Salmos 146 - New Testament Psalms and Proverbs in Mixtec Magdalena Peñasco

Salmo 146 Jín ndachiñu'u o Su'si ma ja sukan ja'nde ndaa ya tniñu ñayii ma

¹ Yo'o chi ûni ni‑yu'u ni‑anua o ndáchiñu'u o Su'si iya tátnuni nuu o a.

² Kata sa te ndachiñu'u sa Su'si iya tátnuni nuu o a nani téku sa a.

³ Máko kukanu ini ni ñayii ka ndanuu ma, vaa masu nawa jin sa'a i ja kaku ni nuu ja u'vi ma, vaa ñayii‑ni ka kuu i.

⁴ Vaa kivi jin kûu tna i ma chi ñuyaka‑nka‑ni jin nduu i, te yukan‑ni, te ni ka naa ja ni ka yo jani, ni ka yo ka'vi ini i ja jin sa'a i ma.

⁵ ¡Kovaa naka vii naka va'a‑ka kúu ñayii kúkanu ini Su'si ni yo kukanu ini tee ni yo kuu Jacob ma ja suu ya ko kuu iya chindee ña'a!

⁶ Vaa maa ya kúu iya ni sa'a andivi ma, ji'in nuu ñu'u kua'a ndute ma. Ni sa'a ya ñu'ú ya ji'in ndaka‑ka nawa iyo a. Te ndimaa ja ndaa kúu tnu'u ká'an ya ma.

⁷ Vaa sa'a ya ja ka ndayaa ñayii ka xndo'o ka xneni ña'a in‑ka ñayii ma, te wa'a tna ya ja jin kaa ñayii ka kokon ka yichi ma, te ndáxsiaa ya ñayii nda'vi ka yinee va'a ma.

⁸ Su'si Iya Tátnuni a chi sa'a ya ja ka ndundijin nuu ñayii inukuaa ma, te ndóne'e ya ñayii ni ka xtaya ma, te kútoo xeen ya ñayii ka sa'a ja va'a ja ndaa ma.

⁹ Iya Tátnuni a chi jito va'a ya ñayii ka iyo ñuu nuu masu ñuu i kúu ma, te suni jito va'a ya suchi ñatuu na yuva na si'i‑ka i ma, ji'in ña'a ni ka ji'i yii ma. Kovaa ñayii ka sa'a ja u'vi ma chi sa'a ya ja kuan koo neé kuan koo uun‑nka maa i.

¹⁰ Vaa Su'si Iya Tátnuni ma chi maa ya tátnuni ni‑kani ni‑jika nuu ndaka jichi ñayii ñuu Sion ma, vaa maa ya kúu Su'si. ¡Aleluya! ¡Jayiñu'u kóo nuu ya!