Salmos 143 - New Testament Psalms and Proverbs in Mixtec Magdalena Peñasco

Salmo 143 Sukan kakan‑ta'vi o nuu Su'si ma ja na kaku o nuu ja u'vi ma te konukuiñi va'a o nuu ya

¹ Su'si sa Iya Tátnuni, koniniso'o ni sukan jikan‑ta'vi sa nuu ni a, te koniniso'o ñukuun ni ndaka ja ká'an ja káchi sa nuu ni a, te ndakone'e ni ja jikan‑ta'vi sa a, vaa kúkanu ini ña'a sa ja ndimaa sa'a ndaa sa'a ndija ni.

² Te saña ja jinukuechi sa nuu ni a, nú nde a masu va'a‑ni ni sa'a sa ma, sakanu ini ña'a ni, vaa masu na in kuu ka'an i ja masu na kuechi i nuu maa ni a, vi Su'si.

³ Vaa ñayii ñatuu ka kunimani nuu sa ma chi ka sondikin ña'a i, te ka kuni i ja kotuu sa te koo jika sa nuu ni a, te ka xtetuu ña'a i ja na ko sa'a sa sukan ka sa'a ñayii ka iyo nuu nee ma ja ñatuu ka kandija ña'a i maa ni ma, te ka kuni i ja ndo'o sa sukan ni ka ndo'o ñayii ni ka ji'i onde ndende kii ma te ni ka skenaa i maa i ma.

⁴ Te ini anua sa ya chi jâ ni kuita kuiti i, te ñatuu ní'i ini‑ka sa nawa sa'a sa.

⁵ Te ndáka'án sa sukan ni sa'a, ni kuu ni onde xi'na‑ka ma, te ndákani ndáka'vi ini sa ndaka sukan ni sa'a maa ni ma.

⁶ Te chukan kúu ja nuu maa ni ndóne'e sa nda'a sa ya, vaa jiniñu'u ña'a sa, sukan jiniñu'u ñu'ú yichi ma ndute ma.

⁷ Iya Tátnuni, ndakone'e kunu ni ja jikan‑ta'vi sa ya, vaa ve kuita sa. Máko chu'u ni ja ma chindee ña'a ni, vaa ma kundee sa, te nasa yukan, te kûu sa sukan ni ka ji'i ñayii ma te skenaa sa maa sa.

⁸ Ora xtnee ne'e ma, kaxtnu'u ni sukan kútoo ña'a ni a, vaa maa ni kúkanu ini sa ja chindee ña'a ni. Kaxtnu'u ni naxe ko sa'a ko kuu sa, vaa nuu nda'a maa ni iyo anua sa ya.

⁹ Chindee ña'a ni ja na kaku sa nuu ñayii ñatuu ka kunimani nuu sa ma, vaa nuu maa ni kúu nuu kuu chu'u sa te kaku sa.

¹⁰ Kaxtnu'u ni nuu sa sukan játna ini ni ja ko sa'a sa nuu ni a, vaa maa ni kúu Su'si sa, te maa Xtumani maa ni a na skaka ña'a ichi ndaa ichi va'a ma.

¹¹ Te ja maa ni, vi Su'si, te sa'a ni ja koteku sa, vaa iya va'a ini kúu ni, te ndene'e ña'a ni nuu tnundo'o tnuneni iyo sa ya.

¹² Te sukan kúnda'vi ini ña'a ni a, te xnaa ni ñayii ñatuu ka kunimani nuu sa ma. Ûni xnaa ndija ni ñayii ñatuu ka kunimani nuu sa ma, vaa saña chi ñayii jinukuechi nuu maa ni kúu sa, vi Su'si.