Salmos 147 - New Testament Psalms and Proverbs in Mixtec Magdalena Peñasco

Salmo 147 Jín ndachiñu'u o Su'si ma ja sukan ni kunda'vi ini ya ñuu Jerusalén ma

¹ ¡Jayiñu'u kóo nuu Su'si Iya Tátnuni ma! ¡Naka vii kúu ja kata o nuu Su'si o a, vaa nuu maa ya iyo ja jin kata o te jin ndachiñu'u o ya!

² Iya Tátnuni ma, ndakani va'a ya ñuu Jerusalén ma, te ndaxtutu ya ndaka ñayii ñuu maa ya ma ja ni ka jitenuu i kuan koo i in‑ka ñuu ma.

³ Te sa'a ya ja jin ndusii ini ñayii ka kuxii ka kunda'vi ini ma, te xtandiyo ya nawa kúu ja sa'a ja ka ndo'o ka neni i ma.

⁴ Te maa ya chi na'a ya na saa tiuxini ma ka iyo andivi ma, te na'a ya nawa ka nani ndi‑in ndi‑in tiuxini ma.

⁵ Su'si o ya chi iya ka'nu xeen kúu ya, te iyo xeen tnu'u ndee tnu'u ndatnu ya, te ndichi xen‑xeen ya.

⁶ Su'si iya tátnuni nuu o a chi ûni sa'a ya ja koo jayiñu'u ñayii ndákunitnuni ja masu nawa kuu sa'a i ja maa i ma, nú masu ja onde maa ya chindee ña'a ma. Kovaa ñayii sa'a ja u'vi ma chi sa'a ya ja ûni tna'a i ja kan‑nuu.

⁷ Jin ndachiñu'u ni Su'si o Iya Tátnuni a. Jin tee ni arpa ma, te jin kata ni nuu Su'si o a.

⁸ Vaa maa ya kúu iya sa'a ja ndáchitu viko ma andivi ma te kúun savi nuu ñu'ú ya, te sa'a ya ja ka ja'nu ndaka yi'i kuii ma yuku ma.

⁹ Te sukan wa'a ya ja ka jaa kiti ma, ji'in ndaka lakaka kuechi ma, wa'a ya ja ka jaa ti ora ka nda'yu ti ma.

¹⁰ Másu ja sukan iyo tnu'u ndee tnu'u ndatnu caballu ma xi ja sukan iyo tnu'u ndee tnu'u ndatnu ñayii ma ja kua'an vee i ma, kúu ja játna ini Su'si ma chi ña'a.

¹¹ Su'si o a chi ja játna ini ya kúu in ñayii yu'u, nasa yukan, te sa'a i in ja u'vi ja ñatuu játna ini ya ma, te ni‑yu'u ni‑ini i kúkanu ini i ya ja kútoo ña'a ya te kúnda'vi ini ña'a ya.

¹² Jin ndachiñu'u ni Su'si o a, ja ka kuu ni ñayii ñuu Jerusalén ma. Jin ndachiñu'u ni Su'si o a, ja ka kuu ni ñayii ñuu Sion ma.

¹³ Vaa maa ya kúu iya ni ndakasi vava'a ye'e ñuu ni a, sukan‑va'a jin koo va'a ni ji'in sa'ya ni ma ini ñuu ni ma te ñatuu na in sa'a ndeva'a ña'a.

¹⁴ Te maa ya sa'a ja jin koo mani i ni‑ka'nu ñuu ni a, te sa'a ya ja jin ni'i jin tna'a ni, te máko kumani ja jin kaa ni ma.

¹⁵ Te maa ya tétniñu tnu'u maa ya a ñuu ñayivi a, te tnu'u maa ya a chi ñama xeen kuitenuu i.

¹⁶ Te maa ya sa'a ja kúun yu'va ma, sukan yaa yaa kaa ixi ndikachi ma, te maa ya sa'a ja kúun kuenda tnu'u ja yaa nuu ñu'u ma.

¹⁷ Te maa ya sa'a ja kúun ñiñi na'nu na'nu nuu ñu'ú a, te sa'a ya ja kúvijin xen‑xeen, te ndute ma, ûni ndúu de suja.

¹⁸ Kovaa nuna ka'an ya, sani te ndándute suja ma, te nuna tutachi ya, te ndute‑nka‑ni ndákaka ni‑ka'nu.

¹⁹ Ni kaxtnu'u ya nuu tee ni yo kuu Jacob ma ji'in nuu ñayii ñuu Israel ma tnu'u maa ya ma, sukan ni tatnuni ya ja jin sa'a ñayii ma, vaa ñukuun kútoo ya i ma.

²⁰ Kovaa masu sukan ni sa'a ya ji'in ndaka‑ka ñuu ma, te ñuu yukan, másu ni ka jini i tnu'u ni tatnuni ya ma. ¡Aleluya! ¡Jayiñu'u kóo nuu ya!