Salmos 145 - New Testament Psalms and Proverbs in Mixtec Magdalena Peñasco

Salmo 145 Jín ndachiñu'u o Su'si ma ja sukan iyo tnu'u ndee tnu'u ndatnu ya ma te va'a ini ya ma

¹ Ndimaa ndaka'an ndakachi sa ja maa ni kúu Rey tátnuni, vi Su'si, te ni‑kani ni‑jika ndachiñu'u ña'a sa.

² Ndi‑kivi ndi‑kivi ndaka'an ndakachi sa ja vii ja va'a sa'a ni ma, te ndimaa ndachiñu'u ña'a sa ni‑kani ni‑jika.

³ Ka'nu xeen maa Iya Tátnuni ma, te maa ya iyo ja ndachiñu'u xen‑xeen o, te ni masu kuu naxe ka'an‑nka o ja iya ka'nu xen‑xeen kúu ya.

⁴ Te ndaka jichi sa'ya tata ñayii ma, jin ndaka'an jin ndakachi i ndaka tu'u ja sa'a ja kúu ni a, te jin ndachiñu'u ña'a i, vi Su'si.

⁵ Te jin ndaka'an jin ndakachi i jayiñu'u ni ma, ji'in ja sukan kanuu ni a. Te maa sa chi ndakani ndaka'vi ini sa ndaka ja sa'a ja kúu ni a.

⁶ Te ndaka ñayii ma, jin kuatnu'u ini ña'a i ndaka ja sa'a ni ma, vi Su'si, te jin ndaka'an jin ndakachi i sukan vii sukan luu kúu ja sa'a ni ma. Te maa sa ndaka'an ndaka tu'u ja sa'a ja kúu ni ma, vi Su'si.

⁷ Te ndaka ñayii ma jin ndakune'e sukan va'a xen‑xeen ini ni ma, te jin kata i, te jin ndachiñu'u ña'a i, vaa maa ni kúu iya sa'a ndaa sa'a ndija ma.

⁸ Iya nda'vi xen‑xeen ini kúu Iya Tátnuni ma, te kuee ndákiti ini ya, te ka'nu xen‑xeen ini ya.

⁹ Iya va'a xeen ini kúu Iya Tátnuni ma nuu ndaka o, te vivii jito ya ndaka tu'u ja ni sa'a ya ma.

¹⁰ Te jín ndachiñu'u ña'a ndaka ja ni sa'a ni ma, vi Su'si Iya Tátnuni, te ndaka ñayii ñatuu na ja u'vi ka sa'a i ma, na jin ka'an vii jín ka'an va'a i ja kuu ni, vi Su'si.

¹¹ Jín ka'an i sukan tátnuni ni ma ji'in sukan iyo jayiñu'u ni ma, te suni jín ndaka'an tna i sukan iyo tnu'u ndee tnu'u ndatnu ni ma, vi Su'si.

¹² Sukan‑va'a jín kuni ndaka ñayii ma sukan iyo tnu'u ndee tnu'u ndatnu ni ma, te kúu sa'a ni ndaka ma, ji'in sukan iyo jayiñu'u ni ma, ji'in sukan iyo ja tátnuni ni ma.

¹³ Vaa maa ni chi ni‑kani ni‑jika tátnuni ni nuu ndaka tu'u ja ni sa'a ni ma, te maa ni tátnuni nuu ndaka jichi sa'ya tata ñayii ma, vi Su'si.

¹⁴ Te maa ni chi chíndee chítuu ni ndaka ñayii ka kuxii ka kunda'vi ini ma, te ndókani ni ndaka ñayii ka xtaya ma.

¹⁵ Te ndaka ja ka teku ja ni sa'a maa ni ma, vi Su'si, ka ndonenuu i nuu iyo ni a, vaa ka kukanu ini ña'a i ja maa ni kua'a ja jin kaa i ora ka jiniñu'u i ma.

¹⁶ Te ndákune ni nuu nda'a ni a, te tétniñu ni kua'a xeen ja vii ja va'a nuu ndaka ja ka teku ka iyo ñuu ñayivi a, vi Su'si.

¹⁷ Ndaka cha'a sa'a kúu Iya Tátnuni ma, te ka jini o ja iya sa'a ndaa sa'a ndija kúu ya, te ndaka ja sa'a ja kúu ya ma, te káxtnu'u ya ja nda'vi xeen ini ya.

¹⁸ Iya Tátnuni ma chi iyo yatni ya nuu ka iyo ndaka ñayii ka ndakune'e i ya ma, nuu ka iyo ndaka ñayii ni‑yu'u ni‑ini i ka ndakune'e ndija i ya ma.

¹⁹ Te ndaka ñayii ka kandija ja ká'an ya ma chi ndákone'e ya ja ka jikan‑ta'vi i ma, te sa'a ya ja jin kaku i nuu ja u'vi ma, vaa ka ndi ini i ja masu jin sa'a i ja u'vi ma, vaa ka na'a i ja iya ndákan kuenda kúu ya.

²⁰ Iya Tátnuni ma chi jito va'a ya ndaka ñayii ka kutoo i ya ma, kovaa xnaa ya ndaka ñayii ndimaa ja u'vi ka sa'a i ma, vaa ñatuu ka kandija i ja ká'an ya ma.

²¹ Te maa sa chi ndaka'an ndakachi sa jayiñu'u Iya Tátnuni ma, te ndaka ñayii ma, na jin ka'an vii jín ka'an va'a i ja kuu Su'si o iya ñatuu na ja u'vi sa'a ni‑kani ni‑jika ma.