Salmos 144 - New Testament Psalms and Proverbs in Mixtec Magdalena Peñasco

Salmo 144 Sukan jin kakan‑ta'vi o nuu Su'si ma ja na jin koo va'a ndaka o ve'e o ma ji'in ndaka kiti kuechi kiti likin ka neva'a o ma

¹ ¡Naka vii naka va'a ini Su'si iya tátnuni nuu sa a! Vaa vivii jito va'a ña'a ya, te ñatuu nawa ndo'o sa. Te maa ya kúu iya kaxtnu'u nuu sa naxe ko sa'a ko kuu sa, sukan‑va'a kundee sa nuu ñayii kenda koo ja jin kanaa i ji'in sa ma.

² Te maa ya kúu iya ka ketna'a ini ji'in sa, te kútoo ña'a ya, te másu xndoo ña'a ya, vaa maa ya sa'a ja kaku sa nuu ja u'vi ma, vaa sukan kúu in ve'e sukun kúu ya, te kuu chu'u sa, sukan‑va'a kaku sa nuu ñayii ñatuu ka kunimani nuu sa ma. Te kúkanu ini sa ja maa ya kúu iya jasi ndee jasi ndoso ña'a ja ñatuu ni‑in ja u'vi kaki'i ña'a, te maa ya kúu iya sa'a ja sava‑ka ñuu ma, kúu tátnuni sa nuu i.

³ Su'si Iya Tátnuni, ¿nawa kúu ñayii ma ja ndí ini xeen ni ja ko koto ni i? ¿Te nawa kúu ñayii ma ja kúnda'vi ini ni i te kútoo ni i?

⁴ Ñayii ya chi sukan kúu ja jaka ini o ma‑ni sukan‑ni kúu i, vaa ja téku i a chi sukan‑ni kúu kuanda'vi ma‑ni sukan‑ni kúu i ja nunuu‑ni iyo i ñuu ñayivi a.

⁵ Iya Tátnuni, ndakune ni andivi a, te nuu ni kii ni nuu iyo yuku a, te sa'a ni ja kana ñu'ma.

⁶ Ji'in kuji ni a, te skana ni flecha ni a ichi andivi a, te jándute, sukan‑va'a jín koyu'u ñayii ñatuu ka kunimani nuu ni a, te jín kuitenuu i jín koo i.

⁷ Onde sukun a onde nuu iyo ni a, te skuili ni nda'a ni a, te chindee ña'a ni ja na kaku sa nuu ñayii masu ka jini ña'a i saña ma, vaa sukan kúu ndute kua'a ñu'u nuu mar ma, sukan îyo ka kuu i,

⁸ vaa ñayii ya'a, másu ka ka'an ndaa i chi ûni ka ndone'e i nda'a kua'a i ma ja ka xnda'vi i in‑ka ñayii ma.

⁹ Kovaa saña, vi Su'si Iya Tátnuni, chi kata sa yaa jaa nuu ni, te tee sa salterio ma, te kata sa yaa ká'an ja sukan vii va'a ini maa ni, vi Su'si.

¹⁰ Vaa maa ni chi sa'a ni ja ka kundee rey ma, te sukan ni sa'a ni ja ni kaku David ma tee ni yo jinukuechi nuu ni a, te ñatuu ni ka ja'ni ña'a ñayii ñatuu ni ka yo kunimani nuu de ma.

¹¹ Te suni sa'a ni ja na kaku tna sa nuu ñayii in‑ka ñuu ma, ja masu ka ka'an ndaa i ma, te ûni ka ndone'e i nda'a i ma ja ka xnda'vi i in‑ka ñayii ma.

¹² Te sa'a ni ja sayii sa ma, te vivii jin koo i nuu ni ma sukan ka kuu yutnu vivii ve jin kua'nu ka iyo nuke'e veñu'u ni ma, te sasi'i sa ma, sa'a ni ja vivii na jin ko kuu i, sukan vivii ka ndaa ja ka yituu veñu'u ni ma.

¹³ Te sa'a ni ja yaka nuu ka ñu'u ndaka ja jin kaa sa ma, ûni na ku'un chitu i. Te ndaka kiti ka jaan tata sa ma, na jin kukua'a xeen ti, te kua'a xen‑xeen ja na jin koneva'a sa nuu ñu'ú nuu ka iyo sa a.

¹⁴ Te xndiki sa ma, na jin koo ndee jin koo ndatnu ti ja jin satniñu ti, te ñatuu na in kenda ja sakui'na i ichi ka jika sa a, sukan‑va'a ñatuu na in koyu'u ja kee i ndenu ki'in i ma.

¹⁵ Ja vii ja va'a kúu ñayii kúu ñuu Su'si Iya Tátnuni ma, vaa ndaka cha'a koneva'a i.