Salmos 17 - New Testament Psalms and Proverbs in Mixtec Magdalena Peñasco

Salmo 17 Sukan kakan‑ta'vi o nuu Su'si ma ja na kasi ndee kasi ndoso ya ma jin sa'a ndeva'a‑ka ña'a ñayii ma

¹ Iya Tátnuni, koniniso'o vava'a ni in ja jikan‑ta'vi sa nuu ni a, vaa ja ndaa ndija kúu, te másu xnda'vi ña'a sa, te katanuu ni ja jikan‑ta'vi sa a.

² Ndaka'an maa ni nde a kúu kuechi sa a, vaa maa ni chi nde'ya ni nú ja va'a kúu ja sa'a sa a.

³ Vaa maa ni ján koto ña'a jakuaa ma, te jitotnuni ni ini anua sa ya, kovaa ñatuu na ja u'vi ni ndani'i ni, vi Su'si, vaa jito va'a sa yu'u sa ya ja máko ka'an i tnu'u ndeva'a.

⁴ Vaa kándija sa tnu'u ká'an maa ni a, te chukan kúu ja ñatuu nde sa'a sa sukan ka sa'a jaku‑ka ñayii ma, ja ka sa'a ndeva'a tna'a i ma.

⁵ Ko koto vava'a ña'a ni ja na konukuiñi vava'a sa ichi maa ni a, sukan‑va'a máko kendeka ja'a sa ya.

⁶ Saña chi ni jikan‑ta'vi sa nuu ni a, vaa maa ni chi niniso'o ni ja ká'an sa ma, vi Su'si. Te jikan‑ta'vi xeen sa nuu ni ja koniniso'o ñukuun ni ja ká'an káchi sa nuu ni a, vi Su'si.

⁷ Ñayii ka iyo nda'a kua'a ni a, sa'a ni ja jin kaku i nuu ñayii ñatuu ka kunimani nuu i ma. Te kaxtnu'u ni ja vii ja va'a sa'a ni ma, te kuni sa sukan nda'vi ini ni ma.

⁸ Ko koto vava'a ña'a ni, sukan jito va'a xeen‑ka ni nuu ii‑ka nduchinuu ni a, te tava'a vava'a ña'a ni chii ndijin ni ma ora vee in tnundo'o tnuneni ma,

⁹ sukan‑va'a má jin kuni ña'a ñayii ñatuu ka kunimani nuu sa ma, vaa ni ka ndakonduu ña'a i, ja jin sa'a ndeva'a ña'a i, te jin ka'ni ña'a i ka kuni i.

¹⁰ Vaa ûni ni kundee maa ja u'vi ma ni jasi i ini anua i ma, te chukan kúu ja ka ka'an i ja maa i‑ni ka kuu‑ka.

¹¹ Te ka jito vava'a ña'a i nde kua'an nde vee sa ma, te ka nde'ya vava'a ña'a i, kóto naxe jin kundee i jin ndaskakayata ña'a i nuu ni a, vi Su'si.

¹² Sukan ka kuu ndika'a ma ora jin tnii ti kiti jin kaa ti ma, ji'in kuenda ka kuu ndika'a kuechi ma, ja ka chu'u ti nuu ka kuu ve'e ti ma, sukan ka sa'a ka kuu i.

¹³ Iya Tátnuni, ndokuiñi ni, te ki'in ni jin‑tna'a ni ñayii ka sa'a ja u'vi ma, te xtuu ni i ji'in yuchi kúu espada yinda'a ni a, te xnaa ni i, sukan‑va'a kaku sa nuu i ja ka sa'a i ja u'vi ma.

¹⁴ Iya Tátnuni, ji'in tnu'u ndee tnu'u ndatnu ni a, sa'a ni ja kaku sa nuu ñayii ka sa'a ja u'vi ma, visi ka ni'i ka tna'a maa i ñuu ñayivi a te ka tnaa chitu maa i chii i ma ji'in ndaka ja iyo a te ka wa'a i ndaka ja ka neva'a i ma ja jin kaa sa'ya i ma, visi ñatuu ka kundee‑ka sa'ya i ma ja jin kaa i ma. Kovaa nuu maa ni ma másu nawa iyo ja jin ni'i i.

¹⁵ Kovaa saña chi koo sii ini xen‑xeen sa kivi ndoto sa ma, ja onde nuu iyo ni a iyo sa ma, te nuu nuu o jin konde'ya tna'a o, vaa ni kundee sa nuu ndaka ja u'vi ma.