a xeen ini ni a, te ni sa'a ni ja ni nduu sa ñayii kanuu xeen‑ka.

³⁶ Te maa ni sa'a ja ichi jika sa a, masu tnundo'o xeen, te ñatuu nde kéndeka ja'a sa a.

³⁷ Ni sondikin sa ñayii ñatuu ka kunimani nuu sa ma, te ni jan tna'a sa i, te onde ni xnaa sa i, sana ni ndakokuiñi sa ma.

³⁸ Vaa ni xtnakue'e sa i, te ñatuu ni ka ndakoo‑ka i, te ni ka kotuu‑nka maa i nuu ja'a sa a.

³⁹ Te maa ni ni taa tnu'u ndee tnu'u ndatnu ja ni kanaa sa ma. Ni sa'a ni ja ñayii ñatuu ka kunimani nuu sa ma, ni ka ndatna'a maa i ja kan‑nuu ja ni kundee sa nuu i ma, te ni ka kotuu maa i nuu ja'a sa ma.

⁴⁰ Te ni sa'a ni ja ñayii ñatuu ka kunimani nuu sa ma, ni ka ndakunu i kuan koo i, te sukan, te ni kundee sa ni xnaa sa ndaka i, ja ñatuu ka kuni va'a i nuu sa ma.

⁴¹ Ni ka kayu'u i ka kana i na in chindee ña'a, kovaa ñatuu na in ni chindee ña'a. Ni ka ndakune'e i Iya Tátnuni ma, kovaa masu nde ni yo niniso'o ya ja ka ka'an i ma.

⁴² Te ûni ni xnaa sa i, sukan sa'a tikachiyaa ma, te ni jiñu sa i sukan jiñu o nde'yu ichi ma.

⁴³ Ni sa'a ni ja ni kaku sa nuu ñayii ñuu ni kanaa ji'in sa ma, te ni sa'a ni ja ni nduu sa in ñayii tátnuni nuu ndaka ñuu a, te ni sa'a ni ja ñayii ñuu masu jini ña'a i ma, te ni ka jinukuechi i nuu sa a.

⁴⁴ Ja ni ka jiniso'o i ja ká'an sa ma, te ni ka kandija i ja ni tatnuni sa ma, te sa'ya ñayii ñatuu jini ña'a ma, ni ka kandija i ja ká'an sa ma.

⁴⁵ Ñayii in‑ka ñuu ma, ni ka yu'u i ja ni kundee sa ma, te ka ni'i ka ni'i‑nka i ni ka nde koo i nuu ka yinee va'a i ka chu'u i ma.

⁴⁶ Jayiñu'u kóo nuu ni, Iya Tátnuni. Iya va'a xeen ini kúu ni, vaa suu ni kúu toto nuu yoxtnee va'a sa a. Te jayiñu'u kóo nuu ni ja kúu ni iya ni sa'a ja ni kaku sa ma.

⁴⁷ Vaa maa ni kúu iya sa'a ja jin ndachunaa ñayii ma ndaka ja ka sa'a ka kuu ña'a i ma, te maa ni sa'a ja ka kandija ñayii ndaka ñuu ma ja ká'an sa ma.

⁴⁸ Te maa ni ni sa'a ja ni kaku sa nuu ñayii ñatuu ka kunimani nuu sa ma, te maa ni sa'a ja tátnuni sa nuu ñayii ni ka ndokuiñi ja jin kanaa i ji'in sa ma. Saa vi, Su'si, te ni sa'a ni ja ni kaku sa nuu ñayii ka kuni ja jin sa'a ndeva'a ña'a i ma.

⁴⁹ Te chukan kúu ja ndaka'an ndakachi sa na in kúu ni nuu ñayii ka iyo ndaka ñuu a, te kata sa te ndachiñu'u ña'a sa, vi Iya Tátnuni.

⁵⁰ Ndimaa ni kundee rey ni sunkani maa ni ma, vaa ni kunda'vi ini ni de, vaa maa ni ni sunkani de ja ko kuu de rey. Ndaka sa'ya tata sa ja kúu sa David ma, kunda'vi ini ni ni‑kani ni‑jika, vi Su'si maa sa.