Salmos 149 - New Testament Psalms and Proverbs in Mixtec Magdalena Peñasco

Salmo 149 Ndaka ñayii ñuu Israel ma, na jin ndachiñu'u i Su'si ma

¹ Jín kata o in yaa jaa nuu Su'si o Iya Tátnuni ma, te jín ndachiñu'u o ya ja ka kuu o ñayii ka iyo va'a ka iyo ndaa nuu maa ya ma.

² Jin ndusii ini ni, ñayii ñuu Israel ja ka kuu ni ñayii ñuu Sion a, vaa maa ya ni sa'a ña'a, te maa ya kúu Rey ni.

³ Jin kandava jin kandita ni, te jin ndachiñu'u ni ya, te jin skixin ni pandero ma, te jin tee ni yutnu kúu arpa ma, te jin kata ni.

⁴ Vaa Su'si Iya Tátnuni ma chi iyo sii ini xeen ya ji'in ñuu ya ma, te kua'a ya jayiñu'u ñayii ka ndakunitnuni ja masu nawa kuu jin sa'a i, nú masu ja onde maa ya ma, sana kuu jin kaku i nuu ja u'vi ma.

⁵ Jín ndusii ini ndaka o ja ka kuu o ñayii ñatuu na ja u'vi‑ka ka sa'a ma, vaa ja maa ya, te ni ka kundee o nuu ja u'vi ma. Te jín kata o nuu ya, visi ka ndatuu o nuu jito ka kixi o ma.

⁶ Te jín kata o te jín ndachiñu'u o Su'si o a, te jín koo tu'va o, te jín kinda'a o yuchi kúu espada xen‑xeen nduu nuu i ma,

⁷ sukan‑va'a jín ndachunaa o nuu ñayii ndaka ñuu ma, te jín ndando'o jín ndaneni maa i ja ni ka sa'a i ma,

⁸ sukan‑va'a jín ku'ni o ndaka rey ma, ji'in ndaka ñayii ka ndanuu‑ka ma ji'in yo'o kaa tna'a ja vee‑ka ma,

⁹ te sukan, te ko kuu sukan ndee nuu tnu'u Su'si o a, sukan iyo ja jin ndo'o jin neni tee ka kuu rey ma, ji'in tee ka tatnuni ma ja ka iyo de in‑ka ñuu ma. Kovaa jayiñu'u ndaka yo'o ja ka iyo va'a ka iyo ndaa o nuu Su'si ma ko kuu ja sukan jin ndo'o jin tna'a ñayii yukan ma. ¡Aleluya! ¡Te jayiñu'u na koo nuu Su'si ma!