Salmos 16 - New Testament Psalms and Proverbs in Mixtec Magdalena Peñasco

Salmo 16 Su'si ma kúu iya táa ndaka nawa jiniñu'u o ma

¹ Su'si maa sa, ko koto va'a ña'a ni, vaa nuu maa in‑ni ni kúkanu ini sa.

² Ini anua sa ya ni jiña'a Iya Tátnuni ma: “Maa ni kúu iya tátnuni nuu sa a. Masu nawa iyo ñuu ñayivi a ja va'a‑ka ja kukanu ini sa, nú masu ja nuu maa in‑ni ni, vi Su'si”, kúu sa jiña'a sa ya.

³ Ndaka ja ka xnani ñayii ma su'si i ma ja ka iyo nuu ñu'ú ya, chi inundi'ya xeen ka ka'an maa ndaka ñayii ja ni‑yu'u ni‑ini i ka ndikin i ma.

⁴ Kovaa ndaka ñayii ka jinukuechi nuu tna'a ja ka jani ini i ja su'si ka kuu ma te inundi'ya xeen ka ka'an i ma chi jin ndo'o jin neni xen‑xeen‑ka maa i. Kovaa saña chi masu ndachiñu'u sa ja ka ka'an i ja su'si i ka kuu ma, te ni masu ndakune'e sa ja ka nani i ma, te ni masu ka'ni sa in kiti ja kati sa niñi ti ma nuu altar tna'a ja másu Su'si ka kuu ma.

⁵ Kovaa maa ni, vi Iya Tátnuni, kúu iya táa ndi'i kuiti nawa jiniñu'u sa ma, te maa ni jini naxe ko kuu sa.

⁶ Vivii kaa ñu'ú nuu skuta'vi ña'a ni ja koo sa a, te játna ini xeen sa ndaka ja iyo a.

⁷ Chukan kúu ja ká'an sa ja vii ja va'a ja kuu Iya Tátnuni ma, vaa maa ya ndákan‑so'o nuu sa a, vaa visi onde jakuaa ma, te sa'a ya ja ndákani ndáka'vi ini sa, te ndása'a sa kuenda.

⁸ Saña chi ni yo jini sa ja ndimaa yoxtnuu kua'an yoxtnuu vee Iya Tátnuni ma nuu sa a. Vaa maa ya iyo ichi xiñi kua'a sa ya, te ûni konukuiñi vava'a sa, te másu nawa sa'a ja kotuu sa.

⁹ Te chukan kúu ja ni ndusii ini xeen ini anua sa ya, te ni kutachi xen‑xeen sa, te ndátatu ni‑ka'nu ni‑tu'u sa, vaa kúkanu ini xeen ña'a sa, te koteku sa ni‑kani ni‑jika, vi Su'si.

¹⁰ Vaa másu xndoo ña'a ni ini yavi kinee ñu'ú‑nde'yu sa ma ja tivi i, te másu kua'a ni tnu'u ja ñayii jâ ni nduvii ni ndundoo ini i ma, te ndutne'e‑ka tuku i in‑ka jichi.

¹¹ Vaa maa ni ni kaxtnu'u ichi va'a ja sa'a ja koteku sa a, te maa ni sa'a ja koo sii ini xen‑xeen sa, vaa iyo ni ji'in sa a, te játna ini xen‑xeen sa ja ni‑kani ni‑jika, te koo sa xiñi kua'a ni a.