Salmos 15 - New Testament Psalms and Proverbs in Mixtec Magdalena Peñasco

Salmo 15 Ñayii sa'a ja va'a ja ndaa ma chi koo i ji'in Su'si ma

¹ Iya Tátnuni, ¿nde in kuu koo nuu iyo maa ni a?, ¿na in kuu koo nuu yuku ii ni a?

² Ñayii ñatuu na kuechi ma te sa'a i ja va'a ma, tna'a ñayii onde ini anua i ma ká'an i ja ndaa ma.

³ Ñayii masu nde ká'an tnu'u i ja kuu in‑ka ñayii ma, ni a sa'a i ja u'vi ja kuu tna'a i ma, ni a ká'an ndeva'a i ja kuu ñayii iyo yatni ji'in i ma.

⁴ Te suni saxiko i ñayii sa'a ja u'vi ma, kovaa ká'an vii ká'an va'a i ja kuu ñayii kándija tnu'u ká'an Su'si ma. Te sa'a i ja ni skuiso i ja sa'a i ma. Visi na ndo'o na neni i, kovaa masu ndaxsama i ja ni jani ini i ja sa'a i ma.

⁵ Ñayii wanuu xu'un i ma, te masu kakan i sa'ya xu'un i ma, ni a masu nde wa'a i tnu'u ja jin ska'an ña'a ñayii ma ja sa'a ndeva'a i ñayii va'a ini ma. Ñayii sa'a ndaka sukan chi koo va'a i, te masu kotuu kuiti i nuu Su'si ma.